അശ്വിന്‍, കുല്‍ദീപ് പൊരുതി, ബംഗ്ലാദേശിനെതിരെ ഇന്ത്യക്ക് മികച്ച സ്കോര്‍

278-6 എന്ന സ്കോറില്‍ രണ്ടാം ദിനം ക്രീസിലിറങ്ങിയ ഇന്ത്യക്ക് തുടക്കത്തിലെ ശ്രേയസ് അയ്യരെ നഷ്ടമായി. 86 റണ്‍സെടുത്ത ശ്രേയസിനെ എബാദോത്ത് ഹൊസൈന്‍ ബൗള്‍ഡാക്കി. ഇതോടെ ഇന്ത്യന്‍ ഇന്നിംഗ്സ്  എളുപ്പം അവസാനിപ്പിക്കാമെന്ന ബംഗ്ലാദേശ് പ്രതീക്ഷകള്‍ തകര്‍ത്ത് അശ്വിനും കുല്‍ദീപും പൊരുതി

ചിറ്റഗോറം: ബംഗ്ലാദേശിനെതിരായ ഒന്നാം ക്രിക്കറ്റ് ടെസ്റ്റില്‍ വാലറ്റക്കാരുടെ ബാറ്റിംഗ് മികവില്‍ ഇന്ത്യക്ക് മികച്ച സ്കോര്‍. ആദ്യദിനം ആറ് വിക്കറ്റ് നഷ്ടത്തില്‍ 278 റണ്‍സെടുത്ത ഇന്ത്യ രണ്ടാം ദിനം അശ്വിന്‍റെ അര്‍ധസെഞ്ചുറിയുടെയും കുല്‍ദീപ് യാദവിന്‍റെ ബാറ്റിംഗിന്‍റെയും മികവില്‍ രണ്ടാം ദിനം ലഞ്ചിന് ശേഷം 404 റണ്‍സെടുത്ത് പുറത്തായി. 58 റണ്‍സടിച്ച അശ്വിനും 40 റണ്‍സടിച്ച കുല്‍ദീപ് യാദവും 15 റണ്‍സടിച്ച കുല്‍ദീപ് യാദവും ഇന്ത്യക്കായി തിളങ്ങി. ബംഗ്ലാദേശിനായി തൈജുള്‍ ഇസ്ലാമും മെഹ്ദി ഹസനും നാല് വിക്കറ്റ് വീതം വീഴ്ത്തി.

278-6 എന്ന സ്കോറില്‍ രണ്ടാം ദിനം ക്രീസിലിറങ്ങിയ ഇന്ത്യക്ക് തുടക്കത്തിലെ ശ്രേയസ് അയ്യരെ നഷ്ടമായി. 86 റണ്‍സെടുത്ത ശ്രേയസിനെ എബാദോത്ത് ഹൊസൈന്‍ ബൗള്‍ഡാക്കി. ഇതോടെ ഇന്ത്യന്‍ ഇന്നിംഗ്സ്  എളുപ്പം അവസാനിപ്പിക്കാമെന്ന ബംഗ്ലാദേശ് പ്രതീക്ഷകള്‍ തകര്‍ത്ത് അശ്വിനും കുല്‍ദീപും പൊരുതി. എട്ടാം വിക്കറ്റില്‍ ഇരുവരും ചേര്‍ന്ന് 92 റണ്‍സടിച്ച് ഇന്ത്യയെ 400ന് അടുത്തെത്തി. 293ല്‍ ഒത്തു ചേര്‍ന്ന ഇരുവരും 393 റണ്‍സിലാണ് വേര്‍പിരിഞ്ഞത്.

അശ്വിനെ(58) വീഴ്ത്തി മെഹ്ദി ഹസനാണ് ബംഗ്ലാദേശിന് ബ്രേക്ക് ത്രൂ സമ്മാനിച്ചത്. പിന്നാലെ കുല്‍ദീപിനെ(40) തൈജുള്‍ വിക്കറ്റിന് മുന്നില്‍ കുടുക്കി. എന്നാല്‍ ഉമേഷ് യാദവിന്‍റെ രണ്ട് പടുകൂറ്റന്‍ സിക്സറുകള്‍ ഇന്ത്യയെ 400 കടത്തി. പിന്നാലെ മുഹമ്മദ് സിറാജിനെ(4) മടക്കി മെഹ്ദി ഇന്ത്യയുടെ ഒന്നാം ഇന്നിംഗ്സിന് തിരശീലയിട്ടു.

ആദ്യ ദിനം ടോസ് നേടിയ ബാറ്റിംഗ് തിരഞ്ഞെടുത്ത ഇന്ത്യന്‍ ഇന്നിംഗ്സില്‍ വിരാട് കോലിയും കെ എല്‍ രാഹുലും ശുഭ്മാന്‍ ഗില്ലും നിരാശപ്പെടുത്തിയപ്പോള്‍ 90 റണ്‍സ് നേടിയ ചേതേശ്വര്‍ പൂജാരയാണ് ടോപ് സ്‌കോററായത്. രണ്ട് മത്സരങ്ങളാണ് പരമ്പരയിലുള്ളത്. ഏകദിന പരമ്പര ബംഗ്ലാദേശ് സ്വന്തമാക്കിയിരുന്നു.