നാലാം സ്ഥാനത്തേക്ക് തൃഷ, ഒന്പതാമത് കീര്ത്തി; ഇന്ത്യന് സിനിമയില് ഏറ്റവും ജനപ്രീതിയുള്ള 10 നടിമാര്
Synopsis
മെയ് മാസത്തിലെ ലിസ്റ്റില് ഇല്ലാതിരുന്ന രണ്ട് പേരാണ് ജൂണിലെ ലിസ്റ്റില്
പാന് ഇന്ത്യന് റിലീസുകളുടെയും ഒടിടിയുടെയും കാലത്ത് അഭിനേതാക്കള്ക്ക് ഭാഷയുടെ അതിര്വരമ്പുകള്ക്കപ്പുറം പ്രേക്ഷക സ്വീകാര്യത നേടാനുള്ള അവസരമുണ്ട്. മറുഭാഷാ സിനിമകളില് നിന്ന് മികച്ച അവസരങ്ങള് തേടിയെത്താനും ഇത് അവരെ സഹായിക്കുന്നുണ്ട്. മുന്പെന്നത്തേക്കാള് മലയാളി താരങ്ങള്ക്കും ഇത്തരത്തിലുള്ള അവസരങ്ങള് ലഭിക്കുന്ന കാലമാണ് ഇത്. ഇപ്പോഴിതാ ഇന്ത്യന് സിനിമയിലെ ഏറ്റവും ജനപ്രീതി നേടിയ 10 നടിമാരുടെ ലിസ്റ്റ് പുറത്തുവിട്ടിരിക്കുകയാണ് പ്രമുഖ മീഡിയ കണ്സള്ട്ടിംഗ് സ്ഥാപനമായ ഓര്മാക്സ് മീഡിയ. ജൂണ് മാസത്തിലെ വിലയിരുത്തല് പ്രകാരമുള്ള ലിസ്റ്റ് ആണ് ഇത്.
ലിസ്റ്റ് പ്രകാരം സാമന്തയാണ് ഒന്നാം സ്ഥാനത്ത്. രണ്ടാമത് അലിയ ഭട്ടും മൂന്നാമത് ദീപിക പദുകോണും. തൃഷയാണ് നാലാം സ്ഥാനത്ത്. കാജല് അഗര്വാള് അഞ്ചാം സ്ഥാനത്തും സായ് പല്ലവി ആറാമതും. നയന്താരയാണ് ഏഴാമത്. എട്ടാമത് രശ്മിക മന്ദാനയും ഒന്പതാമത് കീര്ത്തി സുരേഷും. തമന്ന ഭാട്ടിയയാണ് പത്താം സ്ഥാനത്ത്.
ഇത്തരത്തിലുള്ള ജനപ്രിയ ലിസ്റ്റുകള് ഓര്മാക്സ് എല്ലാ മാസവും പ്രസിദ്ധീകരിക്കാറുണ്ട്. മെയ് മാസത്തിലെ ലിസ്റ്റില് ഇല്ലാതിരുന്ന രണ്ട് പേരാണ് ജൂണിലെ ലിസ്റ്റില് ഇടംപിടിച്ചിരിക്കുന്നത്. മെയ്മാസത്തിലെ പട്ടികയില് ഉണ്ടായിരുന്ന രണ്ട് പേര് പുതിയ ലിസ്റ്റില് നിന്ന് പുറത്താവുകയും ചെയ്തു. ശ്രീലീലയും ശ്രദ്ധ കപൂറുമാണ് പുറത്തായത്. പകരം കീര്ത്തി സുരേഷും തമന്ന ഭാട്ടിയയും ഇടം പിടിക്കുകയും ചെയ്തു. സ്ഥാനങ്ങളിലും ചില വ്യത്യാസങ്ങള് പുതിയ പട്ടികയില് ഉണ്ട്. നാലാമതുണ്ടായിരുന്ന കാജല് അഗര്വാള് അഞ്ചാം സ്ഥാനത്തേക്ക് മാറിയപ്പോള് അഞ്ചാമതുണ്ടായിരുന്ന തൃഷ നാലാം സ്ഥാനത്തേക്ക് എത്തി. സായ് പല്ലവിയും നയന്താരയും ഇതുപോലെ സ്ഥാനങ്ങള് മാറി. സായ് പല്ലവി ആറാമതാണ് ഇപ്പോള്. നയന്താര ഏഴാമതും.
അതിഥിതാരമായി എത്തിയ ഒരു ചിത്രം മാത്രമാണ് സാമന്തയുടേതായി ഈ വര്ഷം ഇതുവരെ തിയറ്ററുകളില് എത്തിയത്. പ്രവീണ് കണ്ഡ്രെഗുല സംവിധാനം ചെയ്ത ശുഭം എന്ന ചിത്രമാണ് അത്. ഹര്ഷിത് റെഡ്ഡിയും ഗവിറെഡ്ഡി ശ്രീനിവാസുമാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. 2023 ല് പുറത്തെത്തിയ ഖുഷി എന്ന ചിത്രത്തിന് ശേഷം സാമന്ത നായികയായ ചിത്രങ്ങളൊന്നും എത്തിയിരുന്നില്ല. മയോസൈറ്റിസ് എന്ന അസുഖം കണ്ടെത്തിയതിനെത്തുടര്ന്ന് അതിന്റെ ചികിത്സയ്ക്കായി സിനിമയില് നിന്ന് ഇടവേള എടുത്തിരുന്നു നടി. മാ ഇന്തി ബംഗാരം എന്ന ചിത്രം സാമന്തയുടേതായി ചിത്രീകരണം പുരോഗമിക്കുന്നുണ്ട്.
സിനിമകളിൽ നിന്ന് Malayalam OTT Release വരെ, Bigg Boss Malayalam Season 7 മുതൽ Mollywood Celebrity news, Exclusive Interview വരെ — എല്ലാ Entertainment News ഒരൊറ്റ ക്ലിക്കിൽ. ഏറ്റവും പുതിയ Movie Release, Malayalam Movie Review, Box Office Collection — എല്ലാം ഇപ്പോൾ നിങ്ങളുടെ മുന്നിൽ. എപ്പോഴും എവിടെയും എന്റർടൈൻമെന്റിന്റെ താളത്തിൽ ചേരാൻ ഏഷ്യാനെറ്റ് ന്യൂസ് മലയാളം വാർത്തകൾ