'എനിക്ക് ആ സുഹൃത്തിനെ ഒഴിവാക്കേണ്ടി വന്നു, ഇപ്പോൾ ഇരുപത് വർഷം'; തുറന്നുപറഞ്ഞ് തങ്കച്ചൻ

ഇരുപത് വർഷം മുൻപ് ഒറ്റ രാത്രികൊണ്ട് പുകവലി നിർത്തിയതിനെക്കുറിച്ച് തങ്കച്ചൻ വിതുര തുറന്നുപറഞ്ഞു. ആരോഗ്യം നശിപ്പിക്കുകയും മറ്റുള്ളവരുടെ മുന്നിൽ തരംതാഴ്ത്തുകയും ചെയ്യുന്ന ഒരു ചീത്ത സുഹൃത്തായിരുന്നു പുകവലിയെന്ന് അദ്ദേഹം പറയുന്നു.

പുകവലി ഉപേക്ഷിച്ചതിനെക്കുറിച്ച് തുറന്നുപറഞ്ഞ് തങ്കച്ചൻ വിതുര. പുകവലി നിർത്തിയിട്ട് ഇരുപതു വർഷത്തോളമായെന്നും ഒറ്റ രാത്രി കൊണ്ട് എടുത്ത തീരുമാനമായിരുന്നു അതെന്നും തങ്കച്ചൻ പറയുന്നു. ''ഞാന്‍ ആത്മാര്‍ത്ഥമായി സ്‌നേഹിച്ച് കൂടെ കൊണ്ടു നടന്ന ഒരു സുഹൃത്തിനെ ഒരു നിമിഷം കൊണ്ട് എനിക്ക് ഒഴിവാക്കേണ്ടി വന്നു. നമ്മളെ ആജ്ഞാപിക്കുകയും നമ്മളെ ഭരിക്കുകയും ഉറക്കം കെടുത്തുകയും, മറ്റുള്ളവരുടെ മുന്‍പില്‍ തരംതാഴ്ത്തുകയും, മറ്റുള്ളവരോട് നമ്മള്‍ കൈ കാണിക്കേണ്ടി വരുന്ന ഒരു സാഹചര്യവുമൊക്കെ ഈ സുഹൃത്ത് കാരണം എനിക്കുണ്ടായി. അതുകൊണ്ട് എനിക്കാ സുഹൃത്തിനെ ഒഴിവാക്കേണ്ടി വന്നു. സുഹൃത്ത് മറ്റാരുമല്ല, എന്റെ പുകവലിയായിരുന്നു.

''സിഗരറ്റും ബീഡിയുമൊക്കെ ഞാന്‍ വലിക്കുമായിരുന്നു. നമ്മള്‍ കാശ് കൊടുത്ത് വാങ്ങണം, വലിക്കണം എന്നത് മാത്രമല്ല, അത് നമ്മുടെ ആരോഗ്യം ഇല്ലാതാക്കുകയും ചെയ്യും. അത് മാത്രമല്ല, ഇത് കിട്ടാതാവുമ്പോള്‍ നമുക്ക് മറ്റുള്ളവരുടെ മുന്നില്‍ കൈ നീട്ടേണ്ടി വരും. അങ്ങനെ വന്നപ്പോള്‍ നിര്‍ത്താം എന്ന് ഞാനും തീരുമാനിച്ചു. എല്ലാവരും ചെയ്യുന്നത് പോലെ ഒന്നാം തിയ്യതി നിര്‍ത്തും. ഡിസംബര്‍ 31 ന് നിര്‍ത്തും രാഹുകാലം നോക്കി നിര്‍ത്തും എന്നൊന്നും പറയാന്‍ ഞാന്‍ നിന്നില്ല, ഒറ്റ രാത്രികൊണ്ട് എടുത്ത തീരുമാനമാണ്, അന്ന് തന്നെ നിര്‍ത്തി. പുകവലി നിര്‍ത്തിയിട്ട് ഇപ്പോള്‍ ഇരുപത്ത് വര്‍ഷത്തിലേറെയായി'', എന്ന് തങ്കച്ചൻ പറയുന്നു.

''നമ്മളെ നശിപ്പിക്കുകയും നമ്മുടെ ആരോഗ്യത്തെ ഇല്ലാതാക്കുകയും, നമ്മുടെ ഉറക്കത്തെ ഇല്ലാതാക്കുകയുമൊക്കെ ചെയ്യുന്ന ഏതൊരു സുഹൃത്താണെങ്കില്‍ പോലും, അല്ലെങ്കില്‍ പുകവലിയും മദ്യപാനവും പോലുള്ള മോശപ്പെട്ട ശീലങ്ങളാണെങ്കിലും ഒഴിവാക്കുക തന്നെ വേണം'', എന്നും തങ്കച്ചൻ പറയുന്നു. തങ്കച്ചനെ പോലെ ഒരാൾ ഇത്തരം കാര്യങ്ങൾ തുറന്ന് പറയുമ്പോൾ പലർക്കും അതൊരു മാതൃകയാണ് എന്നാണ് വീഡിയോയ്ക്കു താഴെ പലരും കമന്റ് ചെയ്യുന്നത്.