'ലൂക്ക് ആന്‍റണി' യൂറോപ്പിലേക്ക്; റോഷാക്ക് 12 രാജ്യങ്ങളില്‍ ഇന്ന് മുതല്‍

ചിത്രം ആദ്യ വാരാന്ത്യം കേരളത്തില്‍ നിന്നു മാത്രം നേടിയത് 9.75 കോടി ആയിരുന്നു

പ്രേക്ഷകശ്രദ്ധ നേടി തിയറ്ററുകളില്‍ തുടരുന്ന മമ്മൂട്ടി ചിത്രം റോഷാക്കിന്‍റെ യൂറോപ്യന്‍ റിലീസ് ഇന്ന്. കഴിഞ്ഞ വാരം ഇന്ത്യയ്ക്കൊപ്പം യുഎഇ, ഖത്തര്‍, ബഹ്റിന്‍, കുവൈറ്റ്, ഒമാന്‍ എന്നിവിടങ്ങളിലാണ് ചിത്രം ആദ്യം എത്തിയത്. യൂറോപ്പില്‍ ഉള്‍പ്പെടെ കൂടുതല്‍ വിജേശ രാജ്യങ്ങളില്‍ ഈ വാരം ചിത്രം പ്രദര്‍ശനം ആരംഭിക്കുകയാണ്. ഓസ്ട്രേലിയയിലും ന്യൂസന്‍ഡിലും ഇന്നലെ ചിത്രം പ്രദര്‍ശനം ആരംഭിച്ചിരുന്നു.

യുകെ, അയര്‍ലന്‍ഡ്, ജര്‍മനി, ഇറ്റലി, നെതര്‍ലാന്‍ഡ്സ്, മാള്‍ട്ട, മോള്‍ഡോവ, ജോര്‍ജിയ, ലക്സംബര്‍ഗ്, പോളണ്ട്, ബെല്‍ജിയം, ഓസ്ട്രിയ എന്നീ യൂറോപ്യന്‍ രാജ്യങ്ങളിലാണ് ഇന്ന് മുതല്‍ ചിത്രം പ്രദര്‍ശനം ആരംഭിക്കുന്നത്. സൌദി അറേബ്യയിലും ഈ വാരമാണ് റിലീസ്. ഇന്ത്യയിലും സൌദി ഒഴികെയുള്ള ജിസിസി രാജ്യങ്ങളിലെയും റിലീസിനു പിന്നാലെ വന്‍ മൌത്ത് പബ്ലിസിറ്റി നേടിയ ചിത്രം കൂടുതല്‍ വിദേശ മാര്‍ക്കറ്റുകളിലേക്ക് എത്തുന്നതോടെ കളക്ഷനിലും കാര്യമായ മുന്നേറ്റം ഉണ്ടാക്കാനാവുമെന്നാണ് വിലയിരുത്തല്‍.

ചിത്രം ആദ്യ വാരാന്ത്യം കേരളത്തില്‍ നിന്നു മാത്രം നേടിയത് 9.75 കോടി ആയിരുന്നു. ഇതേകാലയളവില്‍ ആഗോള മാര്‍ക്കറ്റുകളിലേതടക്കം ചിത്രം നേടിയ ആഗോള ഗ്രോസ് 20 കോടി വരുമെന്നാണ് ട്രേഡ് അനലിസ്റ്റുകള്‍ അറിയിച്ചത്. കെട്ട്യോളാണ് എന്‍റെ മാലാഖ എന്ന ചിത്രത്തിനു ശേഷം നിസാം ബഷീര്‍ സംവിധാനം ചെയ്‍തിരിക്കുന്ന ചിത്രം സൈക്കോളജിക്കല്‍ റിവഞ്ച് ഡ്രാമ വിഭാ​ഗത്തില്‍ പെടുന്ന ഒന്നാണ്. ചിത്രത്തിന്‍റെ തിരക്കഥ എഴുതിയിരിക്കുന്നത് സമീര്‍ അബ്ദുള്‍ ആണ്. അഡ്വേഞ്ചേഴ്സ് ഓഫ് ഓമനക്കുട്ടന്‍, ഇബ്‍ലീസ് എന്നീ ചിത്രങ്ങളിലൂടെ ശ്രദ്ധ നേടിയ തിരക്കഥാകൃത്താണ് സമീര്‍. നിമിഷ് രവി ഛായാഗ്രഹണം നിര്‍വ്വഹിച്ചിരിക്കുന്ന ചിത്രത്തിന്‍റെ സംഗീത വിഭാഗം കൈകാര്യം ചെയ്‍തിരിക്കുന്നത് മിഥുന്‍ മുകുന്ദന്‍ ആണ്. ലൂക്ക് ആന്‍റണി എന്ന നിഗൂഢതകളുള്ള ഒരു കഥാപാത്രത്തെയാണ് ചിത്രത്തില്‍ മമ്മൂട്ടി അവതരിപ്പിക്കുന്നത്. നടപ്പിലും എടുപ്പിലുമൊക്കെ മമ്മൂട്ടി ഇതുവരെ അവതരിപ്പിക്കാത്ത തരത്തിലുള്ള കഥാപാത്രമാണ് അത്. ബിന്ദു പണിക്കര്‍, ഷറഫുദ്ദീന്‍, കോട്ടയം നസീര്‍, ജഗദീഷ് തുടങ്ങിയവരൊക്കെ പ്രകടനം കൊണ്ട് ശ്രദ്ധിക്കപ്പെടുന്നുണ്ട് ചിത്രത്തില്‍.