Weight Loss Diet: വണ്ണം കുറയ്ക്കണോ? ഡയറ്റില് ഉള്പ്പെടുത്താം കാര്ബോഹൈട്രേറ്റ് കുറഞ്ഞ ഈ ഭക്ഷണങ്ങള്...
Synopsis
കൊഴുപ്പും കാര്ബോഹൈട്രേറ്റും പഞ്ചസാരയും അടങ്ങിയ ഭക്ഷണങ്ങള് ഒഴിവാക്കുകയും കലോറി വളരെ കുറഞ്ഞ ഭക്ഷണങ്ങള് ഡയറ്റില് ഉള്പ്പെടുത്തുകയുമാണ് ഇക്കൂട്ടര് ചെയ്യേണ്ടത്. അരിയാഹാരം കഴിക്കുന്ന മലയാളികള്ക്ക് പലപ്പോഴും ഇതൊരു ബുദ്ധിമുട്ടുള്ള കാര്യമാകാം.
അമിത വണ്ണം എങ്ങനെയെങ്കിലും ഒന്ന് നിയന്ത്രിക്കാന് ശ്രമിക്കുകയാണ് ഇന്ന് പലരും. വണ്ണം കുറയ്ക്കാന് ആഗ്രഹിക്കുന്നവര് പല തരത്തിലുള്ള ഡയറ്റ് പ്ലാനുകളും പരീക്ഷിക്കുന്നുണ്ടാകാം. മാറിയ ജീവിത ശൈലിയാണ് അമിത വണ്ണത്തിന് പ്രധാന കാരണം. വണ്ണം കുറയ്ക്കാനായി ആദ്യം ആരോഗ്യകരമായ ഭക്ഷണശീലവും ചിട്ടയായ ജീവിതശൈലിയും കെട്ടിപ്പടുത്തുകയാണ് വേണ്ടത്.
കൊഴുപ്പും കാര്ബോഹൈട്രേറ്റും പഞ്ചസാരയും അടങ്ങിയ ഭക്ഷണങ്ങള് ഒഴിവാക്കുകയും കലോറി വളരെ കുറഞ്ഞ ഭക്ഷണങ്ങള് ഡയറ്റില് ഉള്പ്പെടുത്തുകയുമാണ് ഇക്കൂട്ടര് ചെയ്യേണ്ടത്. അരിയാഹാരം കഴിക്കുന്ന മലയാളികള്ക്ക് പലപ്പോഴും ഇതൊരു ബുദ്ധിമുട്ടുള്ള കാര്യമാകാം. കലോറിയും കാർബോഹൈഡ്രേറ്റും ധാരാളം അടങ്ങിയ ഭക്ഷണങ്ങളില് ഒന്നാണ് ചോറ്. കാർബോഹൈഡ്രേറ്റിന്റെ അളവ് കൂടുന്നത് ശരീരത്തില് കൊഴുപ്പടിയാന് കാരണമാകും. അതിനാല് വണ്ണം കുറയ്ക്കാന് ആഗ്രഹിക്കുന്നവര് ദിവസവും ഒരു നേരം മാത്രമേ ചോറ് കഴിക്കാന് പാടുള്ളൂ എന്നാണ് വിദഗ്ധര് പറയുന്നത്.
ഡയറ്റില് ഉള്പ്പെടുത്തേണ്ട കാര്ബോഹൈട്രേറ്റ് കുറഞ്ഞ ചില ഭക്ഷണങ്ങളെ പരിചയപ്പെടാം...
ഒന്ന്...
അരിയെക്കാള് പ്രോട്ടീനും ഫൈബറും ധാരാളമായി അടങ്ങിയിട്ടുള്ള ബാര്ലി ആണ് ആദ്യമായി ഈ പട്ടികയില് ഉള്പ്പെടുന്നത്. വിറ്റാമിന് ബി, സിങ്ക്, സെലേനിയം, എയണ്, മഗ്നീഷ്യം തുടങ്ങിയവ ബാര്ലിയില് അടങ്ങിയിട്ടുണ്ട്. അതിനാല് കാര്ബോഹൈട്രേറ്റ് കുറഞ്ഞ ബാര്ലി ഡയറ്റില് ഉള്പ്പെടുത്തുന്നത് വണ്ണം കുറയ്ക്കാന് സഹായിക്കും.
രണ്ട്...
കോളിഫ്ളവര് ആണ് രണ്ടാമതായി ഈ പട്ടികയില് ഉള്പ്പെടുന്നത്. കലോറി കുറഞ്ഞ കോളിഫ്ളവര് ശരീരത്തിലെ കൊഴുപ്പ് അകറ്റാന് സഹായിക്കും. വിറ്റാമിന് കെ, സി, കാത്സ്യം, ഇരുമ്പ്, പൊട്ടാസ്യം തുടങ്ങിയവയും ഇവയില് ധാരാളമായി അടങ്ങിയിട്ടുണ്ട്.
മൂന്ന്...
അരിയുടെ പകരക്കാരനായി ഉപയോഗിക്കാവുന്ന ഒരു ധാന്യമാണ് മുളയരി. വിറ്റാമിന് ബിയും പ്രോട്ടീനും മുളയരിയില് ധാരാളമായി അടങ്ങിയിരിക്കുന്നു.
നാല്...
ബ്രൊക്കോളിയാണ് ആണ് അടുത്തതായി ഈ പട്ടികയില് ഉള്പ്പെടുന്നത്. പ്രമേഹ രോഗത്തെ നിയന്ത്രിക്കാനും ബ്രൊക്കോളിക്ക് കഴിയുമെന്നാണ് പല പഠനങ്ങളും പറയുന്നത്. കാര്ബോഹൈട്രേറ്റ് കുറഞ്ഞ ബ്രൊക്കോളി രക്തത്തിലെ പഞ്ചസാരയുടെ അളവ് കുറയ്ക്കാൻ സഹായിക്കും.
അഞ്ച്...
മുട്ടയാണ് അടുത്തതായി ഈ പട്ടികയില് ഉള്പ്പെടുന്നത്. പ്രോട്ടീനുകളുടെ കലവറയാണ് മുട്ട. ഒപ്പം കാര്ബോ, കലോറി എന്നിവ കുറവായതിനാല് വണ്ണം കുറയ്ക്കാന് ആഗ്രഹിക്കുന്നവര്ക്ക് മുട്ട ധൈര്യമായി കഴിക്കാം.
ആറ്...
ദിവസവും ഒരു ആപ്പിള് കഴിച്ചാല് ഡോക്ടറെ അകറ്റി നിര്ത്താം എന്ന ചൊല്ല് വെറുതെയല്ല. മധുരമുണ്ടെങ്കിലും പ്രമേഹരോഗികള്ക്കും ആപ്പിള് ധൈര്യമായി കഴിക്കാം. രക്തത്തിലെ പഞ്ചസാരയുടെ അളവ് നിയന്ത്രിക്കുന്നതിന് സഹായകമാണ് ആപ്പിള്. ധാരാളം ഫൈബര് അടങ്ങിയിട്ടുള്ളതിനാല് പ്രമേഹത്തിന് മാത്രമല്ല, ദഹനസംബന്ധമായ പ്രശ്നങ്ങള്ക്കും ആപ്പിള് പരിഹാരമാണ്. ഒപ്പം വണ്ണം കുറയ്ക്കാന് ആഗ്രഹിക്കുന്നവര്ക്കും ഇവ കഴിക്കാം.
Also Read: ഡിഷ് സ്പോഞ്ചിന്റെ മാതൃകയില് കേക്ക്; വിമര്ശനവുമായി സോഷ്യല് മീഡിയ