33 പന്ത് നേരിട്ട് റണ്ണൊന്നുമെടുക്കാതെ പുറത്തായി നിക്ക് മാഡിന്‍സണ്‍; കൂടെ ഒരു അനാവശ്യ റെക്കോഡും ഓസീസ് ഓപ്പണറുടെ അക്കൗണ്ടില്‍
Synopsis
ദക്ഷിണാഫ്രിക്കയ്ക്കെതിരായ ഒന്നാം ടെസ്റ്റിൽ ഓസ്ട്രേലിയൻ ഓപ്പണർ നിക്ക് മാഡിന്‍സണ്‍ 33 പന്തുകൾ നേരിട്ട് റണ്ണൊന്നുമെടുക്കാതെ പുറത്തായി. ഒരു ദശാബ്ദത്തിന് ശേഷം ടെസ്റ്റ് ക്രിക്കറ്റിലേക്ക് മടങ്ങിയെത്തിയ താരം ഇതോടെ ഒരു അനാവശ്യ റെക്കോർഡും സ്വന്തമാക്കി.
ഡര്‍ബന്‍: ദക്ഷിണാഫ്രിക്കയ്ക്കെതിരായ ഒന്നാം ടെസ്റ്റിന്റെ ആദ്യ ദിനം ഓസ്ട്രേലിയന് താരം നിക്ക് മാഡിന്‍സണ്‍ മറക്കാനാഗ്രഹിക്കുന്നതായിരിക്കും. ഒരു ദശാബ്ദത്തിനു ശേഷം ടെസ്റ്റ് ക്രിക്കറ്റിലേക്ക് തിരിച്ചെത്തിയ മാഡിന്‍സണ്‍, 33 പന്തുകള്‍ നേരിട്ട് ഒരു റണ്‍ പോലും നേടാതെയാണ് താരം പുറത്തായത്. മാര്‍ക്കോ യാന്‍സന്റെ പന്തില്‍ കട്ട് ചെയ്യാനുള്ള ശ്രമത്തിനിടയില്‍ സ്റ്റംപില്‍ കൊണ്ടിടുകയായിരുന്നു താരം.
പൂജ്യത്തിന് പുറത്തായതിന് പിന്നാലെ ഓസ്ട്രേലിയന് ഓപ്പണറുടെ അനാവശ്യ റെക്കോര്‍ഡും മാഡിന്‍സണിന്‍റെ പേരിലായി. ടെസ്റ്റ് ചരിത്രത്തില്‍ ഏറ്റവും കൂടുതല്‍ പന്തുകള്‍ നേരിട്ട് പൂജ്യത്തിന് പുറത്താകുന്ന ഓസീസ് ഓപ്പണറായിരിക്കുകയാണ് മാഡിന്‍സണ്‍. 2016-ല്‍ പാകിസ്ഥാനെതിരായ ബോക്സിങ് ഡേ ടെസ്റ്റിലാണ് മാഡിന്‍സണ്‍ അവസാനമായി ഓസ്ട്രേലിയക്കായി കളിച്ചത്. ഒരു വര്‍ഷത്തിലേറെയായി ഫസ്റ്റ് ക്ലാസ് ക്രിക്കറ്റ് കളിച്ചിട്ടില്ലാത്ത താരത്തെ ടീമില്‍ ഉള്‍പ്പെടുത്തിയത് വലിയ തോതില്‍ വിമര്‍ശനങ്ങള്‍ക്ക് വഴിവെച്ചിരുന്നു.
എങ്കിലും, ഏകദേശം 18 വര്‍ഷം മുമ്പ് വൃഷണ കാന്‍സറിനെത്തുടര്‍ന്ന് കീമോതെറാപ്പിക്ക് വിധേയനായ മാഡിന്‍സണിന്‍റെ തിരിച്ചുവരവ് ക്രിക്കറ്റ് ലോകത്ത് അതിശയകരമായ ഒരു കഥയാണ്. ഓസ്ട്രേലിയന് ടീമില്‍ പ്രതിഭാധനരായ കളിക്കാരുടെ കുറവാണ് ഈ തെരഞ്ഞെടുപ്പിലൂടെ വ്യക്തമാകുന്നതെന്ന് വിമര്‍ശനങ്ങള്‍ ഉയര്‍ന്നിട്ടുണ്ട്. വിമര്‍ശനങ്ങള്‍ക്കിടയിലും ക്യാപ്റ്റന്‍ പാറ്റ് കമ്മിന്‍സ് മാഡിന്‍സണിന്‍റെ തെരഞ്ഞെടുപ്പിനെ പിന്തുണച്ചിരുന്നു. 'തന്റെ കളിയില്‍ താരം ആത്മവിശ്വാസത്തിലാണ്. മികച്ച ഫോമിലാണ് താരം. കഴിഞ്ഞ ആറുമാസമായി ആര്‍ക്കും അധികം ക്രിക്കറ്റ് കളിക്കാന്‍ കഴിഞ്ഞിട്ടില്ലെങ്കിലും അവന്‍ നന്നായി തയ്യാറെടുത്തിട്ടുണ്ട്.' ടോസിനു ശേഷം കമ്മിന്‍സ് വ്യക്തമാക്കി.
കാമറൂണ്‍ ഗ്രീന്‍ പരിക്കേറ്റ് പുറത്തായതിനെ തുടര്‍ന്നാണ് കഴിഞ്ഞ മാസം നടന്ന ഡൊമെയ്സ്റ്റിക് വണ്‍-ഡേ കപ്പില്‍ ന്യൂ സൗത്ത് വെയില്‍സിനായി 126 റണ്‍സ് നേടിയ മാഡിന്‍സണിനെ ടീമിലേക്ക് വിളിച്ചത്. അതേസമയം, ടോസ് നേടി ബാറ്റിംഗ് തിരഞ്ഞെടുത്ത ഓസ്ട്രേലിയ 23 റണ്‍സിന് 2 വിക്കറ്റ് നഷ്ടപ്പെട്ട് തകര്‍ച്ചയോടെയാണ് തുടങ്ങിയത്. ട്രാവിസ് ഹെഡ് നേരത്തെ പുറത്തായതിന് പിന്നാലെ മാഡിന്‍സണിന്‍റെ മടക്കം ഓസ്ട്രേലിയയെ പ്രതിരോധത്തിലാക്കി. ഒടുവില്‍ വിവരം ലഭിക്കുമ്പോള്‍ രണ്ടിന് 81 എന്ന നിലയിലാണ് അവര്‍. സ്റ്റീവന്‍ സ്മിത്ത് (24), മര്‍നസ് ലബുഷെയ്ന്‍ (36) എന്നിവരാണ് ക്രീസില്‍.
ഓസ്ട്രേലിയ: ട്രാവിസ് ഹെഡ്, നിക്ക് മാഡിസണ്‍, മാര്‍നസ് ലബുഷെയ്ന്‍, സ്റ്റീവ് സ്മിത്ത്, മാറ്റ് റെന്‍ഷോ, അലക്‌സ് ക്യാരി, ബോ വെബ്സ്റ്റര്‍, മിച്ചല്‍ സ്റ്റാര്‍ക്ക്, പാറ്റ് കമ്മിന്‍സ് (ക്യാപ്റ്റന്‍), നഥാന്‍ ലിയോണ്‍, ജോഷ് ഹേസല്‍വുഡ്.
ദക്ഷിണാഫ്രിക്ക: എയ്ഡന്‍ മാര്‍ക്രം, റയാന്‍ റിക്കിള്‍ട്ടണ്‍, ഡേവിഡ് ബെഡിംഗ്ഹാം, ടെംബ ബാവുമ (ക്യാപ്റ്റന്‍), ട്രിസ്റ്റന്‍ സ്റ്റബ്‌സ്, വിയാന്‍ മുള്‍ഡര്‍, കെയ്ല്‍ വെറെയ്ന്‍, മാര്‍ക്കോ യാന്‍സന്‍, കേശവ് മഹാരാജ്, സിമോണ്‍ ഹാര്‍മര്‍, ആന്റിച്ച് നോര്‍ജെ.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!