മഞ്ജു വാര്യരുടെ 'മിസ്റ്റര്‍ എക്സ്', ചിത്രം ആരംഭിച്ചു

ആര്യയും ഗൗതം കാര്‍ത്തിക്കും മഞ്‍ജുവിനൊപ്പം ചിത്രത്തില്‍ എത്തും.

മലയാളി പ്രേക്ഷകരുടെ പ്രിയങ്കരിയായ ഒരു താരമാണ് മഞ്‍ജു വാര്യര്‍. മഞ്‍ജു വാര്യര്‍ ഇപ്പോള്‍ തമിഴ് ചിത്രങ്ങളിലൂടെയും ശ്രദ്ധയാകര്‍ഷിക്കുന്നു. ധനുഷ് നായകനായ 'അസുരനി'ലൂടെയാണ് മഞ്‍ജു ആദ്യം തമിഴകത്ത് എത്തുന്നത്. മഞ്‍ജു വാര്യരുടെ പുതിയ തമിഴ് ചിത്രം 'മിസ്റ്റര്‍ എക്സ്' ചിത്രീകരണം ആരംഭിച്ചിരിക്കുകയാണ്.

'എഫ്ഐആര്‍' ഒരുക്കിയ മനു ആനന്ദാണ് സംവിധാനം ചെയ്യുന്നത്. മനു ആനന്ദിന്റെ സംവിധാനത്തിലുള്ള പുതിയ ചിത്രവും ആക്ഷൻ ത്രില്ലറാണ്. ആര്യയും ഗൗതം കാര്‍ത്തിക്കും പുതിയ ചിത്രത്തില്‍ പ്രധാന വേഷങ്ങളില്‍ എത്തുന്നു. മനു ആനന്ദിന്റേതാണ് ചിത്രത്തിന്റെ തിരക്കഥയും.

'അസുരൻ' എന്ന ഹിറ്റ് തമിഴ് ചിത്രത്തില്‍ ധനുഷിന്റെ നായികയായി എത്തിയ മഞ‍്ജു വാര്യര്‍ അന്നാട്ടിലെ അരങ്ങേറ്റം ഗംഭീരമാക്കിയെന്നായിരുന്നു പ്രേക്ഷകാഭിപ്രായം. മഞ്‍ജു വാര്യരുടേതായി ഒടുവിലെത്തിയ തമിഴ് ചിത്രം 'തുനിവാ'ണ്. അജിത്ത് നായകനായെത്തിയ ചിത്രമാണ് 'തുനിവ്'. എച്ച് വിനോദാണ് ചിത്രം തിരക്കഥയെഴുതി സംവിധാനം ചെയ്‍തത്.

മഞ്‍ജു വാര്യര്‍ 'കണ്‍മണി' എന്ന കഥാപാത്രമായിട്ടാണ് തുനിവില്‍ വേഷമിട്ടത്. മിച്ച പ്രകടനമായിരുന്നു ചിത്രത്തില്‍ മഞ്‍ജുവിന്റേത്. നിരവ് ഷായായിരുന്നു ചിത്രത്തിന്റെ ഛായാഗ്രാഹണം. സമുദ്രക്കനി, ജോണ്‍ കൊക്കെൻ, അജയ് കുമാര്‍, വീര, ജി എം സുന്ദര്‍, പ്രേം കുമാര്‍, ദര്‍ശൻ, ശങ്കര്‍, ദര്‍ശൻ, ബാല ശരണവണ്‍, ചിരാഗ് ജനി, റിതുരാജ് സിംഗ്, സിജോയ് വര്‍ഗീസ്, പവനി റെഡ്ഡി തുടങ്ങി ഒട്ടേറെ പേര്‍ വേഷമിട്ട തുനിവ്‍ വൻ ഹിറ്റായി മാറിയിരുന്നു. ചിത്രത്തിന്റെ നിര്‍മാണം ബോണി കപൂറാണ്. വിജയ്‍യുടെ 'വാരിസി'നൊപ്പം ആയിരുന്നു അജിത്ത് ചിത്രം 'തുനിവും' റിലീസ് ചെയ്‍തത്.  അജിത്ത് കുമാര്‍ ചിത്രത്തിലെ ജിബ്രാന്റെ സംഗീതത്തിലുള്ള ഗാനങ്ങളും വൻ ഹിറ്റായി മാറിയിരുന്നു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക