ഹാട്രിക്കിന് ശേഷവും തുടരുമോ ബോക്സ് ഓഫീസിലെ 'ലാല് മാജിക്'? ആ കാഴ്ചയ്ക്ക് 2 ദിനങ്ങളുടെ കാത്തിരിപ്പ്
Synopsis
ഈ വര്ഷം വന് വിജയങ്ങള് നേടിയ മോഹന്ലാലിന്റെ അടുത്ത ചിത്രം 'വൃഷഭ'യെക്കുറിച്ചുള്ള പുതിയ അപ്ഡേറ്റ് എത്തി. നന്ദകിഷോര് സംവിധാനം ചെയ്യുന്ന ഈ പാന് ഇന്ത്യന് ആക്ഷന് ഡ്രാമയുടെ ടീസര് സംബന്ധിച്ച അപ്ഡേറ്റ്
മോഹന്ലാലിന്റെ അതിശക്തമായ തിരിച്ചുവരവ് മലയാള സിനിമ കണ്ട വര്ഷമാണ് ഇത്. മോഹന്ലാല് നായകനായ മൂന്ന് ചിത്രങ്ങളാണ് ഈ വര്ഷം ഇതുവരെ തിയറ്ററുകളില് എത്തിയത്. എമ്പുരാന്, തുടരും, ഹൃദയപൂര്വ്വം എന്നിവ. ഇതില് എമ്പുരാന് ഒരു മലയാള സിനിമ ചരിത്രത്തില് നേടുന്ന ഏറ്റവും വലിയ കളക്ഷന് സ്വന്തമാക്കിയപ്പോള് തുടരും കേരളത്തില് നിന്ന് മാത്രം 100 കോടി നേടുന്ന ആദ്യ ചിത്രമായി മാറി. ഫീല് ഗുഡ് ചിത്രമായ ഓണം റിലീസ് ഹൃദയപൂര്വ്വം 75 കോടിയിലേക്ക് അടുക്കുന്നു. ഇപ്പോഴിതാ മോഹന്ലാലിന്റെ ഈ വര്ഷത്തെ അവസാന റിലീസ് സംബന്ധിച്ച ഒരു പ്രധാന അപ്ഡേറ്റ് എത്തിയിരിക്കുകയാണ്.
മോഹന്ലാലിനെ നായകനാക്കി നന്ദകിഷോര് രചനയും സംവിധാനവും നിര്വ്വഹിക്കുന്ന തെലുങ്ക്- മലയാളം ദ്വിഭാഷാ ചിത്രം വൃഷഭയെ സംബന്ധിച്ചുള്ള അപ്ഡേറ്റ് ആണ് ഇത്. ചിത്രത്തിന്റെ ടീസര് രണ്ട് ദിവസത്തിനകം എത്തും എന്നതാണ് ഇത്. സെപ്റ്റംബര് 18 ആണ് ടീസര് റിലീസ് ഡേറ്റ്. എപിക് ആക്ഷന് ഡ്രാമ വിഭാഗത്തില് പെടുന്ന ചിത്രത്തിലെ മോഹന്ലാലിന്റെ കഥാപാത്രത്തെ അവതരിപ്പിക്കുന്നതാണ് ടീസര് റിലീസ് സംബന്ധിച്ച അനൗണ്സ്മെന്റ് പോസ്റ്റര്.
ബാലാജി മോഷന് പിക്ചേഴ്സ്, കണക്റ്റ് മീഡിയ, എവിഎസ് സ്റ്റുഡിയോസ് എന്നീ ബാനറുകളില് ശോഭ കപൂര്, ഏക്താ കപൂര്, സി കെ പദ്മകുമാര്, വരുണ് മാത്തൂര്, സൗരഭ് മിശ്ര, അഭിഷേക് വ്യാസ്, വിശാല് ഗുര്നാനി, ജൂഹി പരേഖ് എന്നിവര് ചേര്ന്നാണ് ചിത്രത്തിന്റെ നിര്മ്മാണം. തെലുങ്ക്, മലയാളം ഭാഷകളിലായാണ് ചിത്രീകരിച്ചിരിക്കുന്നതെങ്കിലും അഞ്ച് ഭാഷാ പതിപ്പുകളിലായി പാന് ഇന്ത്യന് റിലീസ് ആയാവും ചിത്രം എത്തുക. ദേവിശ്രീ പ്രസാദിന്റേതാണ് സംഗീതം.
സമര്ജിത് ലങ്കേഷ്, സിദ്ദിഖ്, ഷനയ കപൂര്, സെഹ്റ എസ് ഖാന്, ശ്രീകാന്ത്, രാഗിണി ദ്വിവേദി, രാമചന്ദ്ര രാജു, നേഹ സക്സേന, മഹേന്ദ്ര രജ്പുത്, സി എച്ച് ചന്ദ്രകാന്ത് തുടങ്ങിയവരാണ് മോഹന്ലാല് നായകനാവുന്ന ചിത്രത്തില് മറ്റ് കഥാപാത്രങ്ങളെ അവതരിപ്പിക്കുന്നത്. ആന്റണി സാംസണ് ആണ് ചിത്രത്തിന്റെ ഛായാഗ്രഹണം. ദീപാവലി റിലീസ് ആയി ഒക്ടോബര് 16 നാണ് ചിത്രം തിയറ്ററുകളില് എത്തുക. വിഷ്ണു മഞ്ചു നായകനായ കണ്ണപ്പ എന്ന പാന് ഇന്ത്യന് ചിത്രവും മോഹന്ലാലിന്റേതായി ഈ വര്ഷം തിയറ്ററുകളില് എത്തിയിരുന്നു. എന്നാല് അതില് അതിഥിവേഷത്തിലായിരുന്നു മോഹന്ലാല്.