
വെല്ലിംഗ്ടൺ: ലോക ടെസ്റ്റ് ചാമ്പ്യൻഷിപ്പ് ഫൈനൽ പ്രതീക്ഷകൾ നിലനിർത്താൻ വിജയം അനിവാര്യമായ ടെസ്റ്റ് പരമ്പരയ്ക്ക് ഇന്ത്യ നാളെ ഇറങ്ങുന്നു. ന്യൂസിലന്ഡിനെതിരായ രണ്ട് മത്സരങ്ങളടങ്ങിയ പരമ്പരയിലെ ആദ്യ ടെസ്റ്റ് നാളെ വെല്ലിംഗ്ടണിലെ ബേസിൻ റിസർവിൽ ആരംഭിക്കും. ആദ്യ മത്സരത്തിൽ തന്നെ വിജയം നേടി പരമ്പരയ്ക്ക് മികച്ച തുടക്കമിടാനാണ് ശുഭ്മാൻ ഗില്ലും സംഘവും ലക്ഷ്യമിടുന്നത്.
എന്നാൽ, സ്വന്തം നാട്ടിൽ ഇന്ത്യക്കെതിരെ മികച്ച റെക്കോർഡുള്ള കിവീസിനെ വീഴ്ത്തുക ഇന്ത്യക്ക് എളുപ്പമാകില്ല. 2009 മാർച്ചിന് ശേഷം സ്വന്തം മണ്ണിൽ ഇന്ത്യയോട് ഒരു ടെസ്റ്റ് മത്സരം പോലും ന്യൂസിലൻഡ് പരാജയപ്പെട്ടിട്ടില്ല. ബേസിൻ റിസർവിൽ ഇന്ത്യ അവസാനമായി ഒരു ടെസ്റ്റ് ജയിച്ചതാകട്ടെ 1968 ലാണ്. പരിക്കേറ്റ വൈറ്റ്-ബോൾ ക്യാപ്റ്റൻ മിച്ചൽ സാന്റ്നറുടെ അഭാവം ന്യൂസിലൻഡിന് തിരിച്ചടിയാണെങ്കിലും, രചിൻ രവീന്ദ്രയും ഡെവൺ കോൺവെയും ക്യാപ്റ്റൻ ടോം ഥാലമും അവസരത്തിനൊത്ത് ഉയരുമെന്നാണ് കിവീസ് പ്രതീക്ഷ.
ആശയങ്ങളുടെ ഉത്സവം- അഗോറയില് രജിസ്റ്റര് ചെയ്യാൻ ഇവിടെ ക്ലിക് ചെയ്യുക
പേസർ ജസ്പ്രീത് ബുംറയുടെ തിരിച്ചുവരവാണ് ഇന്ത്യൻ ക്യാമ്പിന് ആവേശം നൽകുന്നത്. പര്യടനത്തിലെ വൈറ്റ്-ബോൾ മത്സരങ്ങളിൽ വിശ്രമം അനുവദിച്ചിരുന്ന 32-കാരനായ ബുംറ, ഒരു വര്ഷത്തിനുശേഷം ആദ്യമായാണ് ഇന്ത്യക്കായി ടെസ്റ്റ് കളിക്കാനിറങ്ങുന്നത്. നീണ്ട ഇടവേളക്ക് ശേഷം ടെസ്റ്റ് ടീമിലേക്ക് മടങ്ങിയെത്തുന്ന ബുംറയ്ക്ക് പിന്തുണയുമായി മൂന്ന് സ്പെഷ്യലിസ്റ്റ് പേസർമാരും പ്ലേയിംഗ് ഇലവനിൽ ഇടംപിടിച്ചേക്കും. ബാറ്റിംഗ് നിരയിൽ യശസ്വി ജയ്സ്വാൾ, റിഷഭ് പന്ത്, ദേവദത്ത് പടിക്കൽ എന്നിവർ ഈ പര്യടനത്തിൽ ആദ്യമായി കിവീസിനെ നേരിടാനിറങ്ങും.
ഇന്ത്യൻ സമയം പുലർച്ചെ 3:30-നാണ് മത്സരം ആരംഭിക്കുന്നത്. 3:00 മണിക്കാണ് ടോസ്. പുലർച്ചെ 3:30 മുതൽ രാവിലെ 11:00 മണി വരെയാണ് ഓരോ ദിവസത്തെയും കളി നടക്കുക. ഇന്ത്യയിൽ ടിവിയിൽ സോണി ടെൻ 1, സോണി ടെൻ 3 ചാനലുകളിൽ മത്സരം തത്സമയം കാണാം. ലൈവ് സ്ട്രീമിംഗില് സോണി ലിവ് ആപ്പിലൂടെയും മത്സരത്തിന്റെ തത്സമയ സംപ്രേഷണം ലഭ്യമാകും.
ഇന്ത്യൻ ടീം: ശുഭ്മാൻ ഗിൽ (ക്യാപ്റ്റൻ), യശസ്വി ജയ്സ്വാൾ, സായ് സുദർശൻ, ദേവദത്ത് പടിക്കൽ, കെ.എൽ. രാഹുൽ, ധ്രുവ് ജുറൽ (വിക്കറ്റ് കീപ്പർ), നിതീഷ് കുമാർ റെഡ്ഡി, രവീന്ദ്ര ജഡേജ, ജസ്പ്രീത് ബുംറ, മുഹമ്മദ് സിറാജ്, പ്രസിദ്ധ് കൃഷ്ണ, റിഷഭ് പന്ത് (വിക്കറ്റ് കീപ്പർ), വാഷിംഗ്ടൺ സുന്ദർ, അൻഷുൽ കാംബോജ്, ആകാശ് ദീപ്, ഗുർനൂർ ബ്രാർ.
ന്യൂസിലൻഡ് ടീം: ടോം ലാതം (ക്യാപ്റ്റൻ), ഡെവൺ കോൺവെ, ഹെൻറി നിക്കോൾസ്, രചിൻ രവീന്ദ്ര, ഡാരിൽ മിച്ചൽ, ടോം ബ്ലണ്ടൽ (വിക്കറ്റ് കീപ്പർ), ഗ്ലെൻ ഫിലിപ്സ്, നഥാൻ സ്മിത്ത്, മാറ്റ് ഹെൻറി, കൈൽ ജാമിസൺ, ജേക്കബ് ഡഫി, ബ്ലെയർ ടിക്നർ, ഡീൻ ഫോക്സ്ക്രോഫ്റ്റ്, വിൽ യംഗ്.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!