ഒരു മണിക്കൂർ നീട്ടി, ഏഷ്യാകപ്പിൽ പിന്മാറാനുള്ള തീരുമാനത്തിൽ അവസാന നിമിഷം ട്വിസ്റ്റ്, പാകിസ്ഥാനെ അനുനയിപ്പിക്കാൻ ശ്രമം, മത്സരം നടക്കുമെന്ന് ഐസിസി
Synopsis
ഏഷ്യാ കപ്പിൽ നിന്ന് പിന്മാറുമെന്ന പാകിസ്ഥാൻ്റെ ഭീഷണിയെ തുടർന്ന് ഐസിസി അനുനയ ശ്രമങ്ങൾ തുടങ്ങി. റഫറി ആൻഡി പൈക്രോഫ്റ്റിനെ മാറ്റണമെന്ന ആവശ്യം അംഗീകരിച്ചേക്കുമെന്ന സൂചനകൾക്കിടെ, മത്സരം ഒരു മണിക്കൂർ വൈകിപ്പിച്ചു
ദുബായ്: ഏഷ്യാ കപ്പിൽ നിന്ന് പിന്മാറാനുള്ള തീരുമാനത്തിൽ നിന്ന് പാകിസ്ഥാനെ അനുനയിപ്പിക്കാൻ ശ്രമം. ആൻഡി പൈക്രോഫ്റ്റിനെ റഫറി സ്ഥാനത്ത് നിന്നും മാറ്റാതെ കളിക്കില്ലെന്ന പാകിസ്ഥാന്റെ നിലപാട് ഐ സി സി അംഗീകരിക്കുമോയെന്നത് കണ്ടറിയണം. ചർച്ചകൾ തുടരുകയാണെന്നും പാകിസ്ഥാനെ അനുനയിപ്പിക്കാനാകുമെന്നാണ് പ്രതീക്ഷയെന്നും ഐ സി സി വ്യക്തമാക്കി. മത്സരം തുടങ്ങേണ്ട സമയം 8 മണിയിൽ നിന്ന് 9 മണിയിലേക്ക് നീട്ടി. പിന്മാറ്റം പ്രഖ്യാപിക്കാനായി പി സി ബി വിളിച്ചുചേർത്ത വാർത്താസമ്മേളനം നീട്ടിവച്ചിട്ടുണ്ട്. മത്സരം ഉപേക്ഷിച്ചിട്ടില്ലെന്ന് ഐ സി സിയും ഒരു മണിക്കൂർ വൈകുമെന്ന് ഏഷ്യൻ ക്രിക്കറ്റ് കൗൺസിലും അറിയിച്ചു. അതിനിടെ പാക് താരങ്ങൾ ഗ്രൗണ്ടിലെത്താനായി ഹോട്ടലിൽ നിന്നും ഇറങ്ങിയതായി റിപ്പോർട്ടുകളുണ്ട്.
ലാഹോറിലും ദുബായിലും നാടകീയ നീക്കങ്ങൾ
നേരത്തെ പൈക്രോഫ്റ്റിനെ മാറ്റാൻ ധാരണ ഉണ്ടാക്കിയിട്ടില്ലെന്ന് ഐ സി സി വൃത്തങ്ങൾ അറിയിച്ചതോടെയാണ് പാകിസ്ഥാൻ ഏഷ്യാകപ്പിൽ നിന്ന് പിന്മാറാനുള്ള തീരുമാനം പ്രഖ്യാപിക്കാനൊരുങ്ങിയത്. പി സി ബിയുടെ രണ്ടാമത്തെ മെയിലും ഐ സി സി തള്ളിയതോടെയാണ് ഇന്ന് യുഎഇയ്ക്ക് എതിരായ നിർണായക മത്സരം ഉപേക്ഷിക്കാൻ പാകിസ്ഥാൻ തീരുമാനിച്ചത്. ഇതിന് പിന്നാലെയാണ് പാകിസ്ഥാനെ അനുനയിപ്പിക്കാൻ തിരക്കിട്ട നീക്കം ഐ സി സി തുടങ്ങിയത്. ലാഹോറിലും ദുബായിലുമായി നാടകീയ നീക്കങ്ങൾ നടക്കുന്നുവെന്നാണ് വിവരം.
മാച്ച് റഫറിയെ മാറ്റുമോ?
ഇപ്പോഴും മാച്ച് റഫറി ആൻഡി പൈക്രോഫ്റ്റിനെ മാറ്റില്ലെന്ന നിലപാടിലാണ് ഐ സി സി എന്നാണ് വിവരം. പൈക്രോഫ്റ്റിനെ മാറ്റാതെ കളിക്കില്ലെന്ന് പി സി ബിയും ഉറച്ച നിലപാടിലാണ്. ലാഹോറിൽ പി സി ബിയുടെ അടിയന്തരയോഗം ചേരുന്നുണ്ട്. ഇതിലാകും അന്തിമ തീരുമാനമുണ്ടാകുക. ഇന്നത്തെ മത്സരത്തിൽ നിന്ന് പിന്മാറിയാൽ പാകിസ്താൻ ഏഷ്യാകപ്പിൽ നിന്ന് പുറത്താകും. അങ്ങനെ സംഭവിച്ചാൽ യു എ ഇ സൂപ്പര് ഫോറിലെത്തും.