ആദ്യ മത്സരത്തിനിറങ്ങിയതിന് പിന്നാലെ ചരിത്രംകുറിച്ച് വിരാട് കോലി, ഐപിഎല്ലിൽ മറ്റൊരു താരത്തിനുമില്ലാത്ത അപൂർവ നേട്ടം

2008 ഏപ്രിൽ 18-ന് ചിന്നസ്വാമി സ്റ്റേഡിയത്തിൽ കൊൽക്കത്ത നൈറ്റ് റൈഡേഴ്സിനെതിരെ ആർസിബിക്കായി അരങ്ങേറ്റം കുറിച്ച കോലി, ഇന്നും അതേ ടീമിനായി തന്നെയാണ് കളിക്കുന്നത്.

ബെംഗളൂരു: ഐപിഎല്ലിന്‍റെ പത്തൊമ്പതാം സീസണ് സണ്‍റൈസേഴ്സ് ഹൈദരാബാദ്-റോയല്‍ ചലഞ്ചേഴ്സ് ബെംഗളൂരു പോരാട്ടത്തോടെ തുടക്കമായപ്പോള്‍ ചരിത്രനേട്ടം സ്വന്തമാക്കി ആര്‍സിബി താരം വിരാട് കോലി. ചിന്നസ്വാമി സ്റ്റേഡിയത്തിൽ സൺറൈസേഴ്സ് ഹൈദരാബാദിനെതിരെ ഗ്രൗണ്ടിലിറങ്ങിയതോടെ ഐപിഎല്ലിലെ 19 സീസണുകളിലും കളിക്കുന്ന ആദ്യ താരമെന്ന അപൂർവ്വ നേട്ടമാണ് കോലി സ്വന്തമാക്കിയത്.

2008 ഏപ്രിൽ 18-ന് ചിന്നസ്വാമി സ്റ്റേഡിയത്തിൽ കൊൽക്കത്ത നൈറ്റ് റൈഡേഴ്സിനെതിരെ ആർസിബിക്കായി അരങ്ങേറ്റം കുറിച്ച കോലി, ഇന്നും അതേ ടീമിനായാണ് കളിക്കുന്നത്. ഐപിഎൽ ചരിത്രത്തിൽ 19 വർഷമായി ഒരേ ടീമിനായി മാത്രം കളിക്കുന്ന ഏക താരവും കോലി മാത്രമാണ്.

18 സീസണുകളിലെ കാത്തിരിപ്പിനൊടുവില്‍ കഴിഞ്ഞ വർഷം കരിയറിലെ ആദ്യ ഐപിഎൽ കിരീടം ചൂടിയ കോലിക്ക് കീഴടങ്ങാത്ത റെക്കോർഡുകൾ ലീഗിലില്ല. ഐപിഎല്ലില്‍ ഏറ്റവും കൂടുതല്‍ റണ്‍സ്(8661)ഏറ്റവും കൂടുതൽ സെഞ്ചുറികൾ(8), ഏറ്റവും കൂടുതൽ അർധസെഞ്ചുറികൾ(63), ഒരു സീസണിലെ കൂടുതൽ റൺസ് (973-2016-ൽ), കൂടുതൽ ബൗണ്ടറികൾ (1062), ഒരു ടീമിനെതിരെ കൂടുതൽ റൺസ്(1159- പഞ്ചാബ് കിംഗ്‌സിനെതിരെ), ഒരു സ്റ്റേഡിയത്തിൽ കൂടുതൽ റൺസ്(3202 -ചിന്നസ്വാമിയിൽ) എന്നിവയെല്ലാം കോലിയുടെ പേരിലാണ്.

ആർസിബിയുടെ വിലയേറിയ താരമായ കോലി 2008-ൽ വെറും 12 ലക്ഷം രൂപയ്ക്കാണ് ടീമിലെത്തിയത്. ഇപ്പോള്‍ 21 കോടി രൂപയാണ് കോലിയുടെ പ്രതിഫലം. രജത് പാട്ടിദാറിന്‍റെ ക്യാപ്റ്റൻസിക്ക് കീഴിൽ കഴിഞ്ഞ സീസണിൽ 657 റൺസ് അടിച്ചുകൂട്ടിയ കോലി റൺവേട്ടക്കാരിൽ മുന്നിലായിരുന്നു. സൺറൈസേഴ്സ് ഹൈദരാബാദിനെതിരെയും മികച്ച റെക്കോർഡാണ് കോലിക്കുള്ളത്. 24 മത്സരങ്ങളിൽ നിന്നായി ഒരു സെഞ്ചുറിയും 5 അർദ്ധസെഞ്ചുറിയും അടക്കം 805 റൺസ് കോലി ഹൈദരാബാദിനെതിരെ നേടിയിട്ടുണ്ട്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക