മത്സരത്തിലെ താരമായി തെരഞ്ഞെടുക്കപ്പെട്ട ശേഷം വികാരാധീനനായി സഞ്ജു സാംസണ്; ഞാന് സ്വപ്നം കണ്ട ഇന്നിംഗ്സെന്ന് മലയാളി താരം
Synopsis
ടി20 ലോകകപ്പില് വെസ്റ്റ് ഇന്ഡീസിനെതിരെ 50 പന്തില് 97* റണ്സ് നേടിയ സഞ്ജു സാംസണിന്റെ മികവില് ഇന്ത്യ സെമി ഫൈനലില് പ്രവേശിച്ചു.
കൊല്ക്കത്ത: ടി20 ലോകകപ്പില് വെസ്റ്റ് ഇന്ഡീസിനെതിരെ നിര്ണായക മത്സരത്തില് ഇന്ത്യയെ വിജയത്തിലേക്ക് നയിച്ചിരുന്നു സഞ്ജു സാംസണ്. 50 പന്തില് പുറത്താവാതെ സഞ്ജു നേടിയ 97 റണ്സാണ് ഇന്ത്യക്ക് സെമി ഫൈനല് സ്ഥാനം നല്കിയത്. നാല് സിക്സും 12 ഫോറും ഉള്പ്പെടുന്നതായിരുന്നു സഞ്ജുവിന്റെ ഇന്നിംഗ്സ്. മത്സരത്തിലെ താരവും സഞ്ജുവായിരുന്നു. അവസാന ഓവറില് ഏഴ് റണ്സാണ് ഇന്ത്യക്ക് ജയിക്കാന് വേണ്ടിയിരുന്നു. റൊമാരിയോ ഷെപ്പേര്ഡിന്റെ ആദ്യ പന്ത് തന്നെ സഞ്ജു സിക്സര് പറത്തി. പിന്നാലെ ഫോറും. ഇന്ത്യക്ക് അഞ്ച് വിക്കറ്റ് ജയം.
മത്സരത്തിന് ശേഷം സഞ്ജു തന്റെ സന്തോഷം പങ്കുവച്ചു. സഞ്ജുവിന്റെ വാക്കുകള്... ''ലോകം മുഴുവന് ഞാനായതായി തോന്നുന്നു. കളിക്കാന് തുടങ്ങിയ ദിവസം മുതല്, രാജ്യത്തിനായി കളിക്കാന് സ്വപ്നം കണ്ട ദിവസം മുതല്, ഞാന് കാത്തിരുന്ന ദിവസമാണിത്. ഞാന് കടപ്പെട്ടിരിക്കും. എന്റെ യാത്രയില് ഒരുപാട് ഉയര്ച്ച താഴ്ചകള് ഉണ്ടായിരുന്നു. ഞാന് എന്നെത്തന്നെ സംശയിച്ചിരുന്നു. 'എന്ത് സംഭവിക്കും', 'എനിക്ക് സാധിക്കുമോ' എന്നൊക്കെ ചിന്തിച്ചിരുന്നു. പക്ഷെ ഞാന് വിശ്വസിക്കുന്നത് തുടര്ന്നു. ഇന്ന് എന്നെ അനുഗ്രഹിച്ചതിന് സര്വ്വശക്തനായ ദൈവത്തിന് നന്ദി പറയുന്നു. ഞാന് വളരെ സന്തോഷവാനാണ്.'' സഞ്ജു പറഞ്ഞു.
സഞ്ജു തുടര്ന്നു...''ഞാന് വളരെക്കാലമായി ഈ ഫോര്മാറ്റ് കളിക്കുന്നുണ്ട്. വിരാട് കോലി, രോരിത് ശര്മ തുടങ്ങിയ ഇതിഹാസങ്ങള് കളിക്കുന്നത് ഡഗ്ഔട്ടില് ഇരുന്ന് ഞാന് പഠിക്കാറുണ്ടായിരുന്നു. ഞാനൊരു കൂട്ടുകെട്ട് കെട്ടിപ്പടുക്കാന് ആഗ്രഹിച്ചു. ഞാന് ഇത്രയും മികച്ചൊരുകാര്യം ചെയ്യുമെന്ന് ഒരിക്കലും കരുതിയിരുന്നില്ല. എന്റെ ജീവിതത്തിലെ ഏറ്റവും മികച്ച ദിവസങ്ങളില് ഒന്നാണിത്. ആരാധകര് ഒരുപാട് പിന്തുണയും ഊര്ജ്ജവും നല്കുന്നുണ്ട്. ഞാന് പന്ത് കൃത്യമായി നിരീക്ഷിച്ച് ഷോട്ടുകള് കളിച്ചു. എന്നില്ത്തന്നെ വിശ്വസിച്ചു.'' പറഞ്ഞുനിര്ത്തി.
വെസ്റ്റ് ഇന്ഡീസിനെ അഞ്ച് വിക്കറ്റിന് തോല്പ്പിച്ചാണ് ഇന്ത്യ അവസാന നാലിലെത്തുന്നത്. ഇംഗ്ലണ്ടാണ് സെമിയില് ഇന്ത്യയുടെ എതിരാളി. കൊല്ക്കത്ത, ഈഡന് ഗാര്ഡന്സില് ടോസ് നഷ്ടപ്പെട്ട് ബാറ്റിംഗിനെത്തിയ വിന്ഡീസ് നിശ്ചിത ഓവറില് നാല് വിക്കറ്റ് നഷ്ടത്തില് 195 റണ്സാണ് നേടിയത്. 25 പന്തില് 40 റണ്സ് നേടിയ റോസ്റ്റണ് ചേസാണ് വിന്ഡീസിന്റെ ടോപ് സ്കോറര്. ഇന്ത്യക്ക് വേണ്ടി ജസ്പ്രിത് ബുമ്ര രണ്ട് വിക്കറ്റ് വീഴ്ത്തി. മറുപടി ബാറ്റിംഗില് ഇന്ത്യ 19.2 ഓവറില് അഞ്ച് വിക്കറ്റ് നഷ്ടത്തില് ലക്ഷ്യം മറികടന്നു.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!