'ഫുൾടോസുകൾ എറിഞ്ഞിട്ട് പിച്ചിനെ കുറ്റം പറയരുത്'; ഗംഭീറിനും ബൗളർമാർക്കുമെതിരെ ആഞ്ഞടിച്ച് സുനിൽ ഗവാസ്കർ

തിലക് വർമ്മ-നിതീഷ് കുമാർ റെഡ്ഡി കൂട്ടുകെട്ടിനിടെ വിന്‍ഡീസ് ബൗളര്‍മാരും ഒരുപാട് പിഴവുകൾ വരുത്തുകയും നിരവധി ഫുൾ ടോസുകൾ എറിയുകയും ചെയ്തിരുന്നുവെന്ന് ഗവാസ്കർ ചൂണ്ടിക്കാട്ടി.

ഹൈദരാബാദ്: ഹൈദരാബാദിൽ വെസ്റ്റ് ഇൻഡീസിനെതിരായ നാലാം ടി20 പോരാട്ടത്തിൽ ഇന്ത്യ പരാജയപ്പെട്ടതിന് കാരണം പിച്ചിന്‍റെ കുഴപ്പമല്ലെന്നും ഇന്ത്യൻ ബൗളർമാരുടെ മോശം പ്രകടനമാണെന്നും മുൻ ഇന്ത്യൻ നായകൻ സുനിൽ ഗവാസ്കർ. കൃത്യമായ ലൈനിലും ലെങ്തിലും പന്തെറിയാൻ സാധിക്കാതെ ഫുൾടോസുകൾ എറിഞ്ഞു നൽകിയ ശേഷം പിച്ചിനെ കുറ്റം പറയുന്നതിൽ യാതൊരു അർത്ഥവുമില്ലെന്ന് ജിയോഹോട്ട്സ്റ്റാറിലെ ചർച്ചയ്ക്കിടെ ഗവാസ്കർ തുറന്നടിച്ചു. പിച്ചുകൾ ബാറ്റിംഗിനും ബൗളിംഗിനും ഒരുപോലെ അനുയോജ്യമായിരിക്കണമെന്ന് ഇന്ത്യൻ പരിശീലകൻ ഗൗതം ഗംഭീർ വ്യക്തമാക്കിയതിന് പിന്നാലെയാണ് ഗവാസ്കറുടെ ഈ നിരീക്ഷണം.

തിലക് വർമ്മ-നിതീഷ് കുമാർ റെഡ്ഡി കൂട്ടുകെട്ടിനിടെ വിന്‍ഡീസ് ബൗളര്‍മാരും ഒരുപാട് പിഴവുകൾ വരുത്തുകയും നിരവധി ഫുൾ ടോസുകൾ എറിയുകയും ചെയ്തിരുന്നുവെന്ന് ഗവാസ്കർ ചൂണ്ടിക്കാട്ടി. പിന്നീട് കൃത്യമായ യോർക്കറുകളും ലെങ്ത് ബോളുകളും എറിഞ്ഞു തുടങ്ങിയപ്പോഴാണ് സന്ദർശകർക്ക് മത്സരത്തിൽ മേൽക്കൈ നേടാനായതെന്നും ഗവാസ്കർ കൂട്ടിച്ചേർത്തു. ബൗളർമാർക്ക് അനുകൂലമായ പിന്തുണ പിച്ചിൽ നിന്ന് ലഭിക്കുന്നില്ലെന്ന് പരാതി പറയുന്നതിൽ കാര്യമില്ലെന്നും, റൺസ് വിട്ടുകൊടുക്കുന്ന രീതിയിൽ ഫുൾ ടോസുകൾ എറിയുമ്പോൾ പിച്ചിന് ഒന്നും ചെയ്യാനാകില്ലെന്നും അദ്ദേഹം പറഞ്ഞു.

ഹൈദരാബാദിലെ രാജീവ് ഗാന്ധി ഇന്‍റർനാഷണൽ സ്റ്റേഡിയത്തിൽ നടന്ന മത്സരത്തിൽ ഷായ് ഹോപ്പിന്‍റെ വെടിക്കെട്ട് ബാറ്റിംഗിന്‍റെ കരുത്തിൽ വെസ്റ്റ് ഇൻഡീസ് 3 വിക്കറ്റ് നഷ്ടത്തിൽ 247 റൺസെടുത്തപ്പോള്‍ ഇന്ത്യൻ ബൗളര്‍മാരില്‍ പ്രിൻസ് യാദവ് ഒഴികെയുള്വരെല്ലാം റൺസ് വഴങ്ങി. സ്പെഷ്യലിസ്റ്റ് പേസർമാരായ മയാങ്ക് യാദവും അർഷ്ദീപ് സിംഗും 52 റൺസ് വീതമാണ് വിട്ടുകൊടുത്തത്. മോശം ബൗളിംഗ് എക്സിക്യൂഷനാണ് തിരിച്ചടിയായതെന്ന് മത്സരശേഷം ഇന്ത്യൻ നായകൻ ശ്രേയസ് അയ്യരും സമ്മതിച്ചു.

മറുപടി ബാറ്റിംഗിൽ ഇന്ത്യ 19.3 ഓവറിൽ 223 റൺസിന് ഓൾഔട്ടാവുകയും 24 റൺസിന്‍റെ പരാജയം വഴങ്ങുകയുമായിരുന്നു. പരിക്കേറ്റ അർഷ്ദീപ് റിട്ടയർഡ് ഹർട്ടായി മടങ്ങിയ മത്സരത്തിലെ ജയത്തോടെ 5 മത്സരങ്ങളുള്ള പരമ്പരയിൽ വെസ്റ്റ് ഇൻഡീസ് 2-2ന് ഒപ്പമെത്തി. പരമ്പരയിലെ അഞ്ചാമത്തെയും അവസാനത്തെയും നിർണായക പോരാട്ടം ശനിയാഴ്ച ബംഗളൂരുവിലെ എം. ചിന്നസ്വാമി സ്റ്റേഡിയത്തിൽ നടക്കും.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക