മുഹമ്മദ് സിറാജ് തുടക്കമിട്ടു, ജസ്പ്രിത് ബുമ്ര തീര്ത്തു; അഹമ്മദാബാദ് ടെസ്റ്റില് വെസ്റ്റ് ഇന്ഡീസ് 162ന് പുറത്ത്
Synopsis
അഹമ്മദാബാദിൽ നടക്കുന്ന ഇന്ത്യ-വെസ്റ്റ് ഇൻഡീസ് ആദ്യ ടെസ്റ്റിൽ സന്ദർശകർ 162 റൺസിന് പുറത്തായി. നാല് വിക്കറ്റ് വീഴ്ത്തിയ മുഹമ്മദ് സിറാജും മൂന്ന് വിക്കറ്റ് നേടിയ ജസ്പ്രിത് ബുമ്രയുമാണ് വിൻഡീസിനെ തകർത്തത്.
അഹമ്മദാബാദ്: ഇന്ത്യക്കെതിരായ ആദ്യ ടെസ്റ്റില് വെസ്റ്റ് ഇന്ഡീസ് 162ന് പുറത്ത്. അഹമ്മദാബാദ്, നരേന്ദ്ര മോദി സ്റ്റേഡിയത്തില് ടോസ് നേടി ബാറ്റിംഗ് തെരഞ്ഞെടുത്ത വിന്ഡീസിനെ നാല് വിക്കറ്റ് നേടി മുഹമ്മദ് സിറാജ്, മൂന്ന് പേരെ പുറത്താക്കിയ ജസ്പ്രിത് ബുമ്ര എന്നിവരാണ് തകര്ത്തത്. കുല്ദീപ് യാദവ് രണ്ട് വിക്കറ്റ് വീഴ്ത്തി. 32 റണ്സ് നേടിയ ജസ്റ്റിന് ഗ്രീവ്സാണ് വിന്ഡീസിന്റെ ടോപ് സ്കോറര്. മറുപടി ബാറ്റിംഗ് ആരംഭിച്ച ഇന്ത്യ ഒടുവില് വിവരം ലഭിക്കുമ്പോള് വിക്കറ്റ് നഷ്ടമില്ലാതെ 20 റണ്സെടുത്തിട്ടുണ്ട്. യശസ്വി ജയ്സ്വാള് (2), കെ എല് രാഹുല് (17) എന്നിവരാണ് ക്രീസില്. രണ്ട് മത്സരങ്ങളിലെ ആദ്യത്തേതാണ് ഇന്ന് നടക്കുന്നത്.
സ്കോര് സൂചിപ്പിക്കും പോലെ തകര്ച്ചയോടെയായിരുന്നു വിന്ഡീസിന്റെ തുടക്കം. 20 റണ്സിനിടെ രണ്ട് ഓപ്പണര്മാരും മടങ്ങി. റണ്സെടുക്കും മുമ്പ് ടാഗ്നരെയ്ന് ചന്ദര്പോള്, സിറാജിന്റെ പന്തില് പുറത്തായി. വിക്കറ്റ് കീപ്പര് ധ്രുവ് ജുറലിന് ക്യാച്ച്. പിന്നാലെ ജോണ് ക്യാംപെലും (8) മടങ്ങി. ഇത്തവണ ജസ്പ്രിത് ബുമ്രയുടെ പന്തില് ജുറലിന് ക്യാച്ച്. തൊട്ടുപിന്നാലെ ബ്രന്ഡന് കിംഗിനെ (13) സിറാജ് ബൗള്ഡാക്കി. അടുത്തത് അലിക് അതനാസെയുടെ (12) ഊഴമായിരുന്നു. സിറാജിന്റെ തന്നെ പന്തില് സ്ലിപ്പില് കെ എല് രാഹുലിന് ക്യാച്ച്. ഷായ് ഹോപ്പിനെ (26) കുല്ദീപ് ബൗള്ഡാക്കുക കൂടി ചെയ്തതോടെ അഞ്ചിന് 90 എന്ന നിലയിലായി വിന്ഡീസ്.
ശേഷിക്കുന്ന അഞ്ച് വിക്കറ്റുകള് 72 റണ്സിനിടെ വിന്ഡീസിന് നഷ്ടമായി. ഗ്രീവ്സിന് പുറമെ റോസ്റ്റണ് ചേസ് (24), ഖാരി പിയേരെ (11), ജോമല് വറിക്കന് (8), ജുവാന് ലയ്നെ (1) എന്നിവരാണ് പുറത്തായ മറ്റുതാരങ്ങള്. നേരത്തെ അക്സര് പട്ടേല്, ദേവ്ദത്ത് പടിക്കല്, പ്രസിദ്ധ് കൃഷ്ണ, എന് ജഗദീശന് എന്നിവരെ പുറത്തിരുത്തിയാണ് ഇന്ത്യ ഇറങ്ങിയത്. ഓള്റൗണ്ടര് നിതീഷ് കുമാര് റെഡ്ഡി ടീമിലെത്തി. രവീന്ദ്ര ജഡേജ, വാഷിംഗ്ടണ് സുന്ദര് എന്നീ സ്പിന് ഓള്റൗണ്ടര്മാരും ടീമിലുണ്ട്. കുല്ദീപ് യാദവാണ് സ്പെഷ്യലിസ്റ്റ് സ്പിന്നര്. സ്പെഷ്യലിസ്റ്റ് പേസര്മാരായ ജസ്പ്രിത് ബുമ്രയും മുഹമ്മദ് സിറാജും. ഇരു ടീമിന്റെയും പ്ലേയിംഗ് ഇലവന് അറിയാം.
ഇന്ത്യ: യശസ്വി ജയ്സ്വാള്, കെ എല് രാഹുല്, സായ് സുദര്ശന്, ശുഭ്മാന് ഗില് (ക്യാപ്റ്റന്), ധ്രുവ് ജുറെല് (വിക്കറ്റ് കീപ്പര്), രവീന്ദ്ര ജഡേജ, വാഷിംഗ്ടണ് സുന്ദര്, നിതീഷ് കുമാര് റെഡ്ഡി, കുല്ദീപ് യാദവ്, ജസ്പ്രീത് ബുംറ, മുഹമ്മദ് സിറാജ്.
വെസ്റ്റ് ഇന്ഡീസ്: ടാഗ്നരൈന് ചന്ദര്പോള്, ജോണ് കാംബെല്, അലിക്ക് അത്നാസെ, ബ്രാന്ഡന് കിംഗ്, ഷായ് ഹോപ്പ് (വിക്കറ്റ് കീപ്പര്), റോസ്റ്റണ് ചേസ് (ക്യാപ്റ്റന്), ജസ്റ്റിന് ഗ്രീവ്സ്, ജോമെല് വാരിക്കന്, ഖാരി പിയറി, ജോഹാന് ലെയ്ന്, ജെയ്ഡന് സീല്സ്.