അന്ന് ഹാഷിർ ഗ്യാങ്ങ്, വീണ്ടും സർപ്രൈസ് വീഡിയോ കോളുമായി കെ സി വേണുഗോപാൽ; വൻ കയ്യടി നേടുന്ന 'അത്ഭുതബാലൻ' ആദിശേഷന് ആശംസ

'ബാലൻ: ദ് ബോയ്' എന്ന ചിത്രത്തിലെ അത്ഭുതബാലൻ ആദിശേഷനെ ഫോണിൽ വിളിച്ച് അഭിനന്ദിച്ച് എഐസിസി ജനറൽ സെക്രട്ടറി കെസി വേണുഗോപാൽ. ആദിശേഷന്റെ അഭിനയത്തെ പ്രശംസിച്ച അദ്ദേഹം, കുട്ടിയുടെ മാതാപിതാക്കളെയും പ്രശംസിച്ചു

ആലപ്പുഴ: 'ബാലൻ: ദ് ബോയ് ' എന്ന ചിത്രത്തിലൂടെ പ്രേക്ഷകമനസ്സുകൾ കീഴടക്കിയ 'അത്ഭുതബാലൻ', ആലപ്പുഴ തണ്ണീർമുക്കം സ്വദേശി ആദിശേഷനെ ഫോണിൽ വിളിച്ച് ആശംസകൾ അറിയിച്ച് എഐസിസി ജനറൽ സെക്രട്ടറി കെസി വേണുഗോപാൽ എംപി. സ്ക്രീനിൽ വിസ്മയം തീർത്ത, മികച്ച അഭിനയത്തിലൂടെ വലിയ കൈയടി നേടിയ ആദിശേഷനെയും, അവനിലെ പ്രതിഭയെ തിരിച്ചറിഞ്ഞ് പ്രോത്സാഹിപ്പിച്ച മാതാപിതാക്കളെയും കെ സി വേണുഗോപാൽ അഭിനന്ദിച്ചു. സിനിമയിലെ ഈ വലിയ തുടക്കം നാളത്തെ ഒരു മികച്ച കലാകാരനിലേക്കുള്ള ആദിശേഷനുള്ള ചുവടുവെപ്പാകട്ടെയെന്ന് വേണുഗോപാൽ ആശംസിച്ചു.

നേരത്തെ, വാഴ 2 കണ്ട ശേഷം കെസി വേണുഗോപാൽ ഹാഷിർ ഗ്യാങ്ങിനെ വിളിച്ചതും വൈറലായിരുന്നു. സിനിമ കണ്ടതിനു പിന്നാലെ അഭിനേതാക്കളെ ഫോണിൽ വിളിച്ച് അഭിനന്ദിച്ച അദ്ദേഹം സാവിൻ സായ്ക്കും വിപിൻ ദാസിനും അഭിനന്ദനങ്ങൾ അറിയിച്ചു. "വാഴ 2 കുടുംബത്തോടൊപ്പം കണ്ടു. ഇൻസ്റ്റഗ്രാം റീൽ താരങ്ങളായ ഹാഷിറും ടീമും മറ്റു അഭിനേതാക്കളും എത്ര മനോഹരമായാണ് അവരുടെ കഥാപാത്രങ്ങളെ അവതരിപ്പിച്ചിരിക്കുന്നത്. സിനിമ കണ്ടതിനു പിന്നാലെ അഭിനേതാക്കളെ ഫോണിൽ വിളിച്ച് അഭിനന്ദിച്ചു. ഹാഷിർ, അലൻ, അജിൻ, വിനായക് എന്നിവർക്കും, സംവിധാനം നിർവഹിച്ച സവിൻ എസ്.എക്കും രചന നിർവഹിച്ച വിപിൻ ദാസിനും അണിയറപ്രവർത്തകർക്കും അഭിനന്ദനങ്ങൾ", എന്നായിരുന്നു കെ സി വേണു​ഗോപാൽ സോഷ്യൽ മീഡിയയിൽ കുറിച്ചത്. ഒപ്പം ഹാഷിർ ​ഗ്യാങ്ങിനോട് സംസാരിച്ച വീഡിയോയും അദ്ദേഹം പങ്കുവച്ചിരുന്നു.

"ഞാൻ ഇപ്പോൾ സിനിമ കണ്ട് ഇറങ്ങിയതെ ഉള്ളൂ. ഞങ്ങളൊക്കെ ഒരായിരം പ്രസം​ഗങ്ങൾ നടത്തുന്നതിനെക്കാൾ എഫ്ക്ടീവ് ആണ് ഈ ഒരൊറ്റ സിനിമ. മികച്ചൊരു സിനിമ. മയക്കുമരുന്നിന് എതിരായ, പാരൻസിന് വേണ്ടിയുള്ള, ജൻസിക്ക് വേണ്ട, തുടങ്ങിയവയ്ക്കുള്ള സന്ദേശം കൂടിയാണ് സിനിമ. നിങ്ങൾ ബി​ഗ് സ്ക്രീനിൽ വന്നതോട് കൂടി ചരിത്രം സൃഷ്ടിച്ചു. അങ്ങനെയാണ് എനിക്ക് തോന്നുന്നത്. വളരെ ഇഷ്ടപ്പെട്ടു. പരസ്പരമുള്ള സ്നേഹം വളരെ മനോഹരമായി നിങ്ങൾ ചിത്രീകരിച്ചിട്ടുണ്ട്. നേരിട്ട് കാണണം. സിനിമയുടെ അനുഭവം അറിയാൻ താല്പര്യമുണ്ട്. ഇനിയും ഇങ്ങനെ ഉള്ള നല്ല സിനിമകളുമായി വരണം"എന്നാണ് കെ സി വേണു​ഗോപാൽ വീഡിയോയിൽ പറഞ്ഞത്.