'ഈദിന് സല്ലുഭായിയുടെ ആക്ഷന്‍ ധമാക്ക': സിക്കന്ദര്‍ ട്രെയിലര്‍ പുറത്തിറങ്ങി

സല്‍മാന്‍ ഖാന്‍റെ പുതിയ ചിത്രമായ സിക്കന്ദറിന്‍റെ ട്രെയിലര്‍ പുറത്തിറങ്ങി. റിലീസിന് മുന്‍പേ ചിത്രത്തിന്‍റെ ഒടിടി, സാറ്റലൈറ്റ് റൈറ്റ്സിലൂടെ 80 ശതമാനം മുതൽമുടക്കും തിരിച്ചുപിടിച്ച് സിനിമ.

മുംബൈ: ബോളിവുഡില്‍ ഏറ്റവും ആരാധകരുള്ള സൂപ്പര്‍താരങ്ങളില്‍ ഒരാളാണ് സല്‍മാന്‍ ഖാന്‍. ഉത്തരേന്ത്യന്‍ സിംഗിള്‍ സ്ക്രീനുകളില്‍ ഷാരൂഖ് ഖാനൊപ്പം ഏറ്റവും സ്വാധീനശേഷിയുള്ള താരവും. തന്‍റെ താരമൂല്യത്തിന് ചേരുന്ന മട്ടിലുള്ള ഒരു വിജയം സമീപകാലത്ത് സല്‍മാന് ഉണ്ടായിട്ടില്ല. ഇത് നികത്തുക എന്ന ഉദ്ദേശത്തിലാണ് സല്‍മാന്‍ പുതിയ ചിത്രമായ സിക്കന്ദറുമായി എത്തുന്നത്. ഈദിന് എത്തുന്ന ചിത്രം സംവിധാനം ചെയ്യുന്നത് എആര്‍ മുരുകദോസാണ്. 

സല്‍മാന്‍റെ വരാനിരിക്കുന്ന ചിത്രം സിക്കന്ദറിന്‍റെ ട്രെയിലര്‍ പുറത്തിറങ്ങി. മൂന്ന് മിനിറ്റ് 37 സെക്കൻഡ് ദൈർഘ്യമുള്ള ട്രെയിലർ ആരംഭിക്കുന്നത് സഞ്ജയ് രാജ്കോട്ട്  എന്ന വ്യക്തിയെ കാണിച്ചാണ്. പല കേസുകളില്‍ പ്രതിയായ സിക്കന്ദര്‍ എന്ന് വിളിക്കുന്ന സല്‍മാന്‍റെ ക്യാരക്ടറിന്‍റെ യാത്രയും, പ്രണയവും, ആക്ഷനും എല്ലാം നിറഞ്ഞതാണ് ട്രെയിലര്‍. 

180 കോടി നിര്‍മ്മാണച്ചെലവ് ഉള്ള സിനിമയാണ് ഇത്. സല്‍മാന്‍ ഖാന്‍റെ പ്രതിഫലം ഉള്‍പ്പെടെയുള്ള തുകയാണ് ഇത്. പബ്ലിസിറ്റിക്ക് 20 കോടിയോളമാണ് നിര്‍മ്മാതാവ് നീക്കിവച്ചിരിക്കുന്നത് എന്നാണ് റിപ്പോര്‍ട്ടുകള്‍. ഇത് കൂടി ചേര്‍ത്താല്‍ ചിത്രത്തിന്‍റെ ആകെ ബജറ്റ് 200 കോടി. 

എന്നാല്‍ റിലീസിന് മുന്‍പ് തന്നെ സല്‍മാന്‍ ഖാന്‍റെ താരപദവി നിര്‍മ്മാതാവിനെ സേഫ് ആക്കിയിട്ടുണ്ട്. ചിത്രത്തിന്‍റെ (പോസ്റ്റ് തിയട്രിക്കല്‍) ഒടിടി റൈറ്റ്സ് പ്രമുഖ പ്ലാറ്റ്ഫോം ആയ നെറ്റ്ഫ്ലിക്സിന് ആണ്. 85 കോടിയാണ് നെറ്റ്ഫ്ലിക്സുമായുള്ള കരാറിലൂടെ നിര്‍മ്മാതാവിന് ലഭിക്കുക.

എന്നാല്‍ ചിത്രം വന്‍ വിജയമായാല്‍ ഈ തുക വ്യത്യാസപ്പെടാം. അതായത് ചിത്രം ബോക്സ് ഓഫീസില്‍ 350 കോടിയിലേറെ നേടിയാല്‍ 85 കോടിയുടെ സ്ഥാനത്ത് നെറ്റ്ഫ്ലിക്സ് 100 കോടി വരെ നല്‍കും. ചിത്രത്തിന്‍റെ സാറ്റലൈറ്റ് റൈറ്റ് സീ ചാനലിലാണ്. 50 കോടിയാണ് സീ നല്‍കുന്നത്. 

ചിത്രത്തിന്‍റെ മ്യൂസിക് റൈറ്റ്സ് സീ മ്യൂസിക് കമ്പനിക്കാണ്. 30 കോടിയാണ് ഈ ഇനത്തില്‍ ലഭിക്കുക. എല്ലാം ചേര്‍ത്ത് നിലവില്‍ 165 കോടി, പടം 350 കോടിയിലേറെ ബോക്സ് ഓഫീസില്‍ നേടിയാല്‍ 180 കോടിയോളവും റൈറ്റ്സ് ഇനത്തില്‍ ചിത്രത്തിന് ലഭിക്കും. അതായത് റിലീസിന് മുന്‍പുതന്നെ ബജറ്റിന്‍റെ 80 ശതമാനവും ചിത്രം തിരിച്ചുപിടിച്ചിരിക്കുകയാണ്. റിലീസ് സമയത്ത് നിര്‍മ്മാതാവിന് കാര്യമായ റിസ്ക് ഇല്ല എന്നുവേണം പറയാന്‍.

സല്‍മാന്‍റെ കിക്ക് നിര്‍മ്മിച്ച സാജിദ് നഡ്വാലയാണ് ചിത്രം നിര്‍മ്മിക്കുന്നത്. എആര്‍ മുരുകദോസ് സംവിധാനം ചെയ്യുന്ന ആദ്യത്തെ ഹിന്ദി ഒറിജിനല്‍ സ്ക്രിപ്റ്റ് ചിത്രമാണ് സിക്കന്ദര്‍. രശ്മിക മന്ദാനയാണ് ചിത്രത്തിലെ നായിക. സത്യരാജും, കിഷോറും വില്ലന്‍ വേഷത്തില്‍ എത്തുന്നു. കാജല്‍ അഗര്‍വാള്‍ അടക്കം വലിയ താരനിര തന്നെ ചിത്രത്തിലുണ്ട്.