കാത്തിരിപ്പ് വെറുതെയായില്ല, 'തുറമുഖം' ഗംഭീരം, ആദ്യ പ്രതികരണങ്ങള്‍ പുറത്ത്

നിവിൻ പോളിയുടെ 'തുറമുഖം' എങ്ങനെയുണ്ട്?, ആദ്യ പ്രതികരണങ്ങള്‍ ഇങ്ങനെ.

നിവിൻ പോളി പ്രധാന കഥാപാത്രമായ ചിത്രം 'തുറമുഖം' ഒടുവില്‍ റിലീസ് ചെയ്‍തിരിക്കുകയാണ്. രാജീവ് രവിയാണ് ചിത്രത്തിന്റെ സംവിധാനം. മലയാളത്തിലെ വൻ താരനിര അണിനിരന്നരിക്കുന്ന ചിത്രത്തിന് മികച്ച പ്രതികരണമാണ് ലഭിക്കുന്നത്. രാജീവ് രവിയുടെ ക്ലാസ്സിക് ടച്ചുള്ള സിനിമയില്‍ നിവിൻ പോളിയുടേയും അര്‍ജുൻ അശോകന്റെയും കുറച്ച് നേരമേ ഉള്ളൂവെങ്കിലും ജോജു ജോര്‍ജിന്റെയുമൊക്കെ തകര്‍പ്പൻ പ്രകടനമാണ് എന്നാണ് സാമൂഹ്യ മാധ്യമങ്ങളിലെ പ്രതികരണം.

ചിത്രത്തിന്റെ പ്രമേയം മട്ടാഞ്ചേരി കലാപമാണ്. മൂന്ന് മണിക്കൂര്‍ ഒട്ടും വിരസതയായില്ല. രാജീവ് രവിയുടെ ഛായാഗ്രഹണവും ഗംഭീരമെന്നാണ് ചിത്രം കണ്ടവര്‍ പറയുന്നത്. തിരക്കഥയെയും ചിലര്‍ വാനോളം പ്രശംസിക്കുന്നു.

ലിസ്റ്റിന്‍ സ്റ്റീഫന്റെ മാജിക് ഫ്രെയിംസാണ് ചിത്രം ഇപ്പോള്‍ പ്രദര്‍ശനത്തിന് എത്തിച്ചിരിക്കുന്നത്. കെ തെക്കേപ്പാട്ട് ഫിലിംസിന്റെയും ക്വീന്‍ മേരി സിനിമാസിന്റെയും ബാനറുകളില്‍ സുകുമാര്‍ തെക്കേപ്പാട്ട് നിര്‍മ്മിക്കുന്ന ചിത്രത്തില്‍ ജോസ് തോമസ് സഹനിര്‍മാതാവാണ്. ഗോപന്‍ ചിദംബരത്തിന്റേതാണ് തിരക്കഥയും സംഭാഷണവും. എഡിറ്റിംഗ് ബി അജിത്‍കുമാര്‍ ആണ്.

നിവിന്‍ പോളിക്കും അര്‍ജുൻ അശോകനും ജോജു ജോര്‍ജിനും പുറമേ ഇന്ദ്രജിത്ത് സുകുമാരന്‍, നിമിഷ സജയന്‍, പൂര്‍ണ്ണിമ ഇന്ദ്രജിത്ത്, അര്‍ജുന്‍ അശോകന്‍, ദര്‍ശന രാജേന്ദ്രന്‍, സുദേവ് നായര്‍, മണികണ്ഠന്‍ ആചാരി, സെന്തില്‍ കൃഷ്‍ണ, സന്തോഷ് കീഴാറ്റൂര്‍ തുടങ്ങിയവരാണ് ചിത്രത്തില്‍ അണിനിരക്കുന്നത്. 'തുറമുഖം' വളരെ വേഗത്തില്‍ ഉള്ള സിനിമ അല്ല എന്ന് നിവിൻ പോളി പറഞ്ഞിരുന്നു. ചിത്രം അച്ഛന്‍, മക്കള്‍, സഹോദരങ്ങള്‍ എന്നിവരൊക്കെ തമ്മിലുള്ള ബന്ധങ്ങളെയും പരാമര്‍ശിക്കുന്നു എന്ന് നേരത്തെ നിവിൻ പോളി പറഞ്ഞിരുന്നു. വ്യക്തമായ രാഷ്ട്രീയം കൂടി 'തുറമുഖ'മെന്ന ചിത്രം പറയുന്നുണ്ടെന്നും നിവിന്‍ പോളി പറഞ്ഞു. ഡിസൈന്‍ ഓള്‍ഡ്‍മങ്ക്സ്, ഡിസ്ട്രിബൂഷന്‍ ലീഡ് ബബിന്‍ ബാബു, ഓണ്‍ലൈന്‍ പ്രൊമോഷന്‍ അനൂപ് സുന്ദരന്‍,  മാര്‍ക്കറ്റിങ് പ്ലാന്‍ ബിനു ബ്രിങ്ഫോര്‍ത്ത് എന്നിവരുമാണ്.