'കണ്ണൂര്‍ സ്ക്വാഡി'നു ശേഷം മമ്മൂട്ടി വീണ്ടും നവാഗത സംവിധായകനൊപ്പം; വരുന്നത് സ്റ്റൈലിഷ് ത്രില്ലര്‍

മാര്‍ച്ച് അവസാനം ചിത്രീകരണം തുടങ്ങും

കരിയറില്‍ എക്കാലവും നവാഗത സംവിധായകര്‍ക്കൊപ്പം പ്രവര്‍ത്തിക്കാന്‍ ഉത്സാഹം കാട്ടിയിട്ടുള്ള താരമാണ് മമ്മൂട്ടി. തന്നിലെ നടന് എന്തെങ്കിലും പുതിയത് ലഭിക്കുമെന്ന പ്രതീക്ഷയില്‍ നിന്നാണ് ഇത്തരം കൂട്ടുകെട്ടുകള്‍ ഉണ്ടാവുന്നതെന്ന് അദ്ദേഹം പറഞ്ഞിട്ടുള്ളതാണ്. മമ്മൂട്ടി ഇപ്പോള്‍ അഭിനയിക്കുന്നതും ഇനി അഭിനയിക്കാനിരിക്കുന്നതും നവാഗത സംവിധായകരുടെ ചിത്രങ്ങളാണ്. റോബി വര്‍ഗീസ് രാജ് സംവിധാനം ചെയ്യുന്ന കണ്ണൂര്‍ സ്ക്വാഡ് ആണ് അദ്ദേഹം അഭിനയിച്ചുകൊണ്ടിരിക്കുന്ന ചിത്രം. അടുത്തതായി നടക്കാനിരിക്കുന്നത് നവാഗതനായ ഡിനോ ഡെന്നിസ് ഒരുക്കുന്ന ചിത്രവും.

പ്രശസ്ത തിരക്കഥാകൃത്ത് കലൂര്‍ ഡെന്നിസിന്‍റെ മകന്‍ ഡിനോ ഡെന്നിസ് മമ്മൂട്ടിയെ നായകനാക്കി സംവിധാന അരങ്ങേറ്റം കുറിക്കുന്നതായ റിപ്പോര്‍ട്ടുകള്‍ കഴിഞ്ഞ ജൂണിലാണ് ആദ്യമായി എത്തിയത്. ഇപ്പോഴിതാ ആ ചിത്രം നിര്‍മ്മാണ ഘട്ടത്തിലേക്ക് നീങ്ങുകയാണ്. റോബി വര്‍ഗീസ് രാജ് സംവിധാനം ചെയ്യുന്ന ചിത്രം പൂര്‍ത്തിയാക്കിയാല്‍ മമ്മൂട്ടി ജോയിന്‍ ചെയ്യുന്നത് ഡിനോ ഡെന്നിസ് ചിത്രത്തില്‍ ആയിരിക്കുമെന്ന് ചിത്രത്തിന്‍റെ നിര്‍മ്മാതാക്കളില്‍ ഒരാളായ ജിനു എബ്രഹാം ഏഷ്യാനെറ്റ് ന്യൂസ് ഓണ്‍ലൈനിനോട് പറഞ്ഞു. 

"മാര്‍ച്ച് അവസാനം ഷൂട്ടിംഗ് ആരംഭിക്കും. കൊച്ചി, ബംഗളൂരു എന്നിവിടങ്ങളാണ് ചിത്രത്തിന്‍റെ ലൊക്കേഷനുകള്‍. നിമിഷ് രവിയാണ് ഛായാഗ്രാഹകന്‍". സ്റ്റൈലിഷ് ആയി ഒരുക്കുന്ന ത്രില്ലര്‍ വിഭാഗത്തില്‍ പെടുന്ന ഒരു ചിത്രമായിരിക്കും ഇതെന്നും റോഷാക്ക് ഒക്കെ പോലെ പുതിയ രീതിയിലുള്ള ഒരു സിനിമയായിരിക്കും ഇതെന്നും ജിനു എബ്രഹാം പറയുന്നു. ഡോള്‍വിന്‍ കുര്യാക്കോസിനൊപ്പം സംവിധായകനും തിരക്കഥാകൃത്തുമായ ജിനു എബ്രഹാമും ചേര്‍ന്ന് ആരംഭിച്ച നിര്‍മ്മാണ കമ്പനി തിയറ്റര്‍ ഓഫ് ഡ്രീംസ് ആണ് ഡിനോ ഡെന്നിസിന്‍റെ മമ്മൂട്ടി ചിത്രം നിര്‍മ്മിക്കുന്നത്. ഷാജി കൈലാസിന്‍റെ പൃഥ്വിരാജ് ചിത്രം കാപ്പയാണ് ഇവരുടെ ആദ്യ ചിത്രം. മമ്മൂട്ടി ചിത്രത്തിന് മുന്‍പ് ടൊവിനോ നായകനാവുന്ന മറ്റൊരു ചിത്രവും ഈ ബാനര്‍ നിര്‍മ്മിക്കുന്നുണ്ട്. ടൊവിനോയെ നായകനാക്കി നവാഗതനായ ഡാര്‍വിന്‍ കുര്യാക്കോസ് സംവിധാനം ചെയ്യുന്ന അന്വേഷിപ്പിന്‍ കണ്ടെത്തും എന്ന ചിത്രമാണ് ഇത്. മാര്‍ച്ച് 6 ന് ഇതിന്‍റെ ഷൂട്ടിംഗ് തുടങ്ങും.