'താരങ്ങളെ വിലക്കാന് ഞങ്ങള്ക്ക് അധികാരമില്ല'; പറഞ്ഞത് ദിവസ വേതനക്കാരുടെ കാര്യമെന്ന് ഫെഫ്സി
Synopsis
മലയാളത്തില് നിന്ന് അടക്കമുള്ള ഇതരഭാഷാ താരങ്ങളെ തമിഴ് സിനിമയില് അഭിനയിപ്പിക്കരുതെന്നാണ് ഫെഫ്സി പ്രസ്താവനയിലൂടെ അര്ഥമാക്കിയതെന്ന വിലയിരുത്തലില് പ്രതിഷേധം ഉയര്ന്നിരുന്നു
തമിഴ് സിനിമയില് തമിഴ് കലാകാരന്മാരെ മാത്രം സഹകരിപ്പിച്ചാല് മതിയെന്ന നിര്ദേശത്തെ തുടര്ന്ന് ഉയര്ന്ന വിവാദത്തില് പ്രതികരണവുമായി ഫിലിം എംപ്ലോയീസ് ഫെഡറേഷന് ഓഫ് സൌത്ത് ഇന്ത്യ (ഫെഫ്സി). ഇതരഭാഷാ താരങ്ങളെ തമിഴ് സിനിമയില് അഭിനയിപ്പിക്കുന്നതിനെ സംഘടന എതിര്ക്കുന്നു എന്ന തരത്തിലാണ് ഇതി റിപ്പോര്ട്ട് ചെയ്യപ്പെട്ടത്. എന്നാല് താരങ്ങളുടെ കാര്യമല്ല തങ്ങള് ഉദ്ദേശിച്ചതെന്നും അഭിനേതാക്കളെ വിലക്കാന് തങ്ങളുടെ സംഘടനയ്ക്ക് അധികാരമില്ലെന്നും ഫെഫ്സി ജനറല് സെക്രട്ടറി ഡെക്കാണ് ക്രോണിക്കിളിനോട് പറഞ്ഞു.
മലയാളത്തില് നിന്ന് അടക്കമുള്ള ഇതരഭാഷാ താരങ്ങളെ തമിഴ് സിനിമയില് അഭിനയിപ്പിക്കരുതെന്നാണ് ഫെഫ്സി പ്രസ്താവനയിലൂടെ അര്ഥമാക്കിയതെന്ന വിലയിരുത്തലില് പ്രതിഷേധം ഉയര്ന്നിരുന്നു. സംവിധായകന് വിനയന്, നടന് റിയാസ് ഖാന് എന്നിവര് മലയാള സിനിമയില് നിന്ന് ഫെഫ്സിക്കെതിരെ രംഗത്തെത്തിയിരുന്നു. തെലുങ്ക് സിനിമാ മേഖലയില് നിന്നും പ്രതിഷേധം ഉയര്ന്നിരുന്നു. തെലുങ്ക് മേഖലയുടെ പ്രതിഷേധത്തിന്റെ പശ്ചാത്തലത്തിലാണ് ഫെഫ്സി ജനറല് സെക്രട്ടറിയുടെ പ്രതികരണം.
"അടിസ്ഥാനരഹിതമായ പ്രചരണങ്ങളാണ് നടക്കുന്നത്. സിനിമയില് 24 തരത്തിലുള്ള ജോലികള് ചെയ്യുന്ന ആയിരക്കണക്കിന് തൊഴിലാളികളുടെ ക്ഷേമം മുന്നിര്ത്തി പ്രവര്ത്തിക്കുന്ന സംഘടനയാണ് ഞങ്ങളുടേത്. മുംബൈ ആസ്ഥാനമായി പ്രവര്ത്തിക്കുന്ന ലൈറ്റ് ആന്ഡ് ലൈറ്റ് എന്ന കമ്പനിയുമായി ദിവസവേതനക്കാരായ തൊഴിലാളികളുടെ കാര്യം സംബന്ധിച്ച് ഞങ്ങള്ക്ക് ചില അഭിപ്രായവ്യത്യാസങ്ങള് ഉണ്ടായിരുന്നു. ഭൂരിഭാഗം തമിഴ് സിനിമകളും ഈ കമ്പനിയുടെ ലൈറ്റുകളും മറ്റ് ഉപകരണങ്ങളുമാണ് ഉപയോഗിക്കുന്നതിനാല് ജോലികളില് ഉള്പ്പെടുത്തേണ്ട തമിഴ് തൊഴിലാളികളുടെ കാര്യം ഞങ്ങള് പറഞ്ഞിരുന്നു. എന്നാല് അവര് ഇതിനോട് സഹകരിച്ചിരുന്നില്ല. ഒരു വര്ഷത്തിനിപ്പുറവും മാറ്റമൊന്നും കാണാത്തതിനാല് ലൈറ്റിംഗ് മേഖലയിലെ 2000 ല് അധികം തൊഴിലാളികളുടെ ജീവിതമാര്ഗം സംരക്ഷിക്കാനായി ഞങ്ങള് ഈ കമ്പനിയോട് നിസ്സഹകരണം പ്രഖ്യാപിച്ചിരുന്നു", ജനറല് സെക്രട്ടറി പറയുന്നു.
മറ്റ് സംസ്ഥാനങ്ങളില് നിന്നുള്ളവര്ക്ക് വിലക്കുകളൊന്നും തങ്ങള് കല്പ്പിച്ചിട്ടില്ലെന്നും പ്രധാന ടെക്നീഷ്യന്മാര് വരെ പുറത്ത് നിന്ന് വരാറുണ്ടെന്നും ഫെഫ്സി ജനറല് സെക്രട്ടറി പറയുന്നു. "ഞങ്ങളുടെ ഡാന്സേഴ്സും ഫൈറ്റേഴ്സും 50 ശതമാനം പ്രാതിനിധ്യത്തോടെ തെലുങ്ക് സിനിമയില് പ്രവര്ത്തിക്കാറുണ്ട്. അതുപോലെ അവര്ക്കും ഈ രീതിയില് തമിഴ് സിനിമയില് പ്രവര്ത്തിക്കാം. ഇത്തവണ ഞങ്ങള് പറഞ്ഞിട്ടുള്ളത് ദിവസ വേതനക്കാരുടെ കാര്യം മാത്രമാണ്. മറ്റൊന്നുമല്ല", ഫെഫ്സി ജനറല് സെക്രട്ടറി പറഞ്ഞവസാനിപ്പിക്കുന്നു. തമിഴ് സിനിമ, ടെലിവിഷന് മേഖലകളിലായുള്ള 23 ട്രേഡ് യൂണിയനുകളുടെ കൂട്ടായ്മയാണ് ഫെഫ്സി. 25000 അഗങ്ങളുണ്ട് സംഘടനയില്.
ALSO READ : 'ഇപ്പോഴും ശത്രുക്കളോ'? സ്റ്റാര് സിംഗര് വേദിയില് മറുപടിയുമായി അഖിലും ശോഭയും: വീഡിയോ
ഏഷ്യാനെറ്റ് ന്യൂസ് ലൈവ് കാണാന് ഇവിടെ ക്ലിക്ക് ചെയ്യുക