'ആ റോൾ ചെയ്യേണ്ടിയിരുന്നത് ഞാൻ, ഭ്രമയു​ഗം മമ്മൂക്കയുടെ എക്സ്ട്രാ ഓർഡിനറി സിനിമ'; ആസിഫ് അലി

മമ്മൂട്ടി ആ കഥാപാത്രം ചെയ്യുമെന്ന് കരുതിയിരുന്നില്ലെന്നും അദ്ദേഹത്തിന്റെ മറ്റൊരു എക്സ്ട്രാ ഓർഡിനറി സിനിമയാകും ഭ്രമയു​ഗം എന്നും ആസിഫ്

മമ്മൂട്ടിയുടെ പിറന്നാൾ ദിനം സോഷ്യൽ മീഡിയയിൽ തരം​ഗമായൊരു ഫസ്റ്റ് ലുക്കുണ്ട്. ഹെറർ ത്രില്ലറായി ഒരുങ്ങുന്ന 'ഭ്രമയുഗ'ത്തിലേതായിരുന്നു അത്. സമീപകാലത്ത് വ്യത്യസ്ത കഥാപാത്രങ്ങളിലൂടെ അമ്പരപ്പിച്ചു കൊണ്ടിരിക്കുന്ന മമ്മൂട്ടിയുടെ അടുത്തൊരു മികച്ച കഥാപാത്രം ആകും ഭ്രമയു​ഗത്തിലേത് എന്ന് ഊട്ടി ഉറപ്പിക്കുന്ന തരത്തിലുള്ളതായിരുന്നു പോസ്റ്റര്‍‌. നെ​ഗറ്റീവ് ഷേഡുള്ളതാകും ഈ കഥാപാത്രം എന്ന് നേരത്തെ റിപ്പോർട്ടുകൾ വന്നതാണ്. ഫസ്റ്റ് ലുക്കോടെ അതിൽ ഏകദേശ സൂചനകളും ലഭിച്ചുകഴിഞ്ഞു. സിനിമാസ്വാകർ ഏറെ പ്രതീക്ഷയിൽ കാത്തിരിക്കുന്ന സിനിമയെ കുറിച്ച് നടൻ ആസിഫ് അലി പറഞ്ഞ കാര്യങ്ങളാണ് ഇപ്പോൾ ശ്രദ്ധനേടുന്നത്. 

ഭ്രമയു​ഗത്തിൽ അർജുൻ അശോകൻ ചെയ്യാനിരുന്ന കഥാപാത്രം താൻ ആയിരുന്നു ചെയ്യേണ്ടിയിരുന്നതെന്നും ഡേറ്റിന്റെ പ്രശ്നം കാരണം അതിന് സാധിച്ചില്ലെന്നും ആസിഫ് പറയുന്നു. ദ ന്യു ഇന്ത്യൻ എക്സ്പ്രസിനോട് ആയിരുന്നു നടന്റെ പ്രതികരണം. മമ്മൂട്ടി ആ കഥാപാത്രം ചെയ്യുമെന്ന് കരുതിയിരുന്നില്ലെന്നും അദ്ദേഹത്തിന്റെ മറ്റൊരു എക്സ്ട്രാ ഓർഡിനറി സിനിമയാകും ഭ്രമയു​ഗം എന്നും ആസിഫ് വ്യക്തമാക്കുന്നു. 

"സോ കോൾഡ് പരീക്ഷണ സിനിമകൾ എന്ന് പറയുന്നതിനോട് ഒരു പേടി വന്നിട്ടുണ്ട്. ആ പേടി റോഷാക്കിലൂടെ മാറ്റി തന്നൊരു ക്യാപ്റ്റൻസിയാണ് മമ്മൂക്ക. ഭ്രമയു​ഗത്തിൽ ഞാനായിരുന്നു അർജുൻ അശോകന്റെ കഥാപാത്രം ചെയ്യാനിരുന്നത്. പക്ഷേ ആദ്യം പറഞ്ഞ ഡേറ്റിൽ മാറ്റം വന്നപ്പോൾ എന്റെ ഡേറ്റ്സുമായി ക്ലാഷായി. ആ സിനിമയിൽ മമ്മൂക്കയുടെ ജഡ്ജ്മെന്റ് അവിശ്വസിനീയമാണ്. ഒരിക്കലും മമ്മൂക്ക ആ കഥാപാത്രം ചെയ്യുമെന്ന് ഞാൻ കരുതിയില്ല. മമ്മൂക്കയുടെ അടുത്ത എക്സ്ട്രാ ഓർഡിനറി സിനിമ ആയിരിക്കും അത്. മമ്മൂക്കയുടെ അവിശ്വസനീയമായ തിരഞ്ഞെടുപ്പുകൾ എപ്പോഴും പ്രചോദനം നൽകുന്നതാണ്", എന്നാണ് ആസിഫ് അലി പറഞ്ഞത്. 

ഏഷ്യാനെറ്റ് ന്യൂസ് തത്സമയ വാർത്തകൾ..