ടി20 ലോകകപ്പ്: ഇന്ത്യയുടെ വിധി നിര്‍ണയിക്കുക ആ താരമെന്ന് സുരേഷ് റെയ്ന

ട്വന്‍റി 20 ലോകകപ്പ് നേടാനുള്ള കരുത്ത് ഇന്ത്യൻ ടീമിനുണ്ടെന്നും സുരേഷ് റെയ്ന പറഞ്ഞു. പാകിസ്ഥാനെതിരെ ഇന്ത്യക്ക് ജയത്തുടക്കം കിട്ടിയാല്‍ പിന്നീടുള്ള കാര്യങ്ങള്‍ എളുപ്പമാകും.

ലഖ്നൗ: ടി20 ലോകകപ്പില്‍ ഇന്ത്യയുടെ നിര്‍ണായക താരം ആരാകുമെന്ന് പ്രവചിച്ച് മുന്‍ ഇന്ത്യന്‍ താരം സുരേഷ് റെയ്ന. സൂര്യകുമാര്‍ യാദവിന്‍റെ ബാറ്റിംഗിനൊപ്പം ടൂര്‍ണമെന്‍റില്‍ ഇന്ത്യയുടെ വിധി നിര്‍ണയിക്കുക ഓള്‍ റൗണ്ടര്‍ ഹാര്‍ദ്ദിക് പാണ്ഡ്യയുടെ പ്രകടനമായിരിക്കുമെന്ന് റെയ്ന പറഞ്ഞു. കഴിഞ്ഞ രണ്ട് വര്‍ഷമായി സൂര്യകുമാര്‍ തുടരുന്ന മികച്ച പ്രകടനം ലോകകപ്പിലും തുടരുമെന്നാണ് കരുതുന്നത്. എന്നാല്‍ സൂര്യകുമാറിനൊപ്പം ഇന്ത്യയുടെ കറുത്ത കുതിരയാവുക ഹാര്‍ദ്ദിക് പാണ്ഡ്യയാവും. നിര്‍ണായക ഓവറുകള്‍ എറിയുന്നതിനൊപ്പം ഇന്ത്യക്കായി ഫിനിഷ് ചെയ്യുന്ന ചുമതലയും ഹാര്‍ദ്ദിക്കിലാണെന്നും റെയ്ന പറഞ്ഞു.

ട്വന്‍റി 20 ലോകകപ്പ് നേടാനുള്ള കരുത്ത് ഇന്ത്യൻ ടീമിനുണ്ടെന്നും സുരേഷ് റെയ്ന പറഞ്ഞു. പാകിസ്ഥാനെതിരെ ഇന്ത്യക്ക് ജയത്തുടക്കം കിട്ടിയാല്‍ പിന്നീടുള്ള കാര്യങ്ങള്‍ എളുപ്പമാകും. ജസ്പ്രീത് ബുമ്രയും രവീന്ദ്ര ജഡേജയും ഇല്ലെങ്കിലും ഏത് വമ്പന്മാരെയും വീഴ്ത്താനുള്ള കരുത്ത് രോഹിത്തിനും സംഘത്തിനുമുണ്ടെന്നും റെയ്ന വ്യക്തമാക്കി. സൂര്യകുമാറിനും ഹാര്‍ദ്ദിക്കിനുമൊപ്പം വിരാട് കോലിയുടെ പ്രകടനവും ലോകകപ്പിൽ നിർണായകമാകുമെന്നും റെയ്ന പറഞ്ഞു.

ഇടംകൈയ്യൻ പേസറായ അർഷ്ദീപ് സിംഗായിരിക്കും ബൗളിംഗില്‍ ടീമിന്‍റെ കരുത്താവുകയെന്നും സുരേഷ് റെയ്ന പറഞ്ഞു. ധോണിയുടെ നേതൃത്വത്തിൽ ഇന്ത്യ രണ്ട് തവണ ലോകകപ്പ് നേടിയപ്പോഴും ഇടംകൈയ്യൻ പേസർമാർ കരുത്ത് കാട്ടിയത് സുരേഷ് റെയ്ന ഓർമിപ്പിച്ചു. 2007ൽ ഇർഫാൻ പത്താനും ആർപി.സിംഗും മികവ് കാട്ടിയപ്പോൾ 2011 ഏകദിന ലോകകപ്പിൽ സഹീർ ഖാനും ആശിഷ് നെഹ്റയുമായിരുന്നുഇടംകൈയ്യൻ പേസർമാർ.

ടി20 ലോകകപ്പിനുള്ള ഇന്ത്യന്‍ ടീം: Rohit Sharma (Captain), KL Rahul (vice-captain), Virat Kohli, Suryakumar Yadav, Deepak Hooda, Rishabh Pant (wicket-keeper), Dinesh Karthik (wicket-keeper), Hardik Pandya, R. Ashwin, Yuzvendra Chahal, Axar Patel, Bhuvneshwar Kumar, Harshal Patel, Arshdeep Singh, Mohammed Shami.