'ആദിപുരുഷി'ന്റെ ടീസര് ഒക്ടോബര് രണ്ടിനാണ് പുറത്തുവിടുക.
പ്രഖ്യാപനത്തില് തന്നെ ആരാധകരെ ആവേശത്തിലാക്കിയ ചിത്രമാണ് പ്രഭാസിന്റെ 'ആദിപുരുഷ്'. ഇതിഹാസ കാവ്യമായ രാമായണത്തെ ആസ്പദമാക്കിയാണ് 'ആദിപുരുഷ്' ഒരുങ്ങുക. 2023 ജനുവരി 22ന് ആണ് ചിത്രം റിലീസ് ചെയ്യുക 'ആദിപുരുഷി'ന്റെ പുതിയൊരു പോസ്റ്റര് പുറത്തുവിട്ടിരിക്കുകയാണ് ഇപ്പോള്.
'ആദിപുരുഷി'ന്റെ ടീസര് റിലീസിന് ക്ഷണിച്ചുകൊണ്ടുള്ള പോസ്റ്ററാണ് പ്രഭാസ് പുറത്തുവിട്ടിരിക്കുന്നത്. 'ആദിപുരുഷിന്റെ ടീസറും പോസ്റ്ററും ഒക്ടോബര് രണ്ടിന് പുറത്തുവിടുമെന്ന് സംവിധായകൻ ഓം റൗട്ട് അടുത്തിടെ ഔദ്യോഗികമായി അറിയിച്ചിരിക്കുകയാണ്. അയോധ്യയില് സരയൂവിന്റെ തീരത്തുവെച്ചായിരിക്കും ടീസര് റിലീസ്. 'ആദിപുരുഷി'ല് പ്രഭാസ് 'രാഘവ'യാകുമ്പോള് 'ജാനകി'യായി അഭിനയിക്കുന്നത് കൃതി സനോണ് ആണ്.
നെറ്റ്ഫ്ലിക്സ് 'ആദിപുരുഷ്' ചിത്രത്തിന്റെ ഡിജിറ്റല് റൈറ്റ്സ് റെക്കോര്ഡ് തുകയ്ക്ക് സ്വന്തമാക്കിയെന്നാണ് റിപ്പോര്ട്ട്. 250 കോടി രൂപയ്ക്കാണ് 'ആദിപുരുഷെ'ന്ന ചിത്രത്തിന്റെ ഡിജിറ്റല് റൈറ്റ്സ് നെറ്റ്ഫ്ലിക്സ് സ്വന്തമാക്കിയെന്ന് മൂവി ഹെറാള്ഡ് റിപ്പോര്ട്ട് ചെയ്യുന്നു. വൻ ബജറ്റിലാണ് പ്രഭാസ് ചിത്രം ഒരുങ്ങുക എന്ന് നേരത്തെ തന്നെ റിപ്പോര്ട്ടുകളുണ്ടായിരുന്നു. 500 കോടി രൂപയാണ് ചിത്രത്തിന്റെ ബജറ്റ് എന്ന് തുടക്കത്തില് തന്നെ വാര്ത്തകള് വന്നിരുന്നു.
പ്രശാന്ത് നീലിന്റെ സംവിധാനത്തിലുള്ള പുതിയ ചിത്രത്തിലും പ്രഭാസാണ് നായകൻ. 'സലാര്' എന്ന് പേരിട്ടിരിക്കുന്ന ചിത്രത്തിലാണ് പ്രഭാസ് നായകനാകുന്നത്. 'കെജിഎഫി'ലൂടെ രാജ്യത്തെ സ്റ്റാര് സംവിധായകനായ പ്രശാന്ത് നീലും പ്രഭാസും ഒന്നിക്കുന്നുവെന്നതിനാല് ആരാധകര് ആകാംക്ഷയോടെ കാത്തിരിക്കുകയാണ് 'സലാറി'നായി. ശ്രുതി ഹാസൻ ആണ് ചിത്രത്തില് നായികയായി എത്തുന്നത്. മധു ഗുരുസ്വാമിയാണ് ചിത്രത്തില് പ്രതിനായക വേഷത്തില് അഭിനയിക്കുന്നത്. ഭുവൻ ഗൗഡയാണ് ചിത്രത്തിന്റെ ഛായാഗ്രാഹകൻ. രവി ബസ്രുറാണ് ചിത്രത്തിന്റെ സംഗീത സംവിധാനം നിര്വഹിക്കുന്നത്.
Read More: വിവിധ ഗെറ്റപ്പുകളില് വിസ്മയിപ്പിക്കാൻ കാര്ത്തി- 'സര്ദാര്' ടീസര്