10 ചിത്രങ്ങൾ, രജനികാന്തിനെ പിന്തള്ളി വിജയ് മുന്നില്‍; പ്രീ-സെയിൽ കണക്കുമായി ഏരീസ് പ്ലെക്സ്

ഇന്ന് രാവിലെ പത്ത് മണി മുതൽ ആയിരുന്നു ലിയോയുടെ ടിക്കറ്റ് ബുക്കിം​ഗ് ആരംഭിച്ചത്.

കേരളത്തിൽ ഏറ്റവും കൂടുതൽ ആരാധകരുള്ള അന്യഭാഷ നടൻ ആരാണെന്ന ചോദ്യത്തിന് ഒരു ഉത്തരമെ ഉണ്ടാകൂ. ദളപതി വിജയ്. നടന്റേതായി റിലീസ് ചെയ്യുന്ന എല്ലാ ചിത്രങ്ങൾക്കും വൻവരവേൽപ്പാണ് കേരളക്കര നൽകുന്നത്. ലിയോയ്ക്കും അങ്ങനെ തന്നെ. ഇന്നാരംഭിച്ച ടിക്കറ്റ് ബുക്കിം​ഗ് കണക്കുകൾ മതിയാകും കേരളക്കര എങ്ങനെ ആണ് ചിത്രത്തെ ആഘോഷമാക്കുന്നതെന്ന് അറിയാൻ. 

ഈ അവസരത്തിൽ ആദ്യദിനത്തിലെ പ്രീ-സെയിൽ കണക്ക് പുറത്തുവിട്ടിരിക്കുകയാണ് തിരുവനന്തപുരത്തെ പ്രധാന തിയറ്റര്‍ ആയ ഏരീസ് പ്ലെക്സ്. കഴിഞ്ഞ ദിവസം വരെയും ആദ്യദിന പ്രീ സെയിലിൽ മുന്നിലുണ്ടായിരുന്നത് രജനികാന്ത് നായകനായി എത്തിയ 2 പോയിന്റ് സീറോ ആയിരുന്നു. എന്നാൽ ഇന്നത്തോടെ ആ കണക്ക് പഴങ്കഥ ആയി. ലിയോയാണ് ഏരീസ് പ്ലെക്സിൽ ഇപ്പോൾ മുന്നിൽ നിൽക്കുന്ന ചിത്രം. 

ഏരീസ് പ്ലെക്സ് ആദ്യദിന പ്രീ- സെയിൽ കണക്ക് ഇങ്ങനെ

ലിയോ - 16.53ലക്ഷം
2Point0- 16.44 ലക്ഷം
ബീസ്റ്റ്- 16.24ലക്ഷം
സർക്കാർ- 15.6ലക്ഷം
കെജിഎഫ് 2- 13.38ലക്ഷം
ജയിലർ- 12.95ലക്ഷം
ബി​ഗിൽ- 12.67ലക്ഷം
ഭൈരവ- 11.2ലക്ഷം
ബാഹുബലി 2- 10.34ലക്ഷം
മെൽസൽ- 10.26 ലക്ഷം

ഇന്ന് രാവിലെ പത്ത് മണി മുതൽ ആയിരുന്നു ലിയോയുടെ ടിക്കറ്റ് ബുക്കിം​ഗ് ആരംഭിച്ചത്. ഭൂരിഭാ​ഗം തിയറ്ററിലും വൻ തിരക്കാണ് അനുഭവപ്പെട്ടത്. 80,0000ത്തോളം ടിക്കറ്റുകളാണ് ബുക്ക് മൈ ഷോയിൽ നിന്നുമാത്രം വിറ്റു പോയത്. കേരളത്തിൽ ഇതുവരെ  ആറ് കോടിയോളം നേടിക്കഴിഞ്ഞു. ആ​ഗോള തലത്തിൽ നാൽപത് കോടിക്ക് മേൽ ബിസിനസ് നടന്നുവെന്നാണ് ട്രേഡ് അനലിസ്റ്റുകൾ പറയുന്നത്. ലോകേഷ് കനകരാജ് സംവിധാനം ചെയ്ത ലിയോ ഒകടോബർ 19ന് തിയറ്ററിൽ എത്തും. 

ഏഷ്യാനെറ്റ് ന്യൂസ് തത്സമയ വാർത്തകൾ..