ഇന്ത്യക്കെതിരായ പരമ്പരക്ക് മുമ്പ് വെസ്റ്റ് ഇന്‍ഡീസിന് കനത്ത തിരിച്ചടി, കളിക്കാരുടെ പ്രതിഫലം വെട്ടിക്കുറച്ചു

ആഭ്യന്തര താരങ്ങളുടെ കരാർ കാലാവധി ഏഴ് മാസമായി ചുരുക്കിയെങ്കിലും അന്താരാഷ്ട്ര മത്സരങ്ങളിൽ കളിക്കുന്ന താരങ്ങളുടെ കരാർ 12 മാസമായി തന്നെ തുടരും.

ജമൈക്ക: വെസ്റ്റ് ഇൻഡീസ് ക്രിക്കറ്റിലെ സാമ്പത്തിക പ്രതിസന്ധി കൂടുതൽ രൂക്ഷമാകുന്നു. സാമ്പത്തിക ഭാരം കുറയ്ക്കുന്നതിന്‍റെ ഭാഗമായി വാര്‍ഷിക കരാറിലുള്ള കളിക്കാരുടെ പ്രതിഫലം 25 ശതമാനം വെട്ടിക്കുറച്ചതായി ക്രിക്കറ്റ് വെസ്റ്റ് ഇൻഡീസ് പ്രഖ്യാപിച്ചു. ഇതിന് പുറമെ, ഇത്തവണത്തെ പുരുഷന്മാരുടെ സൂപ്പർ50 ടൂർണമെന്‍റും വനിതകളുടെ ടി20 ബ്ലേസും റദ്ദാക്കാനും ബോർഡ് തീരുമാനിച്ചു.

ആഭ്യന്തര താരങ്ങളുടെ കരാർ കാലാവധി ഏഴ് മാസമായി ചുരുക്കിയെങ്കിലും അന്താരാഷ്ട്ര മത്സരങ്ങളിൽ കളിക്കുന്ന താരങ്ങളുടെ കരാർ 12 മാസമായി തന്നെ തുടരും. സാമ്പത്തികവും മത്സരപരവുമായ കടുത്ത വെല്ലുവിളികൾ നേരിടുന്നതിനായി എടുത്ത അനിവാര്യമായ നടപടിയാണിതെന്ന് ചീഫ് എക്സിക്യൂട്ടീവ് ക്രിസ് ഡെഹ്റിംഗ് വ്യക്തമാക്കി.സാമ്പത്തിക സ്ഥിരത കൈവരിക്കാനുള്ള നിർബന്ധിത ഘട്ടത്തിലൂടെയാണ് നമ്മൾ കടന്നുപോകുന്നത്. കളിക്കാരുടെ യാത്ര, താമസം എന്നിവ വലിയ ചിലവാണ് വരുത്തിവെക്കുന്നത്. സ്ഥിതിഗതികൾ മനസിലാക്കി ബോർഡിനോട് സഹകരിക്കുന്ന കളിക്കാരുടെയും വെസ്റ്റ് ഇൻഡീസ് പ്ലെയേഴ്സ് അസോസിയേഷന്‍റെയും നിലപാട് അഭിനന്ദനാർഹമാണെന്നും ക്രിസ് ഡെഹ്റിംഗ് പറഞ്ഞു.

കഴിഞ്ഞ 15 വർഷത്തിനിടെ 80 മില്യൺ ഡോളറിലധികമാണ് വിമാന യാത്രകൾക്കായി വിൻഡീസ് ബോർഡ് ചെലവഴിച്ചത്. നിലവിലെ പ്രതിസന്ധി പരിഹരിക്കാൻ ഐസിസി അനുവദിച്ച 16 മില്യൺ ഡോളർ (ഏകദേശം 153 കോടി രൂപ) വായ്പ ലഭിക്കുന്നതിനും ബോർഡിന് ചില കർശന സാമ്പത്തിക ലക്ഷ്യങ്ങൾ കൈവരിക്കേണ്ടതുണ്ട്. റദ്ദാക്കിയ ടൂർണമെന്‍റുകൾക്ക് പകരം 2028 ലോസ് ഏഞ്ചൽസ് ഒളിമ്പിക്സിനായുള്ള യോഗ്യതാ മത്സരങ്ങൾ സംഘടിപ്പിക്കാനാണ് വിൻഡീസ് ക്രിക്കറ്റ് ബോർഡിന്റെ പദ്ധതി.

ഒളിമ്പിക്സിൽ വെസ്റ്റ് ഇൻഡീസിന് ഒരൊറ്റ ടീമായി മത്സരിക്കാൻ സാധിക്കാത്തതിനാൽ ഓരോ കരീബിയൻ രാജ്യങ്ങൾക്കും വെവ്വേറെ യോഗ്യതാ റൗണ്ട് മത്സരങ്ങൾ നടത്തേണ്ടതുണ്ട്. കുറഞ്ഞ കരാർ തുക കാരണം ഇതിനകം തന്നെ പ്രമുഖ വിൻഡീസ് താരങ്ങൾ ദേശീയ ടീമിനേക്കാൾ ആഗോള ടി20 ലീഗുകളിൽ കളിക്കാനാണ് മുൻഗണന നൽകുന്നത്. പ്രതിഫലം ഇനിയും വെട്ടിക്കുറച്ചതോടെ കൂടുതൽ കളിക്കാർ വാര്‍ഷിക കരാർ ഉപേക്ഷിക്കാൻ സാധ്യതയേറി, ഇത് വെസ്റ്റ് ഇൻഡീസ് ക്രിക്കറ്റിന്‍റെ ഭാവിയെ കൂടുതൽ പ്രതിസന്ധിയിലാക്കും.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക