'ഇത് നീതികേട്'; ജയ്‌സ്വാളിനെ ഏകദിന ടീമില്‍ നിന്ന് ഒഴിവാക്കിയതിൽ ആഞ്ഞടിച്ച് അശ്വിൻ; ജഡേജയുടെയും വഴിയടഞ്ഞു

രോഹിത് ശർമ്മ ഏകദിന ലോകകപ്പിന് ശേഷം വിരമിച്ചാൽ മാത്രമേ ജയ്‌സ്വാളിന് പ്ലേയിംഗ് ഇലവനിൽ ഇടം ലഭിക്കാൻ സാധ്യതയുള്ളൂ എന്ന് അശ്വിൻ പറഞ്ഞു.

ചെന്നൈ: ന്യൂസിലന്‍ഡിനെതിരായ ഏകദിന പരമ്പരക്കുള്ള ഇന്ത്യൻ ടീമിനെ തെരഞ്ഞെടുത്തതില്‍ ബിസിസിഐ സെലക്ടർമാർക്കെതിരെ രൂക്ഷ വിമർശനവുമായി മുൻ ഇന്ത്യൻ താരം രവിചന്ദ്രൻ അശ്വിൻ. ന്യൂസിലൻഡിനെതിരായ അഞ്ച് മത്സരങ്ങളുടെ ഏകദിന പരമ്പരയ്ക്കുള്ള ടീമിൽ നിന്ന് യുവ ഓപ്പണർ യാശ്വസി ജയ്‌സ്വാളിനെ ഒഴിവാക്കിയതാണ് അശ്വിനെ ചൊടിപ്പിച്ചത്. സെലക്ടർമാരുടെ ഈ തീരുമാനം അങ്ങേയറ്റം നീതികേടാണെന്നും, ജയ്‌സ്വാളിനെപ്പോലൊരു അപൂർവ പ്രതിഭയുടെ ആത്മവിശ്വാസത്തെ ഇത് പ്രതികൂലമായി ബാധിക്കുമെന്നും അശ്വിൻ വ്യക്തമാക്കി.ന്യൂസില ൻഡിനെതിരായ അഞ്ച് മത്സരങ്ങളുടെ ഏകദിന പരമ്പരയ്ക്കുള്ള ഇന്ത്യൻ ടീമിൽ നിന്ന് ജയ്‌സ്വാളിനെ ഒഴിവാക്കിയതിന് പിന്നാലെയാണ് അശ്വിന്‍റെ പ്രതികരണം.

രോഹിത് ശർമ്മ ഏകദിന ലോകകപ്പിന് ശേഷം വിരമിച്ചാൽ മാത്രമേ ജയ്‌സ്വാളിന് പ്ലേയിംഗ് ഇലവനിൽ ഇടം ലഭിക്കാൻ സാധ്യതയുള്ളൂ എന്ന് അശ്വിൻ പറഞ്ഞു. വരാനിരിക്കുന്ന പരമ്പരയിലെ അവസാന രണ്ട് ഏകദിനങ്ങളിൽ ക്യാപ്റ്റൻ ശുഭ്മാൻ ഗിൽ കളിക്കില്ലെന്നിരിക്കെ, ജയ്‌സ്വാളിനായിരുന്നു അവസരം നൽകേണ്ടിയിരുന്നതെന്ന് അശ്വിൻ വ്യക്തമാക്കി. നിലവിലെ ഫോമിനാണ് സെലക്ടർമാർ മുൻഗണന നൽകുന്നതെങ്കിൽ 15-കാരനായ വൈഭവ് സൂര്യവംശിയെപ്പോലുള്ള കൗമാരതാരങ്ങൾ വരെ ജയ്‌സ്വാളിനെ മറികടന്ന് പരിഗണനയിലേക്ക് വന്നേക്കാമെന്ന് അശ്വിൻ മുന്നറിയിപ്പ് നൽകി. 2024 ടി20 ലോകകപ്പ് നേടിയ ടീമിൽ റിസർവ് ഓപ്പണറായിരുന്നിട്ടും ജയ്‌സ്വാളിന് പിന്നീട് അവസരങ്ങൾ ലഭിച്ചില്ലെന്ന് അശ്വിന്‍ ചൂണ്ടിക്കാട്ടി.കഴിഞ്ഞ രണ്ടുമൂന്ന് വർഷത്തെ ജയ്‌സ്വാളിന്‍റെ ബാറ്റിംഗ് ശൈലി നിരീക്ഷിച്ചാൽ താരത്തിന്‍റെ ആത്മവിശ്വാസത്തിൽ ഇടിവുണ്ടായത് വ്യക്തമാണെന്നും, ഒരു അപൂർവ പ്രതിഭയായ ജയ്‌സ്വാളിനെ മാനേജ്‌മെന്റും സെലക്ടർമാരും ചേർന്ന് സംരക്ഷിക്കേണ്ടതുണ്ടെന്നും അശ്വിൻ ഓർമ്മിപ്പിച്ചു.

വെസ്റ്റ് ഇൻഡീസിനെതിരായ മൂന്നാം ഏകദിനത്തിൽ രവീന്ദ്ര ജഡേജയ്ക്ക് വിശ്രമം അനുവദിച്ചതാണെന്ന് ക്യാപ്റ്റൻ ശുഭ്മാൻ ഗിൽ പറഞ്ഞിരുന്നെങ്കിലും, വരാനിരിക്കുന്ന ന്യൂസിലൻഡ് പര്യടനത്തിനുള്ള ടീമിൽ നിന്നും ജഡേജയെ പൂർണ്ണമായി ഒഴിവാക്കുകയാണുണ്ടായത്. റിപ്പോർട്ടുകൾ പ്രകാരം, 2027 ഏകദിന ലോകകപ്പിനുള്ള ടീം ഇന്ത്യയുടെ പദ്ധതികളിൽ 37-കാരനായ ജഡേജ ഇനി ഉണ്ടാകില്ലെന്നാണ് ലഭിക്കുന്ന സൂചനകൾ.

ജഡേജയ്ക്ക് പകരക്കാരനായി അക്സർ പട്ടേൽ

2023 ഏകദിന ലോകകപ്പിന് ശേഷം കളിച്ച 15 മത്സരങ്ങളിൽ നിന്ന് 47.92 ശരാശരിയിൽ 14 വിക്കറ്റുകൾ മാത്രമാണ് ജഡേജയ്ക്ക് നേടാനായത്. ബാറ്റിംഗിലും മുൻപത്തെപ്പോലെ മികവ് പുലർത്താൻ താരത്തിന് സാധിക്കുന്നില്ല. നിലവിൽ രവീന്ദ്ര ജഡേജയേക്കാൾ സർവ്വമേഖലയിലും അക്സർ പട്ടേൽ മുന്നിലാണെന്നാണ് സെലക്ഷൻ കമ്മിറ്റിയുടെ വിലയിരുത്തൽ. അക്സറിന്‍റെ വിക്കറ്റ് വീഴ്ത്താനുള്ള ശേഷിയും, മിഡിൽ ഓവറുകളിൽ ബാറ്റിംഗ് ഓർഡറിൽ എവിടെ വേണമെങ്കിലും പ്രയോജനപ്പെടുത്താമെന്നതും ജഡേജയ്ക്ക് തിരിച്ചടിയായി. കൂടാതെ വാഷിംഗ്ടൺ സുന്ദർ, ഹർഷ ദുബെ, ഷഹബാസ് അഹമ്മദ് തുടങ്ങിയ യുവ ഓൾറൗണ്ടർമാർക്ക് ലോകകപ്പിന് മുന്നോടിയായി കൂടുതൽ അവസരങ്ങൾ നൽകാനാണ് ബോർഡ് ലക്ഷ്യമിടുന്നത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക