12th Man : ആകാംക്ഷ നിറച്ച് 'ട്വല്ത്ത് മാൻ' പുതിയ പ്രൊമൊ വീഡിയോ
Synopsis
ഉണ്ണി മുകുന്ദന്റെ കഥാപാത്രത്തിന്റെ ദൃശ്യങ്ങളാണ് വീഡിയോയില് (12th Man).
മോഹൻലാല് നായകനാകുന്ന പുതിയ ചിത്രം ട്വല്ത്ത് മാനായി ആരാധകര് ആകാംക്ഷയോടെ കാത്തിരിക്കുകയാണ്. ഒരു സസ്പെൻസ് ത്രില്ലറായിരിക്കും ചിത്രമെന്നാണ് പ്രമോഷൻ മെറ്റീരിയലുകളില് നിന്ന് മനസിലാകുന്നു. ട്വല്ത്ത് മാൻ എന്ന സിനിമയുടെ വിശേഷങ്ങള് ഓണ്ലൈനില് തരംഗമാകുകയുമാണ്. ഇപ്പോഴിതാ മോഹൻലാല് നായകനാകുന്ന ചിത്രത്തിന്റെ പുതിയൊരു പ്രൊമൊ വീഡിയോ പുറത്തുവിട്ടിരിക്കുന്നു (12th Man).
ഉണ്ണി മുകുന്ദന്റെ ദൃശ്യങ്ങളാണ് വീഡിയോയില് ഉള്പ്പെട്ടിരിക്കുന്നത്. ആകാംക്ഷ നിറച്ചുള്ളതാണ് മോഹൻലാല് ചിത്രത്തിന്റെ പുതിയ പ്രൊമൊയും. ഡയറക്ട് ഒടിടി റിലീസായിട്ടാണ് ചിത്രം പ്രദര്ശനത്തിന് എത്തുക. 'ട്വല്ത്ത് മാൻ' എന്ന ചിത്രം ഡിസ്നി പ്ലസ് ഹോട്സ്റ്റാറില് 20നാണ് റിലീസ് ചെയ്യുക.
ആശിര്വാദ് സിനിമാസിന്റെ ബാനറില് ആന്റണി പെരുമ്പാവൂര് ആണ് ചിത്രം നിര്മിക്കുന്നത്. 'ദൃശ്യം രണ്ട്' എന്ന ചിത്രത്തിന് ശേഷം ജീത്തു ജോസഫും മോഹൻലാലും ഒന്നിക്കുന്ന ചിത്രമാണ് 'ട്വല്ത്ത് മാൻ'. മോഹൻലാലും ജീത്തു ജോസഫും വീണ്ടും ഒന്നിക്കുമ്പോള് അതുകൊണ്ടുതന്നെ പ്രേക്ഷകരുടെ പ്രതീക്ഷയും ഏറുകയാണ്. മോഹൻലാലിന്റെ മികച്ച ഒരു കഥാപാത്രമായിരിക്കും 'ട്വല്ത്ത് മാനി'ലേത്.
രാഹുല് മാധവ്, അദിതി രവി, ഷൈൻ ടോം ചാക്കോ, സൈജു കുറുപ്പ്, വീണ നന്ദകുമാര്, ശിവദ നായര് തുടങ്ങി ഒട്ടേറെ താരങ്ങള് 'ട്വല്ത്ത് മാനി'ല് അഭിനയിക്കുന്നുണ്ട്. സതീഷ് കുറുപ്പ് ആണ് ചിത്രത്തിന്റെ ഛായാഗ്രാഹണം നിര്വഹിക്കുന്നത്. രാജീവ് കോവിലകമാണ് ചിത്രത്തിന്റെ കലാസംവിധായകൻ. ലിന്റ ജീത്തുവാണ് ചിത്രത്തിന്റെ കോസ്റ്റ്യൂം ഡിസൈൻ.
Read More : ആക്ഷനില് തകര്ത്താടുന്ന മോഹൻലാല്, 'ആറാട്ട്' ഫൈറ്റ് മേയ്ക്കിംഗ് വീഡിയോ
നെയ്യാറ്റിൻകര ഗോപന്റെ ആറാട്ട് എന്ന ചിത്രമാണ് മോഹൻലാലിന്റേതായി ഏറ്റവും ഒടുവില് പ്രദര്ശനത്തിന് എത്തിയത്. ബി ഉണ്ണികൃഷ്ണനാണ് ചിത്രം സംവിധാനം ചെയ്തത്. മികച്ച പ്രതികരണമാണ് ചിത്രത്തിന് തിയറ്ററുകളില് നിന്ന് ലഭിച്ചത്. മോഹൻലാല് നായകനായ ചിത്രം ആമസോണിലും വിജയകരമായി സ്ട്രീമിംഗ് ചെയ്തു.
ബി ഉണ്ണികൃഷ്ണൻ സംവിധാനം ചെയ്ത ചിത്രത്തിന് തിരക്കഥ എഴുതിയത് ഉദയ് കൃഷ്ണയായിരുന്നു. ശ്രദ്ധ ശ്രീനാഥ് ആണ് ചിത്രത്തില് പ്രധാന സ്ത്രീ കഥാപാത്രമായിഎത്തിയത്. നെടുമുടി വേണു, സായ് കുമാര്, സിദ്ദിഖ്, വിജയരാഘവന്, ജോണി ആന്റണി, ഇന്ദ്രന്സ്, നന്ദു, ഷീല, സ്വാസിക, മാളവിക, രചന നാരായണന്കുട്ടി തുടങ്ങി വലിയ താരനിരയും ചിത്രത്തിൽ അണിനിരന്നത്. കെജിഎഫിലെ 'ഗരുഡ' എന്ന കഥാപാത്രത്തിലൂടെ ശ്രദ്ധനേടിയ രാമചന്ദ്ര രാജുവാണ് ചിത്രത്തിലെ ശ്രദ്ധേയ സാന്നിധ്യം.
'ആറാട്ട്' എന്ന ചിത്രം സ്വീകരിച്ച പ്രേക്ഷകര്ക്ക് നന്ദി അറിയിച്ച് മോഹന്ലാല് ഫേസ്ബുക്ക് ലൈവില് എത്തിയിരുന്നു. 'ആറാട്ട്' എന്ന സിനിമയെ രണ്ട് കൈയും നീട്ടി സ്വീകരിച്ച എല്ലാ പ്രേക്ഷകര്ക്കും എന്റെ ഹൃദയം നിറഞ്ഞ നന്ദി. ഒരു അണ്റിയലിസ്റ്റിക് എന്റര്ടെയ്നര് എന്നാണ് ആ സിനിമയെക്കുറിച്ച് നമ്മള് പറഞ്ഞിരിക്കുന്നത്. അതുപോലെ തന്നെയാണ്. വലിയ അവകാശവാദങ്ങളൊന്നുമില്ല. എല്ലാവര്ക്കും ഇഷ്ടപ്പെടുന്ന ഒരു സിനിമ. 'ആറാട്ട്' എന്ന പേര് തന്നെ ഒരു ഉത്സവാന്തരീക്ഷം വച്ചിട്ടാണ് നമ്മള് ഇട്ടിരിക്കുന്നത്. അത് വളരെയധികം ആളുകളിലേക്ക് എത്തി. രണ്ടുകൈയും നീട്ടി സ്വീകരിച്ചു. ഒരുപാട് സന്തോഷം, ഒരുപാട് നന്ദി.
കൊവിഡ് മഹാമാരിയൊക്കെ കഴിഞ്ഞ് തിയറ്ററുകള് വീണ്ടും ഉണര്ന്ന് പ്രവര്ത്തിക്കുന്ന സമയമാണ്. ഈ സമയത്തേക്ക് എന്നെ ഇഷ്ടപ്പെടുന്ന, മലയാള സിനിമയെ ഇഷ്ടപ്പെടുന്ന നിങ്ങള്ക്കുവേണ്ടി ഞങ്ങള് തയ്യാറാക്കി തന്നിരിക്കുകയാണ്. വളരെയധികം നല്ല റിപ്പോര്ട്ടുകളാണ് കിട്ടുന്നത്. ഒരുപാട് പേര്ക്ക് നന്ദി പറയാനുണ്ട്.
എ ആര് റഹ്മാനോട് വളരെയധികം നന്ദി പറയുന്നു. കൊവിഡ് ഏറ്റവും മൂര്ധന്യാവസ്ഥയില് നില്ക്കുന്ന സമയത്താണ് ഞങ്ങള് ഇത് ഷൂട്ട് ചെയ്തത്. പക്ഷേ ഈശ്വരകൃപകൊണ്ട് എല്ലാം ഭംഗിയായി. ആ സിനിമ തിയറ്ററിലെത്തി. ഒരുപാട് സന്തോഷം. വളരെ നല്ല പ്രതികരണങ്ങളാണ് കിട്ടിക്കൊണ്ടിരിക്കുന്നത്. ബി ഉണ്ണികൃഷ്ണന് ചെയ്ത വളരെ വ്യത്യസ്തമായ ഒരു എന്റര്ടെയ്നര് ആണിത്. ആറാട്ട് എല്ലാവര്ക്കും ഇഷ്ടപ്പെട്ടുവെന്ന് അറിഞ്ഞതില് വളരെയധികം സന്തോഷം. സിനിമയുടെ പിറകില് പ്രവര്ത്തിച്ച എല്ലാവര്ക്കും ഒരിക്കല്ക്കൂടി എന്റെ നന്ദി. കൂടുതല് നല്ല സിനിമകളുമായി വീണ്ടും വരുമെന്നുമായിരുന്നു മോഹൻലാല് പറഞ്ഞത്.