'ഈ ലോകകപ്പിന്‍റെ താരമാകാന്‍ എന്തുകൊണ്ടും നീ അര്‍ഹന്‍', ലോകകപ്പ് ഹീറോ സഞ്ജുവിനെ വാഴ്ത്തി വിരാട് കോലി

ടി20 ലോകകപ്പിൽ ഇന്ത്യയുടെ മൂന്നാം കിരീട നേട്ടത്തിന് ശേഷം ടൂർണമെൻ്റിലെ താരമായി തിരഞ്ഞെടുക്കപ്പെട്ട സഞ്ജുവിൻ്റെ പ്രകടനത്തെ അഭിനന്ദിച്ചും 'ചേട്ടാ' എന്ന് അഭിസംബോധന ചെയ്തും വിരാട് കോലി.

ലണ്ടൻ: ടി20 ലോകകപ്പിൽ ഇന്ത്യ മൂന്നാം കിരീടം നേടി ചരിത്രം തിരുത്തിയപ്പോള്‍ ടൂര്‍ണമെന്‍റിലെ താരമായി തെരഞ്ഞെടുക്കപ്പെട്ടത് മലയാളി താരം സഞ്ജു സാംസണായിരുന്നു. കിരീട നേട്ടത്തിനുശേഷം സഞ്ജുവിനെ അഭിനന്ദിച്ച് വിരാട് കോലിയിട്ട ഇന്‍സ്റ്റഗ്രാം സ്റ്റോറിയാണ് ശ്രദ്ധേയമായത്.

ടൂർണമെന്‍റിന്‍റെ താരമാകാന്‍ ഏറ്റവും അർഹനായ സഞ്ജു സാംസൺ അതിശയിപ്പിക്കുന്ന പ്രകടനമാണ് പുറത്തെടുത്തത്. ടീമിന് ഏറ്റവും ആവശ്യമുള്ള ഘട്ടത്തിൽ തന്നെ നീ അവസരത്തിനൊത്തുയര്‍ന്ന് മികച്ച പ്രകടനം പുറത്തെടുത്തു. നിന്‍റെ നേട്ടത്തിൽ ഒരുപാട് സന്തോഷം, ചേട്ടാ എന്നായിരുന്നു കോലി ഇന്‍സ്റ്റഗ്രാ സ്റ്റോറിയായി കുറിച്ചത്. ടി20 ലോക കപ്പ് ഫൈനലിലും സെമിയിലും വെര്‍ച്വല്‍ ക്വാര്‍ട്ടര്‍ ഫൈനലായി മാറിയ വെസ്റ്റ് ഇന്‍ഡീസിനെതിരായ അവസാന സൂപ്പര്‍ 8 മത്സരത്തിലും ഇന്ത്യയുടെ ടോപ് സ്കോററായിരുന്നു സഞ്ജു. ലോകകപ്പ് റണ്‍വേട്ടയില്‍ വെറും അഞ്ച് മത്സരങ്ങള്‍ കളിച്ചാണ് 321 റണ്‍സുമായി സഞ്ജു ഇന്ത്യയുടെ ടോപ് സ്കോററായത്.

ടി20 ലോകകപ്പിൽ മൂന്നാം കിരീടം നേടിയ ഇന്ത്യൻ ടീമിനെ എക്സ് പോസ്റ്റില്‍ കോലി അഭിനന്ദിച്ചിരുന്നു.അഹമ്മദാബാദിൽ ഉജ്ജ്വല വിജയവുമായി ഇന്ത്യ ചാമ്പ്യൻമാരായിരിക്കുന്നു. ടൂർണമെന്‍റിലുടനീളം നമ്മൾ കാഴ്ചവെച്ച ആക്രമണ ക്രിക്കറ്റിന് മുന്നിൽ എതിരാളികൾക്ക് മറുപടിയുണ്ടായിരുന്നില്ല. കഠിനമായ സാഹചര്യങ്ങളിലും പതറാതെ പോരാടാനും വീണ്ടും ലോകജേതാക്കളാകാനും നമ്മുടെ താരങ്ങള്‍ കാട്ടിയ മനക്കരുത്ത് അതിശയിപ്പിക്കുന്നതാണ്. ഈ നേട്ടം കൈവരിച്ച എല്ലാ കളിക്കാർക്കും മാനേജ്‌മെന്‍റിലെ എല്ലാ അംഗങ്ങൾക്കും അഭിനന്ദനങ്ങൾ. ജയ് ഹിന്ദ് എന്നായിരുന്നു കോലി കുറിച്ചത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക