ഇത് 'നഞ്ചപ്പന്‍'; വേറിട്ട മേക്കോവറില്‍ രജിത്ത് കുമാര്‍ സിനിമയില്‍

അഭിനയം കൂടാതെ ചിത്രത്തിന്‍റെ സഹസംവിധായകനായും പ്രവര്‍ത്തിച്ചിട്ടുണ്ട് രജിത്ത് കുമാര്‍

ബിഗ് ബോസ് മലയാളം സീസണ്‍ 2 ലെ ശ്രദ്ധേയ മത്സരാര്‍ഥി ആയിരുന്നു രജിത്ത് കുമാര്‍. ഈ സീസണില്‍ ചലഞ്ചര്‍ ആയും അദ്ദേഹം ബിഗ് ബോസ് ഹൌസില്‍ എത്തിയിരുന്നു. ബിഗ് ബോസില്‍ നിന്ന് പുറത്തെത്തിയതിനു ശേഷം പല സിനിമകളിലും അഭിനയിച്ചിട്ടുണ്ട് അദ്ദേഹം. ചാട്ടുളിയാണ് അദ്ദേഹത്തിന്‍റേതായി പുറത്തെത്താനിരിക്കുന്ന ഒരു ചിത്രം. ഇപ്പോഴിതാ ചിത്രത്തിലെ രജിത്ത് കുമാറിന്‍റെ കഥാപാത്രത്തെ അവതരിപ്പിക്കുന്ന ക്യാരക്റ്റര്‍ പോസ്റ്റര്‍ പുറത്ത് വിട്ടിരിക്കുകയാണ് അണിയറക്കാര്‍.

നഞ്ചപ്പന്‍ എന്നാണ് രജിത്ത് അവതരിപ്പിക്കുന്ന കഥാപാത്രത്തിന്‍റെ പേര്. നരച്ച താടിയും മുടിയുമുള്ള ഗെറ്റപ്പിലാണ് അദ്ദേഹം കഥാപാത്രമായിരിക്കുന്നത്. അഭിനയം കൂടാതെ ചിത്രത്തിന്‍റെ സഹസംവിധായകനായും പ്രവര്‍ത്തിച്ചിട്ടുണ്ട് രജിത്ത് കുമാര്‍. ഷൈൻ ടോം ചാക്കോ, ജാഫർ ഇടുക്കി, കലാഭവൻ ഷാജോൺ എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കിരിക്കുന്നത്. രാജ് ബാബു ആണ് സംവിധാനം. അട്ടപ്പാടിയിൽ ചിത്രീകരണം പൂർത്തിയാക്കിയ ഈ ചിത്രത്തിൽ കാർത്തിക് വിഷ്ണു, ശ്രുതി ജയൻ, ലത ദാസ്, വർഷ പ്രസാദ്, തുടങ്ങിയവരും അഭിനയിച്ചിരിക്കുന്നു.

നെൽസൺ ഐപ്പ് സിനിമാസ്, ഷാ ഫൈസി പ്രൊഡക്ഷൻസ്, നവതേജ് ഫിലിംസ് എന്നീ ബാനറുകളിൽ നെൽസൺ ഐപ്പ്, ഷാ ഫൈസി, സുജൻ കുമാർ എന്നിവർ ചേർന്നാണ് ചിത്രത്തിന്‍റെ നിര്‍മ്മാണം. കഥ, തിരക്കഥ, സംഭാഷണം ജയേഷ് മൈനാഗപ്പള്ളി എഴുതുന്നു. പ്രമോദ് കെ പിള്ള ഛായാഗ്രഹണം. ഏങ്ങണ്ടിയൂർ ചന്ദ്രശേഖരൻ, ആൻ്റണി പോൾ,നിഖിൽ എസ് മറ്റത്തിൽ, ഫൈസൽ പൊന്നാനി എന്നിവരുടെ വരികൾക്ക് ബിജിബാൽ, രാഹുൽ രാജ് ജസ്റ്റിൻ ഫിലിപ്പോസ് എന്നിവർ സംഗീതം പകരുന്നു. 

എക്സിക്യൂട്ടീവ് പ്രൊഡ്യൂസർ അജു വി എസ്, പ്രൊഡക്ഷൻ കൺട്രോളർ ഷാജി പട്ടിക്കര, എഡിറ്റർ അയൂബ് ഖാൻ, ബിജിഎം രാഹുൽ രാജ്, കല അപ്പുണ്ണി സാജൻ, മേക്കപ്പ് റഹിം കൊടുങ്ങല്ലൂർ, വസ്ത്രാലങ്കാരം രാധാകൃഷ്ണൻ മങ്ങാട്, അസോസിയേറ്റ് ഡയറക്ടർ രാഹുൽ കൃഷ്ണ, അസിസ്റ്റൻ്റ് ഡയറക്ടേഴ്സ് കൃഷ്ണകുമാർ ഭട്ട്, നൗഫൽ ഷാജ് ഉമ്മർ, ഡോ.രജിത്കുമാർ, പ്രൊഡക്ഷൻ എക്സിക്യൂട്ടീവ് ബാബുരാജ് മനിശ്ശേരി, ജബ്ബാർ മതിലകം, ലൊക്കേഷൻ മാനേജർ പ്രസാദ് ശ്രീകൃഷ്ണപുരം, സംഘട്ടനം ബ്രൂസ്‌ലി രാജേഷ്, പ്രദീപ് ദിനേശ്, സ്റ്റിൽസ് അനിൽ പേരാമ്പ്ര, പരസ്യകല ആന്റണി സ്റ്റീഫൻ, പി ആർ ഒ- എ എസ് ദിനേശ്.

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം