‘കുടുംബ’ സിനിമകളുടെ പ്രദർശനത്തിൽ നിന്ന്​ വിദ്യാ ബാലൻ വിട്ടുനിൽക്കും

ഭർത്താവിന്‍റെയും ഭർതൃസഹോദരങ്ങളുടെയും സിനിമകളുടെ പ്രദർശനത്തിൽ നിന്ന്​ സ്വയം വിട്ടുനിൽക്കാൻ സെൻട്രൽ ബോർഡ്​ ഒാഫ്​ ഫിലിം സർട്ടിഫിക്കേഷൻ അംഗം കൂടിയായ നടി വിദ്യാബാലൻ തീരുമാനിച്ചു. താൻ കൂടി ഇരുന്നുകൊണ്ടുള്ള തീരുമാനങ്ങൾ വിവാദമകാനുളള സാധ്യതകൾ മുന്നിൽകണ്ടാണ്​ താരം സ്വയം തീരുമാനമെടുത്തതെന്നാണ്​ സൂചന. ഭർത്താവ്​ സിദ്ധാർഥ്​ റായ്​ കപൂർ, സഹോദരങ്ങളായ ആദിത്യ, കുനാൽ റോയ്​ കപൂർ എന്നിവർ സിനിമാ മേഖലയി​ലെ സജീവ സാന്നിധ്യമാണ്​.

വിദ്യയോ അവരുടെ കുടുംബാംഗങ്ങളോ പങ്കാളികളായ സിനിമകളുടെ പരിശോധനകളിൽ നിന്ന്​ ഒഴിഞ്ഞുനിൽക്കാനാണ്​ തീരുമാനം. മനഃസാക്ഷിയെ മുൻനിർത്തി വിദ്യയെടുത്ത തീരുമാനത്തെ ബോർഡ്​ അംഗങ്ങൾ സ്വാഗതം ചെയ്യുകയും ചെയ്​തിട്ടുണ്ട്​. എന്നാൽ ത​ന്‍റെ തീരുമാനത്തെക്കുറിച്ച്​ പ്രതികരിക്കാൻ വിദ്യ തയാറായിട്ടില്ല. അതേസമയം അവരുടെ വക്​താവ്​ ഇക്കാര്യം സ്​ഥിരീകരിക്കുകയും ചെയ്​തിട്ടുണ്ട്​. സമീപകാലത്ത്​ താരം മുംബൈ ഫിലിം ഫെസ്​റ്റിവലിന്​ എത്തുകയും ഫിലിം സർട്ടിഫിക്കേഷൻ ബോർഡിലെ ചുമതലകളെക്കുറിച്ചുള്ള ചോദ്യങ്ങൾക്ക്​ മറുപടി പറയുകയും ചെയ്​തിരുന്നു.

പുതിയ ചുമതല ആസ്വദിക്കുന്നതായും ഒ​ട്ടേറെ സിനിമ കാണാൻ കഴിയുന്നതായും വിദ്യ പറഞ്ഞിരുന്നു. മുമ്പ്​ തിരക്ക്​ കാരണം ഇതിന്​ സാധിക്കാറില്ലായിരുന്നു. ഇൗ വർഷം പുറത്തിറങ്ങിയ ബീഗം ജാൻ ആണ്​ വിദ്യയുടെ അവസാന റിലീസ്​. സിനിമ ബോക്​സോഫീസിൽ വലിയ ചലനമുണ്ടാക്കിയില്ലെങ്കിലും വിദ്യയുടെ പ്രകടനം പ്രശംസിക്കപ്പെട്ടിരുന്നു. അടുത്ത സിനിമയായ ‘തുമാരി സുലു’വി​ന്‍റെ ട്രെയിലർ ഏതാനും ദിവസം മുമ്പ്​ പുറത്തുവന്നിരുന്നു.  രാത്രി റോഡിയോ പരിപാടി അവതരിപ്പിക്കുന്ന ആർ ജെയുടെ വേഷമാണ്​ ചിത്രത്തിൽ വിദ്യക്ക്​.