100 അടുപ്പിച്ച ദിനങ്ങൾ, 24x7 സ്ട്രീമിം​ഗ്, പ്രേക്ഷകർക്ക് നന്ദി: ലൈവ് അവസാനിപ്പിച്ച് ബി​ഗ് ബോസ് സീസൺ 7

ബിഗ് ബോസ് മലയാളം സീസൺ 7-ന്റെ വിജയിയെ നാളെ നടക്കുന്ന ഗ്രാൻഡ് ഫിനാലെയിൽ പ്രഖ്യാപിക്കും.അനുമോൾ, അനീഷ്, ഷാനവാസ്, അക്ബർ, നെവിൻ എന്നിവരാണ് അവസാന അഞ്ചിൽ മത്സരിക്കുന്നത്. നാളെ വൈകിട്ട് 7 മണി മുതൽ പ്രേക്ഷകർക്ക് ഫിനാലെ കാണാം.

മൂന്ന് മാസത്തോളം നീണ്ട കാത്തിരിപ്പിന് നാളെ വിരാമമാകുകയാണ്. ബി​ഗ് ബോസ് മലയാളം സീസൺ 7ന്റെ ടൈറ്റിൽ ആര് നേടുമെന്ന് നാളെ അറിയാം. അനുമോൾ, അനീഷ്, ഷാനവാസ്, അക്ബർ, നെവിൻ എന്നിവരാണ് ടോപ് 5ൽ എത്തിയിരിക്കുന്നത്. ഇന്ന് ബി​ഗ് ബോസ് സീസൺ 7ന്റെ അവസാന എപ്പിസോഡ് ആയിരുന്നു. കഴിഞ്ഞ 100 ദിവസത്തോട് അടുപ്പിച്ച് പ്രേക്ഷകർ കണ്ടുകൊണ്ടിരുന്ന 24x7 ഡെഫേർഡ് ലൈവ് സ്ട്രീമിം​ഗ് അവസാനിച്ചിരിക്കുകയാണ്. ഇക്കാര്യം പറഞ്ഞ് പ്രേക്ഷകർക്ക് നന്ദി പറഞ്ഞായിരുന്നു ബി​ഗ് ബോസ് ഇന്ന് അവസാന എപ്പിസോ‍ഡ് അവസാനിപ്പിച്ചത്.

"ഏഴിന്റെ പണിയുടെ ബി​ഗ് ബോസ് മലയാളം സീസൺ 7 തുടക്കം മുതൽ ഈ നിമിഷം വരെ ജിയോ ​ഹോട്സ്റ്റാറിലൂടെ 24 മണിക്കൂറും നിങ്ങളെ കണ്ടു കൊണ്ടിരുന്ന ലോകമെമ്പാടുമുള്ള ലക്ഷക്കണക്കിന് പ്രേക്ഷരുണ്ട്. ഓരോ ദിവസവും അത് കൂടി കൊണ്ടേയിരുന്നു. ടെലിവിഷനിലെ ഒന്നര മണിക്കൂർ മാത്രം ​ദൈർഘ്യമുള്ള എപ്പിസോഡുകളിൽ ഉൾപ്പെടുത്താനാകാത്ത നിങ്ങളുടെ കളിചിരി തമാശകളും ഇണക്കങ്ങളും പിണക്കങ്ങളും സന്തോഷവും സങ്കടവുമെല്ലാം ജിയോ ഹോട്സ്റ്റാറിലൂടെയാണ് 24 മണിക്കൂറും പ്രേക്ഷകർ കണ്ടത്. അതിൽ പലതും സോഷ്യൽ മീഡിയയിൽ വലിയ തരം​ഗമായി മാറുകയും ചെയ്തു. അത്തരത്തിൽ ഒരു മികച്ച കാഴ്ചവിരുന്ന് പ്രേക്ഷകർക്ക് സമ്മാനിക്കാനായതിൽ നിങ്ങൾക്ക് അഭിമാനിക്കാം. ഇനി ഫിനാലെ മാത്രം ബാക്കി. ഇത്രയും നാൾ 24 മണിക്കൂറും നിങ്ങളെ കണ്ടുകൊണ്ടിരുന്ന പ്രേക്ഷകര്‍ക്ക് വേണ്ടിയുള്ള ജിയോ ഹോട്സ്റ്റാർ സ്ട്രീമിം​ഗ് ഇതോടെ അവസാനിക്കുകയാണ്. എല്ലാ പ്രേക്ഷകർക്കും ഒരായിരം നന്ദി. എല്ലാവർക്കും വിജയാശംസകൾ", എന്നായിരുന്നു ബി​ഗ് ബോസിന്റെ വാക്കുകൾ. ടോപ് 5 മത്സരാർത്ഥികളും പ്രേക്ഷകരോട് നന്ദി പറഞ്ഞു.

ബി​ഗ് ബോസ് പ്രേക്ഷകരെ സംബന്ധിച്ച് ഏറെ വൈകാരികമായ നിമിഷമായിരുന്നു ഇത്. നിലവിൽ ജിയോ ഹോട്സ്റ്റാറിൽ സ്ട്രീമിം​ഗ് ചെയ്യുന്നത് കഴിഞ്ഞ ദിവസങ്ങളിലെ ഭാ​ഗങ്ങളാണ്. നാളെ 7 മണി മുതൽ ​ഗ്രാന്റ് ഫിനാലെ പ്രേക്ഷകർക്ക് കാണാനാകും. അഖിൽ മാരാർ വിജയിയായ ബി​ഗ് ബോസ് സീസൺ 5 മുതലായിരുന്നു ലൈവ് സ്ട്രീമിം​ഗ് ആരംഭിച്ചത്.