ഗുജറാത്തിനെ വളഞ്ഞിട്ട് പിടിച്ച് ലക്നൗ! 181 റണ്സ് വിജയലക്ഷ്യം; ഗില്ലിനും സായിക്കും അര്ധ സെഞ്ചുറി
Synopsis
ശുഭ്മാന് ഗില് (38 പന്തില് 60), സായ് സുദര്ശന് (37 പന്തില് 56) എന്നിവരുടെ ഇന്നിംഗ്സുകളാണ് ഗുജറാത്തിനെ മാന്യമായ സ്കോറിലേക്ക് നയിച്ചത്.
ലക്നൗ: ഇന്ത്യന് പ്രീമിയര് ലീഗില് ലക്നൗ സൂപ്പര് ജയന്റ്സിനെതിരായ മത്സരത്തില് ഗുജറാത്ത് ടൈറ്റന്സിന് മികച്ച സ്കോര്. ലക്നൗവില് നടക്കുന്ന മത്സരത്തില് ടോസ് നഷ്ടപ്പെട്ട ബാറ്റിംഗിനെത്തിയ ഗുജറാത്ത് ആറ് വിക്കറ്റ് നഷ്ടത്തില് 180 റണ്സാണ് അടിച്ചെടുത്തത്. ശുഭ്മാന് ഗില് (38 പന്തില് 60), സായ് സുദര്ശന് (37 പന്തില് 56) എന്നിവരുടെ ഇന്നിംഗ്സുകളാണ് ഗുജറാത്തിനെ മാന്യമായ സ്കോറിലേക്ക് നയിച്ചത്. ലക്നൗവിന് വേണ്ടി രവി ബിഷ്ണോയ്, ഷാര്ദുല് താക്കൂര് എന്നിവര് രണ്ട് വിക്കറ്റ് വീതം വീഴ്ത്തി.
ഗംഭീര തുടക്കമാണ് ഗുജറാത്തിന് ലഭിച്ചത്. ഒന്നാം വിക്കറ്റില് ഗില് - സായ് സഖ്യം 120 റണ്സ് ചേര്ത്തു. 13-ാം ഓവര് വരെ ഈ കൂട്ടുകെട്ട് നീണ്ടു. ഗില് മടങ്ങിയതോടെയാണ് കൂട്ടുകെട്ട് പൊളിയുന്നത്. ആവേശ് ഖാന്റെ പന്തില് എയ്ഡന് മാര്ക്രമിന് ക്യാച്ച് നല്കുകയായിരുന്നു താരം. 38 പന്തുകള് നേരിട്ട ഗില് ഒരു സിക്സും ആറ് ഫോറും നേടി. തൊട്ടടുത്ത ഓവറില് സായ് മടങ്ങി. രവി ബിഷ്ണോയുടെ പന്തില് നിക്കോളാസ് പുരാന് ക്യാച്ച്. ഏഴ് ഫോറും ഒരു സിക്സും ഉള്പ്പെടുന്നതായിരുന്നു ഇന്നിംഗ്സ്.
ജോസ് ബട്ലര് (16), വാഷിംഗ്ടണ് സുന്ദര് (2) എന്നിവര്ക്ക് തിളങ്ങാനായില്ല. പിന്നീട് ഷെഫാനെ റുതര്ഫോര്ഡ് (22), ഷാരുഖ് ഖാന് (6 പന്തില് പുറത്താവാതെ 11) എന്നിവരുടെ ഇന്നിംഗ്സുകളാണ് ഗുജറാത്തിനെ മാന്യമായ സ്കോറിലേക്ക് നയിച്ചത്. റാഷിദ് ഖാന് (4) പുറത്താവാതെ നിന്നു. രാഹുല് തെവാട്ടിയ നേരിട്ട ആദ്യ പന്തില് തന്നെ മടങ്ങി. ഇരു ടീമുകളുടേയും പ്ലേയിംഗ് ഇലവന് അറിയാം.
ഗുജറാത്ത് ടൈറ്റന്സ്: സായ് സുദര്ശന്, ശുഭ്മാന് ഗില് (ക്യാപ്റ്റന്), ജോസ് ബട്ട്ലര് (വിക്കറ്റ് കീപ്പര്), വാഷിംഗ്ടണ് സുന്ദര്, ഷെര്ഫാന് റൂഥര്ഫോര്ഡ്, ഷാരൂഖ് ഖാന്, രാഹുല് ടെവാതിയ, അര്ഷാദ് ഖാന്, റാഷിദ് ഖാന്, രവിശ്രീനിവാസന് സായ് കിഷോര്, മുഹമ്മദ് സിറാജ്.
ലക്നൗ സൂപ്പര് ജയന്റ്സ്: ഐഡന് മര്ക്രം, നിക്കോളാസ് പൂരന്, ഋഷഭ് പന്ത് (വിക്കറ്റ് കീപ്പര് & ക്യാപ്റ്റന്), ഹിമ്മത് സിംഗ്, ഡേവിഡ് മില്ലര്, അബ്ദുള് സമദ്, ശാര്ദുല് താക്കൂര്, ആകാശ് ദീപ്, ദിഗ്വേഷ് സിംഗ് രാത്തി, അവേഷ് ഖാന്, രവി ബിഷ്ണോയി.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!