1000 രൂപയ്ക്ക് ദീപാവലി സ്വീറ്റ്സ് ഓർഡർ ചെയ്തു, ഓൺലൈൻ തട്ടിപ്പിൽ നഷ്ടമായത് 2.4 ലക്ഷം രൂപ

ആയിരം രൂപയ്ക്ക് സ്വീറ്റ്സ് വാങ്ങാൻ ശ്രമിച്ച് 2.4 ലക്ഷം രൂപ നഷ്ടമായതായി പരാതി...

മുംബൈ : ദീപാവലിക്ക് മധുരപലഹാരങ്ങൾ ഓർഡർ ചെയ്യുന്നതിനിടെ 49 കാരിക്ക് ഓൺലൈൻ തട്ടിപ്പിൽ നഷ്ടമായത് 2.4 ലക്ഷം രൂപ. സബർബൻ അന്ധേരി നിവാസിയായ പൂജ ഷാ ഞായറാഴ്ച ഒരു ഫുഡ് ഡെലിവറി ആപ്പിൽ മധുരപലഹാരങ്ങൾ ഓർഡർ ചെയ്തതോടെയാണ് പണം തട്ടിപ്പിനുള്ള കെണിയൊരുങ്ങിയത്.

ഓൺലൈനായി 1,000 രൂപ അടയ്ക്കാനാണ് ശ്രമിച്ചതെങ്കിലും ആ ശ്രമം പരാജയപ്പെട്ടു. തുടർന്ന് ഓൺലൈനിൽ മധുരപലഹാരക്കടയുടെ നമ്പർ കണ്ടെത്തി. ഈ നമ്പറിൽ വിളിച്ച് ഓർഡർ പറഞ്ഞു. മറുവശത്തുള്ള ആൾ പൂജയുടെ പക്കലുള്ള ക്രെഡിറ്റ് കാർഡ് നമ്പറും ഫോണിൽ ലഭിച്ച ഒടിപിയും പങ്കിടാൻ ആവശ്യപ്പെട്ടു. അവരാകട്ടെ  കാർഡ് വിവരങ്ങളും ഒടിപിയും പങ്കിട്ടു. 

ഏതാനും മിനിറ്റുകൾക്കുള്ളിൽ പൂജ ഷായുടെ അക്കൗണ്ടിൽ നിന്ന് 2,40,310 രൂപ നഷ്ടമായി. ഉടനെ പൂജാ ഷാ ഓഷിവാര പൊലീസ് സ്‌റ്റേഷനിൽ പരാതി നൽകി. പൊലീസിന്റെ ഇടപെടലോടെ കൂടുതൽ തുക നഷ്ടമാകുന്നത് തടയാൻ സാധിച്ചു. 2,27,205 രൂപ കൂടി നഷ്ടമാകുന്നത് പൊലീസ് തടഞ്ഞു. സംഭവത്തിൽ അന്വേഷണം പുരോഗമിക്കുകയാണെന്ന് പൊലീസ് ഉദ്യോഗസ്ഥർ പറഞ്ഞു.