അമരനോട് ഏറ്റുമുട്ടി തകര്‍ന്നുവീണു, ഒടുവില്‍ ഒടിടിയിലേക്ക്, ബ്ലാക്ക് കോമഡി നേടിയത് ഒമ്പത് കോടി മാത്രം

നിര്‍മാണം ജയിലറിന്റെ സംവിധായകൻ നെല്‍സണാണ്.

തമിഴ് പ്രേക്ഷകരുടെ പ്രിയപ്പെട്ട യുവ താരമാണ് കവിൻ. കവിന്റേതായി അടുത്തിടെ എത്തിയ തമിഴ് ചിത്രം ബ്ലഡി ബെഗ്ഗറാണ്. ബ്ലാക്ക് കോമഡി ചിത്രമായിരുന്നു ഇത്. ബ്ലഡി ബെഗ്ഗര്‍ ഒടിടിയില്‍ എത്തുന്നതിനെ കുറിച്ചാണ് പുതിയ റിപ്പോര്‍ട്ട്.

ശിവകാര്‍ത്തികേയന്റെ അമരൻ എത്തിയ അതേ ദിവസമാണ് കവിന്റെ ബ്ലഡി ബെഗ്ഗറിന്റെയും റിലീസ്.  ശിവകാര്‍ത്തികേയന്റെ അമരൻ ആഗോളതലത്തില്‍ 280 കോടി രൂപയിലേറെ നേടി മുന്നേറി അത്ഭുതപ്പെടുത്തുകയാണ്. എന്നാല്‍ കവിൻ നായകനായി എത്തിയ ചിത്രം ബ്ലഡി ബെഗ്ഗര്‍ തകര്‍ന്നുവീണുവെന്നും ഒമ്പത് കോടിയാണ് നേടിയതെന്നുമാണ് റിപ്പോര്‍ട്ട്. ബ്ലഡി ബെഗ്ഗര്‍ 29ന് പ്രൈം വീഡിയോയില്‍ റിലീസ് ആകും എന്നാണ് നിലവിലുള്ള ഒടിടി അപ്‍ഡേറ്റ്.

ജയേഷ് സുകുമാറാണ് സംവിധാനം ചെയ്‍തത്. യുവ നടൻ കവിന്റെ ഒടുവിലത്തെ ചിത്രമായ ബ്ലഡി ബെഗ്ഗറില്‍ രാധാ രവി, റെഡിൻ കിംഗ്‍സ്‍ലെ, പടം വേണു കുമാര്‍, പൃഥ്വി രാജ്, മിസി സലീമ, പ്രിയദര്‍ശിനി രാജ്‍കുമാര്‍, സുനില്‍ സുഖദ, ടി എം കാര്‍ത്തിക, അര്‍ഷാദ്, അക്ഷയ ഹരിഹരൻ, അനാര്‍ക്കലി നാസര്‍, ദിവ്യ വിക്രം, മെറിൻ ഫിലിപ്പ്, രോഹിത് ഡെന്നിസ്, വിദ്യുത് രവി, മൊഹമ്മദ് എന്നിവരും കഥാപാത്രങ്ങളായി ഉണ്ടായിരുന്നു. ചിത്രത്തിന്റെ നിര്‍മാണം രജനികാന്തിന്റെ ജയിലറിന്റെ സംവിധായകൻ നെല്‍സണ്‍ ആണ് എന്നതിനാലും ശ്രദ്ധയാകര്‍ഷിച്ചിരുന്നു. ചിത്രത്തിന്റെ നിര്‍മാണം ഫിലമെന്റ് പിക്ചേഴ്‍സിന്റെ ബാനറില്‍ ആണ്.

കവിൻ പേരില്ലാത്ത ഒരു യാചകനായിട്ടായിരുന്നു ചിത്രത്തില്‍ വേഷമിട്ടത്. കവിന്റെ പ്രകടനത്തെ നിരൂപകര്‍ പ്രശംസിച്ചിരുന്നു. എന്നാല്‍ നല്ല അഭിപ്രായമായിരുന്നില്ല സിനിമയ്‍ക്ക് തിയറ്റററുകളില്‍ ലഭിച്ചതെന്നാണ് റിപ്പോര്‍ട്ട്. ബ്ലഡി ബഗ്ഗര്‍ ഒടിടിയില്‍ എത്തുമ്പോള്‍ ചിത്രത്തിന് മികച്ച സ്വീകാര്യത ലഭിക്കുമോയെന്നതിലാണ് ആകാംക്ഷ.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക