സിനിമാ സ്വപ്‍നങ്ങളില്‍ നിന്ന് ഡിജിറ്റല്‍ മാര്‍ക്കറ്റിം​ഗിലേക്ക്; ബിഗ് ബോസിലേക്ക് നോബി ബിനു

ബിഗ് ബോസ് മലയാളം സീസൺ 8 ലെ മത്സരാർത്ഥികളിലൊരാളായി എത്തിയിരിക്കുകയാണ് നോബി ബിനു.

ബി​ഗ് ബോസ് മലയാളം സീസണ്‍ 8 ന് ഇന്ന് ആരംഭം കുറിക്കുമ്പോള്‍ പ്രേക്ഷകരെ ആവേശത്തിലാഴ്ത്തുന്നതാണ് മത്സരാര്‍ഥികളുടെ പ്രഖ്യാപനം. ഏറെ പ്രശസ്തരും എന്നാല്‍ സാധാരണ പ്രേക്ഷകര്‍ക്കിടയില്‍ അത്രയധികം അറിയപ്പെടാത്ത ആളുകളും ഈ സീസണില്‍ മത്സരാര്‍ഥികളായി എത്തുന്നുണ്ട്. കോമണര്‍ ആയി എത്തിയ അനീഷ് ആണ് കഴിഞ്ഞ തവണ കപ്പ് ഉയര്‍ത്തിയത് എന്നതിനാല്‍ ഇക്കുറി ഒരു മത്സരാര്‍ഥിയെയും ആരും വില കുറച്ച് കാണില്ലെന്ന് ഉറപ്പ്. സീസണ്‍ 8 ഹൗസി പൊലിപ്പിക്കാനെത്തുന്ന മത്സരാര്‍ഥികളിലൊരാള്‍ നോബി ബിനു ആണ്. സിനിമയോടും അഭിനയത്തോടുമൊക്കെ അഭിനിവേശമുള്ള നോബിയുടെ ഇപ്പോഴത്തെ പ്രവര്‍ത്തന മേഖല പക്ഷേ തികച്ചും വ്യത്യസ്തമായ മറ്റൊന്നാണ്.

ഡിജിറ്റല്‍ മാര്‍ക്കറ്റിം​ഗും കോണ്ടെന്‍റ് ക്രിയേഷനുമൊക്കെ അടങ്ങുന്ന കര്‍മ്മ മേഖലയാണ് അത്. മലയാള സിനിമാ മേഖലയില്‍ ഏഴ് വര്‍ഷത്തോളം വിവിധ റോളുകളില്‍ നിന്ന ശേഷമാണ് മാര്‍ക്കറ്റിം​ഗിലേക്ക് നോബി എത്തുന്നത്. ഈ രണ്ട് മേഖലകളോടും അദ്ദേഹത്തിന് താല്‍പര്യമുണ്ടാക്കിയ ഘടകം ഒന്ന് തന്നെയാണ്- കഥ പറയാനുള്ള ആ​ഗ്രഹം. കഥപറച്ചിലിനെ മറ്റൊരു രീതിയിലും ഉപയോ​ഗപ്പെടുത്താമെന്ന ആശയമാണ് ഡിജിറ്റല്‍ മാര്‍ക്കറ്റിം​ഗിന്‍റെ പുതുസാധ്യതകള്‍ അന്വേഷിക്കാന്‍ നോബിയെ പ്രേരിപ്പിച്ചത്. അദ്ദേഹത്തിന് സ്വന്തമായി ഒരു ഡിജിറ്റല്‍ മാര്‍ക്കറ്റിം​ഗ് ഏജന്‍സിയും ഇപ്പോള്‍ ഉണ്ട്, ഡിഎംഡബ്ല്യു എന്ന പേരില്‍.

കഥപറച്ചിലിനോടും സിനിമയോടും മാര്‍ക്കറ്റിം​ഗിനോടുമൊക്കെ ഒരേപോലെ താല്‍പര്യമുള്ള, സോഷ്യല്‍ മീഡിയ അല്‍​ഗോരിതങ്ങളെ നന്നായി മനസിലാക്കിയിട്ടുള്ള നോബി ഇത്തവണത്തെ ബി​ഗ് ബോസില്‍ ശ്രദ്ധ നേടുന്ന ഒരു മത്സരാര്‍ഥിയായി മാറാന്‍ എല്ലാ സാധ്യതകളുമുണ്ട്. സ്റ്റോറി ടെല്ലിം​ഗ് ഏറ്റവും നന്നായി ചെയ്യാന്‍ ശേഷിയുള്ളവരെ മിക്കപ്പോരും പ്രേക്ഷകര്‍ പിന്തുണച്ചിട്ടുമുണ്ട്. അഥവാ ആ ​ഗുണം ഏറ്റവും ആവശ്യമായി വരുന്ന ഒടു ഇടം കൂടിയാണ് ബി​ഗ് ബോസ് ഹൗസ്. കാഴ്ചയില്‍ ബി​ഗ് സ്ക്രീനിലെ ഒരു ഹീറോ മെറ്റീരിയല്‍ ആയ നോബി ബി​ഗ് ബോസില്‍ ആരാധകരെ നേടുമോ എന്ന് കാത്തിരുന്ന് കാണാം.