തിലക് വര്മ, റിഷഭ് പന്ത് ഏകദിന ടീമില്; സഞ്ജുവിനെ പരിഗണിച്ചില്ല, ഇന്ത്യയെ കെ എല് രാഹുല് നയിക്കും
Synopsis
ദക്ഷിണാഫ്രിക്കയ്ക്കെതിരായ ഏകദിന പരമ്പരയ്ക്കുള്ള ഇന്ത്യൻ ടീമിനെ കെ എൽ രാഹുൽ നയിക്കും. പരിക്കേറ്റ ശുഭ്മാൻ ഗില്ലിനും ശ്രേയസ് അയ്യർക്കും പകരം റുതുരാജ് ഗെയ്കവാദും തിലക് വർമയും ടീമിലെത്തി.
മുംബൈ: ദക്ഷിണാഫ്രിക്കയ്ക്കെതിരായ ഏകദിന പരമ്പരയ്ക്കുള്ള ഇന്ത്യന് ടീമിനെ കെ എല് രാഹുല് നയിക്കും. പരിക്കേറ്റ ക്യാപ്റ്റന് ശുഭ്മാന് ഗില്ലിന് പകരമാണ് രാഹുലിന് ക്യാപ്റ്റനാക്കിയത്. ഓപ്പണറായി റുതുരാജ് ഗെയ്കവാദിനെ ടീമില് ഉള്പ്പെടുത്തി. പരിക്കേറ്റ വൈസ് ക്യാപ്റ്റന് ശ്രേയസ് അയ്യര്ക്ക് പകരം തിലക് വര്മയും ടീമിലെത്തി. വിക്കറ്റ് കീപ്പര് റിഷഭ് പന്തും ടീമിലെത്തി. വൈസ് ക്യാപ്റ്റനും റിഷഭ് പന്താണ്.
സീനിയര് താരങ്ങളായ വിരാട് കോലി, രോഹിത് ശര്മ എന്നിവര് ടീമില് സ്ഥാനം നിലനിര്ത്തി. സഞ്ജു സാംസണെ ടീമിലേക്ക് പരിഗണിച്ചില്ല. അതേസമയം, ധ്രുവ് ജുറിലിന് ടീമിലിടം ലഭിച്ചു. പേസര്മാരായ ജസ്പ്രിത് ബുമ്ര, മുഹമ്മദ് സിറാജ് എന്നിവര്ക്കും വിശ്രമം നല്കി. ഓസ്ട്രേലിയക്കെതിരെ ഏകദിന പരമ്പര കളിക്കാതിരുന്ന രവീന്ദ്ര ജഡേജ ടീമിലെത്തിയപ്പോള് അക്സര് പട്ടേല് വഴിമാറി കൊടുത്തു. ഹാര്ദിക് പാണ്ഡ്യയെ ടീമില് ഉള്പ്പെടുത്തിയിട്ടില്ല.
ദക്ഷിണാഫ്രിക്കയ്ക്കെതിരെ മൂന്ന് ഏകദിന മത്സരങ്ങള്ക്കുള്ള ഇന്ത്യന് ടീം: രോഹിത് ശര്മ, യശസ്വി ജയ്സ്വാള്, വിരാട് കോലി, തിലക് വര്മ, കെ എല് രാഹുല്, റിഷഭ് പന്ത്, വാഷിംഗ്ടണ് സുന്ദര്, രവീന്ദ്ര ജഡേജ, കുല്ദീപ് യാദവ്, നിതീഷ് കുമാര് റെഡ്ഡി, ഹര്ഷിത് റാണ, റുതുരാജ് ഗെയ്കവാദ്, പ്രസിദ്ധ് കൃഷ്ണ, അര്ഷ്ദീപ് സിംഗ്, ധ്രുവ് ജുറല്.
ദക്ഷിണാഫ്രിക്കയ്ക്കെതിരെ മൂന്ന് ഏകദിനങ്ങളാണ് ഇന്ത്യ കളിക്കുക. ഈ മാസം 30ന് റാഞ്ചിയിലാണ് ആദ്യ ഏകദിനം. ഡിസംബര് മൂന്നിന് റായ്പൂരില് രണ്ടാം ഏകദിനം നടക്കും. ആറിന് വിശാകപട്ടണത്താണ് മൂന്നാം ഏകദിനം. അതിന് ശേഷം അഞ്ച് ടി20 മത്സരങ്ങള് ഉള്പ്പെടുന്ന പരമ്പരയിലും ഇരു ടീമുകളും കളിക്കും.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!