എം മുകുന്ദന്റെ തിരക്കഥ; 'ഓട്ടോറിക്ഷക്കാരന്റെ ഭാര്യ' ചിത്രീകരണം പൂര്ത്തിയായി
Synopsis
എം മുകുന്ദന് പൂര്ണ്ണമായും തിരക്കഥാ രചന നിര്വ്വഹിച്ചിരിക്കുന്ന ആദ്യ ചിത്രം
മലയാളത്തിന്റെ അനുഗ്രഹീത എഴുത്തുകാരന് എം മുകുന്ദന് (M Mukundan) ആദ്യമായി കഥയും തിരക്കഥയും സംഭാഷണവും ഒരുക്കുന്ന 'ഓട്ടോറിക്ഷക്കാരന്റെ ഭാര്യ' (Auto rickshawkkarante bharya) ചിത്രീകരണം പൂര്ത്തിയാക്കി. ബെന്സി പ്രൊഡക്ഷന്സിന്റെ ബാനറില് കെ വി അബ്ദുൾ നാസര് നിര്മ്മിച്ച് പ്രശസ്ത സംവിധായകന് ഹരികുമാര് (Harikumar) സംവിധാനം ചെയ്യുന്ന ചിത്രം താമസിയാതെ പ്രേക്ഷകരിലേക്കെത്തും. വര്ത്തമാനകാല സമൂഹം വളരെ ഗൗരവമോടെ ചര്ച്ച ചെയ്യുന്ന വിഷയമാണ് ചിത്രത്തിന്റെ പ്രമേയം. സ്ത്രീശാക്തീകരണം ഇതിവൃത്തമാക്കുന്ന സിനിമ 2016ല് മാതൃഭൂമി ആഴ്ചപ്പതിപ്പില് പ്രസിദ്ധീകരിച്ച എം മുകുന്ദന്റെ കഥയുടെ വികസിത രൂപമാണ്.
എം മുകുന്ദന്റെ രചനകളായ ദൈവത്തിന്റെ വികൃതികളും മദാമ്മയും നേരത്തെ ചലച്ചിത്രങ്ങളായിട്ടുണ്ടെങ്കിലും തിരക്കഥ പൂര്ണ്ണമായും അദ്ദേഹം തയ്യാറാക്കുന്ന ആദ്യ ചിത്രം ഓട്ടോറിക്ഷക്കാരന്റെ ഭാര്യയാണ്. "വളരെ രസകരമായി ഇരുപത് മിനിട്ടില് ചിത്രീകരിക്കാവുന്ന ഒരു കഥയാണ് ഈ സിനിമ. പക്ഷേ സമീപകാലത്തെ പല വിഷയങ്ങളെയും കോര്ത്തിണക്കിയാണ് ഒരു സിനിമയുടെ പൂര്ണ്ണതയിലേക്ക് ഈ ചിത്രത്തെ എത്തിച്ചിരിക്കുന്നത്. എല്ലാത്തരം പ്രേക്ഷകരെയും തൃപ്തിപ്പെടുത്തുന്ന ഒരു മനോഹരമായ കുടുംബചിത്രമാണ് ഈ സിനിമ. ഓട്ടോറിക്ഷക്കാരന്റെ ഭാര്യ സിനിമയാക്കാന് പുതുതലമുറയില് പെട്ട ഒത്തിരിപ്പേര് എന്നെ സമീപിച്ചതാണ്. പക്ഷേ പുതിയ ആള്ക്കാരെ വെച്ച് സിനിമ ചെയ്യാന് എനിക്ക് താല്പര്യമില്ലായിരുന്നു. അവരെ പ്രോത്സാഹിപ്പിക്കണമെന്ന നയമാണ് എനിക്ക്. പക്ഷേ അവരെ വെച്ച് ഇതുപോലൊരു സിനിമ ചെയ്യുന്നത് റിസ്ക്കാണ്. അതുകൊണ്ടാണ് ഹരികുമാര് എന്നെ സമീപിച്ചപ്പോള് ഞാന് സമ്മതിച്ചത്. അതുകൊണ്ടുതന്നെ വളരെ മികച്ച ഒരു സിനിമയാണ് ഇതിലൂടെ മലയാളികള്ക്ക് ലഭിക്കുന്നത്", എം മുകുന്ദന് പറയുന്നു.
മാഹിയിലും പരിസരപ്രദേശങ്ങളിലുമായി ചിത്രീകരിച്ച ഓട്ടോറിക്ഷക്കാരന്റെ ഭാര്യ അധികം വൈകാതെ പ്രേക്ഷകരിലേക്ക് എത്തും. സൂരാജ് വെഞ്ഞാറമൂടും ആൻ അഗസ്റ്റിനുമാണ് ചിത്രത്തിലെ കേന്ദ്ര കഥാപാത്രങ്ങളെ അവതരിപ്പിക്കുന്നത്. കൈലാഷ്, ജനാർദ്ദനൻ, സ്വാസിക വിജയ്, ദേവി അജിത്ത്, നീന കുറുപ്പ്, മനോഹരി ജോയ്, ബേബി അലൈന ഫിദൽ എന്നിവരാണ് മറ്റ് അഭിനേതാക്കള്. ഛായാഗ്രഹണം അഴകപ്പൻ, പ്രഭാവർമ്മയുടെ വരികൾക്ക് ഔസേപ്പച്ചൻ സംഗീതം പകരുന്നു. എഡിറ്റിംഗ് അയൂബ് ഖാൻ, പ്രൊഡക്ഷൻ കൺട്രോളർ ഷാജി പട്ടിക്കര, കലാസംവിധാനം ത്യാഗു തവനൂർ, മേക്കപ്പ് റഹിം കൊടുങ്ങല്ലൂർ, വസ്ത്രാലങ്കാരം നിസാർ റഹ്മത്ത്, സ്റ്റിൽസ് അനിൽ പേരാമ്പ്ര, പരസ്യകല ആന്റണി സ്റ്റീഫന്, ചീഫ് അസോസിയേറ്റ് ഡയറക്ടർ ജയേഷ് മൈനാഗപ്പള്ളി, അസോസിയേറ്റ് ഡയറക്ടർ ഗീതാഞ്ജലി ഹരികുമാർ,
പ്രൊഡക്ഷൻ എക്സിക്യൂട്ടീവ് നസീർ കൂത്തുപറമ്പ്, പിആർഒ പി ആര് സുമേരൻ.
സിനിമകളിൽ നിന്ന് Malayalam OTT Release വരെ, Bigg Boss Malayalam Season 7 മുതൽ Mollywood Celebrity news, Exclusive Interview വരെ — എല്ലാ Entertainment News ഒരൊറ്റ ക്ലിക്കിൽ. ഏറ്റവും പുതിയ Movie Release, Malayalam Movie Review, Box Office Collection — എല്ലാം ഇപ്പോൾ നിങ്ങളുടെ മുന്നിൽ. എപ്പോഴും എവിടെയും എന്റർടൈൻമെന്റിന്റെ താളത്തിൽ ചേരാൻ ഏഷ്യാനെറ്റ് ന്യൂസ് മലയാളം വാർത്തകൾ