കോലിക്കും രോഹിത്തിനും അടുത്ത മുട്ടൻ പണിയുമായി അജിത് അഗാര്ക്കര്, ബിസിസിഐ വാര്ഷിക കരാറില് പൊളിച്ചെഴുത്തിന് നിർദേശം
Synopsis
പുതിയ പരിഷ്കാരം അനുസരിച്ച് എ, ബി, സി എന്നിങ്ങനെ മൂന്ന് വിഭാഗങ്ങളില് മാത്രമായിരിക്കും കളിക്കാര്ക്ക് കരാര് നല്കുകയെന്ന് ബിസിസിഐ വൃത്തങ്ങളെ ഉദ്ധരിച്ച് വാര്ത്താ ഏജന്സി റിപ്പോര്ട്ട് ചെയ്തു.
മുംബൈ: കളിക്കാര്ക്ക് നല്കുന്ന വാര്ഷിക കരാറുകള് പൊളിച്ചെഴുതാൻ ബിസിസിഐ. വാര്ഷിക കരാറില് നിലവിലുള്ള എ പ്ലസ് വിഭാഗം ഒഴിവാക്കാനാണ് അജിത് അഗാര്ക്കറുടെ നേതൃത്വത്തിലുള്ള സെലക്ഷന് കമ്മിറ്റി ബിസിസിഐക്ക് നിര്ദേശം നല്കിയിരിക്കുന്നത്. ഇത് നടപ്പിലായാല് വിരാട് കോലി, രോഹിത് ശര്മ, ജസ്പ്രീത് ബുമ്ര, രവീന്ദ്ര ജഡേജ എന്നിവര്ക്ക് എ പ്ലസ് കരാര് നഷ്ടമാവും. മൂന്ന് ഫോര്മാറ്റിലും ടീമില് സ്ഥാനമുറപ്പുള്ള താരങ്ങൾക്കാണ് ഏഴ് കോടി രൂപ വാര്ഷിക പ്രതിഫലമുള്ള എ പ്ലസ് കരാർ ബിസിസിഐ നല്കുന്നത്.
ഇതില് വിരാട് കോലിയും രോഹിത് ശര്മയും ടെസ്റ്റില് നിന്നും ടി20യില് നിന്നും രവീന്ദ്ര ജഡേജ ടി20യില് നിന്നും 2024ല് വിരമിച്ചിരുന്നു. നിലവില് കോലിയും രോഹിത്തും ഏകദിനങ്ങളിലും ജഡേജ ഏകദിനങ്ങളിലും ടെസ്റ്റിലും മാത്രമാണ് ഇന്ത്യക്ക് കളിക്കുന്നത്. എ പ്ലസ് കരാറിലുള്ള ജസ്പ്രീത് ബുമ്രയാകട്ടെ പരിക്കിന്റെ ഭീഷണിയുള്ളതിനാല് തെരഞ്ഞെടുത്ത മത്സരങ്ങളില് മാത്രമാണ് മൂന്ന് ഫോര്മാറ്റിലുമായി കളിക്കുന്നത്. ഈ സാഹചര്യത്തിലാണ് വാര്ഷിക കരാറുകളില് സമഗ്ര പരിഷ്കാരത്തിന് ബിസിസിഐ തയാറെടുക്കുന്നത് എന്നാണ് സൂചന.
പുതിയ പരിഷ്കാരം അനുസരിച്ച് എ, ബി, സി എന്നിങ്ങനെ മൂന്ന് വിഭാഗങ്ങളില് മാത്രമായിരിക്കും കളിക്കാര്ക്ക് കരാര് നല്കുകയെന്ന് ബിസിസിഐ വൃത്തങ്ങളെ ഉദ്ധരിച്ച് വാര്ത്താ ഏജന്സി റിപ്പോര്ട്ട് ചെയ്തു. നിലവില് എ വിഭാഗങ്ങളിലുള്ള താരങ്ങള്ക്ക് അഞ്ച് കോടി രൂപയും ബി വിഭാഗത്തിലുള്ളവര്ക്ക് മൂന്ന് കോടിയും സി വിഭാഗത്തിലുള്ളവര്ക്ക് ഒരു കോടി രൂപയുമാണ് വാര്ഷിക പ്രതിഫലം. എ കാറ്റഗറിയില് രോഹിത്തിനെയും കോലിയെയും ബുമ്രയെയും ഉള്പ്പെടുത്തുമ്പോള് ടെസ്റ്റ്, ഏകദിന നായകനും ബിസിസിഐയുടെ പോസ്റ്റര് ബോയിയുമായി ശുഭ്മാന് ഗില്ലിനെയും എ കാറ്റഗറിയിലേക്ക് ഉയര്ത്തുമെന്നാണ് കരുതുന്നത്.
ഏഷ്യാനെറ്റ് ന്യൂസ് ലൈവ് കാണാന് ഇവിടെ ക്ലിക് ചെയ്യുക
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!