കളക്ഷനിൽ ഉയരെ പറന്ന് ​​'ഗരുഡൻ​'; ഹൗസ് ഫുൾ ഷോകൾ, ആ​ഗോളതലത്തിൽ സുരേഷ് ​ഗോപി ചിത്രം നേടിയത്

ഒക്ടോബർ മൂന്നിന് ആണ് ​ഗരുഡൻ റിലീസ് ചെയ്തത്.

ഇന്നത്തെ കാലത്ത് ഒരു സിനിമയ്ക്ക് ആദ്യദിനം മികച്ച പ്രതികരണം ലഭിക്കുക എന്നത് ഏറെ ബുദ്ധിമുട്ടുള്ള കാര്യമാണ്. പ്രത്യേകിച്ച് ഫസ്റ്റ് ഷോ കഴിയുമ്പോൾ. ഒപ്പം മൗത്ത് പബ്ലിസിറ്റിയും. സമീപകാലത്ത് ഈ പറഞ്ഞ കാര്യങ്ങൾ ലഭിച്ച ചില സിനിമകൾ ഉണ്ട്. അക്കൂട്ടത്തിലേക്ക് എത്തിയിരിക്കുകയാണ് ​'ഗരുഡനും'. സുരേഷ് ​ഗോപി പൊലീസ് വേഷത്തിൽ എത്തി അമ്പരപ്പിച്ച ചിത്രത്തിൽ ബിജു മേനോൻ കൂടി ആയപ്പോൾ ഒന്നൊന്നര ത്രില്ലർ ചിത്രം. ത്രില്ലർ സിനിമകൾ എഴുതാൻ നിലവിൽ അ​ഗ്ര​ഗണ്യനാണ് താനെന്ന് ആദ്യ സിനിമയിലൂടെ തന്നെ തെളിയിച്ച മിഥുൻ മാനുവൽ ആണ് സിനിമയുടെ തിരക്കഥ. പ്രേക്ഷക- നിരൂപക പ്രശംസകൾ നേടി ​'ഗരുഡൻ' തിയറ്ററുകളിൽ പറന്നു നടക്കുമ്പോൾ ബോക്സ് ഓഫീസ് കളക്ഷൻ വിവരങ്ങളാണ് പുറത്തുവരുന്നത്. 

രണ്ട് ദിവസത്തിൽ ​ഗരുഡൻ ആ​ഗോള തലത്തിൽ നേടിയ കളക്ഷനാണ് പുറത്തുവന്നിരിക്കുന്നത്. കേരളത്തിൽ നിന്നും 2.8 കോടിയാണ് ചിത്രം നേടിയതെന്ന് ട്രേഡ് അനലിസ്റ്റുകൾ പറയുന്നു. ആ​ഗോളതലത്തിൽ അത് 6.5 കോടിയാണെന്ന് അനലിസ്റ്റുകൾ വിലയിരുത്തുന്നു. ​ഗൾഫ് രാജ്യങ്ങളിൽ ആദ്യ രണ്ട് ദിനത്തിൽ 3 കോടിയാണ് ചിത്രം നേടിയിരിക്കുന്നത് എന്നാണ് കണക്കുകൾ. 

അതേസമയം, ആദ്യദിനത്തെ അപേക്ഷിച്ച് ​ഗരുഡന് കൂടുതൽ ഹൗസ് ഫുൾ ഷോകൾ ലഭിച്ചിരിക്കുകയാണ്. ഈ സന്തോഷം മിഥുൻ മാനുവൽ തോമസ് പങ്കുവച്ചിട്ടുമുണ്ട്. അതേസമയം, ചിത്രത്തിന്റെ വിജയത്തോട് അനുബന്ധിച്ച് പുതിയ പോസ്റ്ററും അണിയറ പ്രവർത്തകർ പുറത്തിറക്കിയിട്ടുണ്ട്. 'അവസാനിച്ചു എന്ന് തോന്നുന്നിടത്തു നിന്ന് ആളിപ്പടരുന്ന ഒരു ​ഗംഭീര ത്രില്ലർ' എന്നാണ് പോസ്റ്ററിൽ കുറിച്ചിരിക്കുന്ന വാചകം. 

ഒക്ടോബർ മൂന്നിന് ആണ് ​ഗരുഡൻ റിലീസ് ചെയ്തത്. നവാ​ഗതനായ അരുൺ വർമയാണ് സംവിധാനം. സുരേഷ് ​ഗോപി, ബിജു മേനോൻ എന്നിവർക്ക് ഒപ്പം തലൈവാസൽ വിജയ്, സിദ്ദിഖ്, അഭിരാമി, നിഷാന്ത് സാ​ഗർ തുടങ്ങി ഒട്ടനവധി താരങ്ങളും പ്രധാന വേഷത്തിൽ എത്തിയിട്ടുണ്ട്. 

ഏഷ്യാനെറ്റ് ന്യൂസ് തത്സമയ വാർത്തകൾ..