'ടോക്സിക്' സിനിമയുടെ പ്രൊമോഷനിടെ അപകടം; രണ്ട് വിദ്യാർഥികൾക്ക് പരിക്ക്

യഷ് പങ്കെടുത്ത ചടങ്ങിൽ രണ്ട് വിദ്യാർത്ഥികൾക്ക് പരിക്കേറ്റു.

ഹൈദരാബാദ്: യഷ് നായകനായി പുറത്തിറങ്ങാനിരിക്കുന്ന പാന്‍ ഇന്ത്യന്‍ ബിഗ് ബജറ്റ് ചിത്രം ടോക്സിക്കിന്‍റെ പ്രൊമോഷനിടെ അപകടം. ഹൈദരാബാദിലെ മല്ല റെഡ്ഡി സര്‍വ്വകലാശാലയിലാണ് സംഭവം. വേദിക്ക് സമീപം ഒരുക്കിയിരുന്ന വലിയ സ്പീക്കർ സിസ്റ്റം നിലംപൊത്തുകയായിരുന്നു. ഒപ്പം പ്രദേശത്ത് സജ്ജീകരിച്ചിരുന്ന ഫ്ലഡ് ലൈറ്റുകളും താഴേക്ക് പതിച്ചു. രണ്ട് വിദ്യാർത്ഥികൾക്ക് പരിക്കേറ്റിട്ടുണ്ട്. ഒരു വിദ്യാർത്ഥിനി അബോധാവസ്ഥയിലാണെന്നാണ് റിപ്പോർട്ട്. നായകൻ യഷ് ഉൾപ്പെടെ പങ്കെടുത്ത ചടങ്ങിൽ ആയിരുന്നു അപകടം.

കരിയറിലെ ഏറ്റവും വലിയ വിജയമായ കെജിഎഫ് ഫ്രാഞ്ചൈസിക്ക് ശേഷം യഷ് നായകനായി എത്തുന്ന ചിത്രമെന്ന നിലയില്‍ വലിയ പ്രീ റിലീസ് ഹൈപ്പ് ഇതിനകം നേടിയിട്ടുള്ള ചിത്രമാണ് ടോക്സിക്. മലയാളി സംവിധായിക ഗീതു മോഹന്‍ദാസ് ആണ് ചിത്രം സംവിധാനം ചെയ്യുന്നത് എന്നതും കൗതുകം. രാജീവ് രവിയാണ് ഛായാഗ്രഹണം. ചിത്രത്തിന്‍റെ പുറത്തെത്തിയ പ്രൊമോഷണല്‍ മെറ്റീരിയലുകളൊക്കെ പ്രേക്ഷകര്‍ക്കിടയില്‍ ചര്‍ച്ചയായിരുന്നു. റിലീസ് പലകുറി മാറ്റിവെക്കപ്പെട്ട ചിത്രം ഒടുവില്‍ തിയറ്ററുകളിലെത്തുന്നത് തിരുവോണ ദിനമായ 26 നാണ്. ആക്ഷനും ഇമോഷനും വയലൻസിനും പ്രാധാന്യമുള്ളൊരു സിനിമയാകും ഇതെന്നാണ് ട്രെയിലർ നൽകിയ സൂചന. ചിത്രത്തിന്‍റെ അഡ്വാന്‍സ് ബുക്കിംഗ് ഇതിനകം ആരംഭിച്ചിട്ടുണ്ട്.

യഷും ഗീതു മോഹൻദാസും ചേർന്ന് തിരക്കഥ രചിച്ച്, ഗീതു മോഹൻദാസ് സംവിധാനം ചെയ്യുന്ന ചിത്രം കന്നഡയിലും ഇംഗ്ലീഷിലും ഒരേസമയം ചിത്രീകരിച്ചിട്ടുണ്ട്. ഹിന്ദി, തെലുങ്ക്, തമിഴ്, മലയാളം ഉൾപ്പെടെ നിരവധി ഭാഷകളിൽ ഡബ്ബിംഗ് പതിപ്പുകൾ ഒരുക്കുന്ന ചിത്രം, ആഗോള പ്രേക്ഷകരെയാണ് ലക്ഷ്യമിടുന്നത്. സാങ്കേതികമായി മികച്ചൊരു ടീമും ചിത്രത്തിനുണ്ട്. ദേശീയ അവാർഡ് ജേതാവായ രാജീവ് രവി (ഛായാഗ്രഹണം), രവി ബസ്രൂർ (സംഗീതം), ഉജ്വൽ കുൽക്കർണി (എഡിറ്റിംഗ്), ടി.പി. അബിദ് (പ്രൊഡക്ഷൻ ഡിസൈൻ). ആക്ഷൻ രംഗങ്ങൾ ഹോളിവുഡ് ആക്ഷൻ ഡയറക്ടർ ജെ.ജെ. പെറി (ജോൺ വിക്ക്), ദേശീയ അവാർഡ് ജേതാക്കളായ അൻപറിവ് ഒപ്പം കേച ഖംഫാക്ഡി എന്നിവർ ചേർന്നാണ് ഒരുക്കുന്നത്. വെങ്കട് കെ. നാരായണയും യാഷും ചേർന്ന് കെവിഎന്‍ പ്രൊഡക്ഷൻസ്, മോൺസ്റ്റർ മൈൻഡ് ക്രിയേഷൻസ് എന്നീ ബാനറുകളിൽ നിർമ്മിക്കുന്ന ചിത്രമാണ് ടോക്സിക്. കെജിഎഫ് കഴിഞ്ഞ് നീണ്ട ഇടവേളയ്ക്ക് ശേഷം എത്തുന്ന ചിത്രമായതിനാല്‍ യഷിനെ സംബന്ധിച്ച് ഒരു വലിയ വിജയം അത്യന്താപേക്ഷിതമാണ്.