കിടിലന്‍ മുന്തിരി ഈന്തപ്പഴം അച്ചാർ തയ്യാറാക്കാം; റെസിപ്പി

രുചിക്കാലത്തിൽ ഇന്ന് പുഷ്പ വർ​ഗീസ് തയ്യാറാക്കിയ പാചകക്കുറിപ്പ്. മുന്തിരി ഈന്തപ്പഴം അച്ചാർ തയ്യാറാക്കുന്ന വിധം കാണാം. 

'രുചിക്കാലം' വ്യത്യസ്തമായ പാചകക്കുറിപ്പുകളുടെ ഈ ആഘോഷത്തിൽ പങ്കാളിയാവാൻ താൽപ്പര്യമുണ്ടോ? ഉണ്ടെങ്കിൽ നിങ്ങൾ തയ്യാറാക്കിയ വ്യത്യസ്തമായ പാചകക്കുറിപ്പുകൾ നല്ലൊരു ഫോട്ടോയും വിശദമായ വിലാസവും അടക്കം ruchikalamrecipes@gmail.com എന്ന വിലാസത്തിൽ അയക്കുക. യൂ ട്യൂബ് വീഡിയോ ഉണ്ടെങ്കിൽ അതിന്റെ ലിങ്ക് കൂടി അയക്കാം. സബ്ജക്റ്റ് ലൈനിൽ Recipes എന്ന് എഴുതണം. മികച്ച പാചകക്കുറിപ്പുകൾ രുചിക്കാലം പ്രസിദ്ധീകരിക്കും.

വേണ്ട ചേരുവകൾ

1. പച്ച മുന്തിരി - 1/2 കിലോ

2. ഈന്തപ്പഴം -10 എണ്ണം (കുരു കളഞ്ഞത്)

3. കാശ്മീരി മുളകുപൊടി - 1 ടേബിൾ സ്പൂൺ,

സാധാരണ മുളകുപൊടി - 11/2 ടേബിൾ സ്പൂൺ,

മഞ്ഞൾ പൊടി, കായപൊടി, ഉലുവ

പൊടി, കടുക്പരിപ് -ഇവ ഒരു ടീസ്പൂൺ വീതം

4. എണ്ണ - ആവശ്യത്തിന് 

5. വിനാഗിരി - 3 ടേബിൾ സ്പൂൺ

6. പച്ചമുളക് 5 എണ്ണം, ഇഞ്ചി 1 പീസ്‌, വെളുത്തുള്ളി - 15 (ഇവ അരിഞ്ഞെടുക്കണം )

7. പഞ്ചസാര - 1 ടേബിൾ സ്പൂൺ

8. വേപ്പില - ആവശ്യത്തിന്

9. ഉപ്പ് - ആവശ്യത്തിന്

തയ്യാറാക്കുന്ന വിധം

ഒരു പാന്‍ അടുപ്പത്തു വെച്ചു ചൂടാകുമ്പോൾ എണ്ണ ഒഴിക്കണം. ശേഷം കടുക് ഇടണം. പൊട്ടി വരുമ്പോൾ ആറാമത്തെ ചേരുവ ചേർത്ത് വാടിവരുമ്പോള്‍ പൊടികൾ ചേർക്കണം. ശേഷം ഈന്തപ്പഴം അരിഞ്ഞത് ചേർത്ത് വഴറ്റണം. നന്നായി വരണ്ട് വരുമ്പോൾ മുന്തിരി മുറിച്ചു കുരു കളഞ്ഞു ചേർത്ത് വഴറ്റണം. ഇനി ഉപ്പ്, പഞ്ചസാര, വിനാഗിരി എന്നിവ ചേർത്ത് മസാല നന്നായി പിടിച്ചതിനുശേഷം തീ ഓഫ് ചെയ്യുക. ശേഷം കുറച്ചു എണ്ണ ചൂടാക്കി കായ പൊടി, മുളകുപൊടി 1 ടീസ്പൂൺ വീതം ചേർത്ത് അച്ചാറിന് മീതെ ഒഴിക്കണം. ഇതോടെ നല്ല മുന്തിരി അച്ചാർ റെഡി.