സൈജു കുറുപ്പ് നായകനായി എത്തുന്ന 'സാക്ഷികൾ' ഓണം സ്‌പെഷ്യൽ പോസ്റ്റർ പുറത്ത്

എഴുത്തുകാരൻ പി.എസ്. അർജുൻ ആദ്യമായി സംവിധാനം ചെയ്യുന്ന 'സാക്ഷികൾ' എന്ന മിസ്റ്ററി ഡ്രാമയിൽ സൈജു കുറുപ്പ് കേന്ദ്ര കഥാപാത്രത്തെ അവതരിപ്പിക്കുന്നു.

സൈജു കുറുപ്പ് നായകനായി എത്തുന്ന ഏറ്റവും പുതിയ ചിത്രം 'സാക്ഷികൾ', എഴുത്തുകാരനും നോവലിസ്റ്റുമായ പി.എസ്. അർജുൻ ആദ്യമായി സംവിധാനം ചെയ്യുന്ന ചിത്രമാണ്. മിസ്റ്ററി ഡ്രാമ ഴോണറിൽ ഒരുങ്ങുന്ന ചിത്രത്തിന്റെ ഓണം സ്‌പെഷ്യൽ പോസ്റ്റർ പുറത്തുവിട്ടിരിക്കുകയാണ് അണിയറപ്രവർത്തകർ. സിനിമയുടെ തിരക്കഥ ഒരുക്കിയിരിക്കുന്നതും സംവിധായകൻ പിഎസ് അർജുൻ തന്നെയാണ്. രായര പിക്ചേഴ്സിന്റെ ബാനറിൽ പുനീത് നിർമ്മിക്കുന്ന ഈ ചിത്രം 2027ൽ തിയേറ്ററുകളിൽ എത്തിക്കാനാണ് ലക്ഷ്യമിടുന്നത്.

തന്റെ ജീവിതയാത്രയിൽ കണ്ടുമുട്ടിയ യഥാർത്ഥ കഥാപാത്രങ്ങളിൽ നിന്നും യഥാർത്ഥ സംഭവങ്ങളിൽ നിന്നും പ്രചോദനം ഉൾക്കൊണ്ടാണ് "സാക്ഷികൾ" എന്ന ഈ മിസ്റ്ററി ഡ്രാമ ഒരുക്കിയിരിക്കുന്നതെന്ന് ചിത്രത്തിന്റെ സംവിധായകനും തിരക്കഥാകൃത്തുമായ പി.എസ്. അർജുൻ പറഞ്ഞു. മുഖ്യ വേഷത്തിൽ എത്തുന്ന സൈജു കുറുപ്പിനൊപ്പം ഒരു മികച്ച താരനിര തന്നെയാണ് ചിത്രത്തിലെ ദുരൂഹതകൾ നിറഞ്ഞ കഥാപാത്രങ്ങളായി സ്ക്രീനിൽ എത്തുന്നത്. രഘുനാഥ് പലേരി, നിഷാന്ത് സാഗർ, അഭിമന്യു എസ്. തിലകൻ, ശീതൾ ജോസഫ്, അഭിരാം രാധാകൃഷ്ണൻ, നിരഞ്ജ് മണിയൻപിള്ള, ഗോകുലൻ എം.എസ്., ഹരിത് വിജയകൃഷ്ണൻ, ദേവനന്ദ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്.

ഈ ത്രില്ലർ ചിത്രത്തിന്റെ ദൃശ്യ-ശ്രാവ്യ ഭംഗി മികച്ചതാക്കാൻ പ്രതിഭകളായ ഒരു സാങ്കേതിക പ്രവർത്തകരും അണിനിരക്കുന്നുണ്ട്. ആനന്ദ് മീനാക്ഷിയാണ് ഛായാഗ്രഹണം നിർവ്വഹിക്കുന്നത്, എബി സാമുവൽ സംഗീത സംവിധാനവും റാത്തിൻ രാധാകൃഷ്ണൻ ചിത്രസംയോജനവും (എഡിറ്റിംഗ്) കൈകാര്യം ചെയ്യുന്നു. അജയ് മങ്ങാട് (കല), സുധി സുരേന്ദ്രൻ (ചമയം), അനീഷ് പെരമ്പിലാവ് (പ്രൊഡക്ഷൻ കൺട്രോളർ), ചീഫ് അസോസിയേറ്റ് ഡയറക്ടർ അനീഷ് ജോർജ്ജ്, അസോസിയേറ്റ് ഡയറക്ടർമാരായ രാകേഷ് കൃഷ്ണൻ ജി, ജിഷ്ണു ലക്ഷ്മൺ, പി.ആർ.ഓ പി.ശിവപ്രസാദ് എന്നിവരാണ് മറ്റ് അണിയറ പ്രവർത്തകർ.