ശ്രീനിവാസനും ഹരീഷ് കണാരനും പ്രധാനവേഷത്തില്‍; ‘കുരുത്തോല പെരുന്നാളി‘ന് തുടക്കം

മലബാറിലെ കുടിയേറ്റ മേഖലയുടെ പശ്ചാത്തലത്തിലാണ് ചിത്രത്തിന്റെ കഥ പറയുന്നത്. 

ശ്രീനിവാസനും ഹരീഷ് കണാരനും പ്രധാന കഥാപാത്രങ്ങളാകുന്ന പുതിയ ചിത്രം ‘കുരുത്തോല പെരുന്നാള്‍’ ആരംഭിച്ചു. ചിത്രത്തിന്റെ പൂജ കൊച്ചിയില്‍ താരസംഘടനയായ അമ്മയുടെ ഓഫീസില്‍ വെച്ച് നടന്നു. നവാഗതനായ ഡി കെ ദിലീപ് സംവിധാനം ചെയ്യുന്ന ചിത്രത്തില്‍ ജാസി ഗിഫ്റ്റാണ് സംഗീത സംവിധാനം. 

ശ്രീനിവാസന്‍ ആണ് ചിത്രത്തിന്റെ ആദ്യ ഭദ്രദീപം തെളിയിച്ചത്. ചടങ്ങില്‍ ഇടവേള ബാബു, ജാസി ഗിഫ്റ്റ്, സജീഷ് മഞ്ചേരി, സിജി വാസു മാന്നാനം, ഹരിനാരായണന്‍, ദിനേശ് പണിക്കര്‍, ഛായാഗ്രാഹകന്‍ സജിത് വിസ്ത, തുടങ്ങിയവരും പങ്കെടുത്തു.

മിലാ ഗ്രോസ് എന്റര്‍ടൈന്‍മെന്റ് ആന്‍ഡ് മടപ്പുര മൂവിസിന്റെ ബാനറില്‍ സിജി വാസു മാന്നാനമാണ് ഈ ചിത്രം നിര്‍മ്മിക്കുന്നത്. മലബാറിലെ കുടിയേറ്റ മേഖലയുടെ പശ്ചാത്തലത്തിലാണ് ചിത്രത്തിന്റെ കഥ പറയുന്നത്. ശ്രീനിവാസനും ഹരീഷ് കണാരനും പുറമെ നിരവധി താരങ്ങളും പുതുമുഖങ്ങളും അണിനിരക്കുന്നുണ്ട്. ഹരി നാരായണനാണ് ചിത്രത്തിലെ ഗാനങ്ങള്‍ എഴുതിയിരിക്കുന്നത്. പി.ആര്‍.ഒ ആതിര ദില്‍ജിത്ത്.