Portugal vs North Macedonia : ഖത്തറില്‍ കളിക്കാന്‍ റൊണാൾഡോയുണ്ടാകുമോ? ആരാധകര്‍ക്ക് ഇത് ഉറക്കമില്ലാത്ത രാത്രി

ഫിഫ റാങ്കിംഗിൽ അറുപത്തിയേഴാം സ്ഥാനക്കാരാണെങ്കിലും നോർത്ത് മാസിഡോണിയയെ നിസാരക്കാരായി കാണാനാവില്ല ക്രിസ്റ്റ്യാനോ റൊണാൾഡോയുടെ പോർച്ചുഗലിന്

പോര്‍ട്ടോ: ഖത്തർ ലോകകപ്പിൽ (2022 FIFA World Cup) ക്രിസ്റ്റ്യാനോ റൊണാൾഡോ (Cristiano Ronaldo) കളിക്കുമോയെന്ന് ഇന്നറിയാം. പോർച്ചുഗൽ പ്ലേ ഓഫ് ഫൈനലിൽ നോർത്ത് മാസിഡോണിയയെ (Portugal vs North Macedonia) നേരിടും. ഇന്ത്യൻ സമയം രാത്രി പന്ത്രണ്ടേകാലിനാണ് കളി തുടങ്ങുക. റോബർട്ട് ലെവൻഡോവ്സ്‌കിയുടെ (Robert Lewandowski) പോളണ്ടും (Poland vs Sweden) ലോകകപ്പ് യോഗ്യത ലക്ഷ്യമിട്ട് ഇന്നിറങ്ങും.

ഫിഫ റാങ്കിംഗിൽ അറുപത്തിയേഴാം സ്ഥാനക്കാരാണെങ്കിലും നോർത്ത് മാസിഡോണിയയെ നിസാരക്കാരായി കാണാനാവില്ല ക്രിസ്റ്റ്യാനോ റൊണാൾഡോയുടെ പോർച്ചുഗലിന്. യൂറോപ്യൻ ചാമ്പ്യൻമാരായ ഇറ്റലിയെ വീഴ്ത്തിയ ഗോളുമായാണ് പറങ്കിപ്പടയെ കീഴടക്കാന്‍ നോർത്ത് മാസിഡോണിയ വരുന്നത്. അതേസമയം തുർക്കിയെ ഒന്നിനെതിരെ മൂന്ന് ഗോളിന് തോൽപിച്ചാണ് പോർച്ചുഗൽ പ്ലേ ഓഫ് ഫൈനലിനിറങ്ങുന്നത്. കരിയറിന്‍റെ അവസാന ഘട്ടത്തിലേക്ക് എത്തിയ റൊണാൾഡോയ്ക്ക് ലോകകപ്പ് ടിക്കറ്റുറപ്പിക്കാൻ രണ്ടുംകൽപിച്ച് പൊരുതുമെന്ന് പോർച്ചുഗീസ് താരങ്ങൾ വ്യക്തമാക്കിക്കഴിഞ്ഞു. 

കൊവിഡ് മുക്തനായ പെപെയും സസ്പെൻഷൻ കഴിഞ്ഞ യാവോ കാൻസലോയും തിരിച്ചെത്തുന്നത് പോർച്ചുഗലിന് കരുത്താവും. റൊണാൾഡോയ്ക്കൊപ്പം ഡീഗോ ജോട്ട, ബ്രൂണോ ഫെർണാണ്ടസ്, ബെർണാർഡോ സിൽവ എന്നിവരുടെ പ്രകടനമാവും പോർച്ചുഗലിന് നിർണായകമാവുക. പ്രതിസന്ധി ഘട്ടങ്ങളിൽ എന്നും രക്ഷകനാവുന്ന റൊണാൾഡോ അവസരത്തിനൊത്ത് ഉയരുമെന്ന് ആരാധകരും പ്രതീക്ഷിക്കുന്നു. 

അവസാന മൂന്ന് കളിയിൽ ഒറ്റ ഗോളും വഴങ്ങാതെ ജയിച്ച നോർത്ത് മാസിഡോണിയ ലക്ഷ്യമിടുന്നത് ചരിത്രത്തിലെ ആദ്യ ലോകകപ്പ് യോഗ്യതയാണ്. ഇതിന് മുൻപ് ഇരു ടീമും ഏറ്റുമുട്ടിയത് ഒരിക്കൽ മാത്രം. അന്ന് മത്സരം ഗോൾരഹിത സമനിലയിൽ അവസാനിച്ചു. ഇന്നത്തെ മറ്റൊരു പ്ലേ ഓഫ് ഫൈനലിൽ റോബർട്ട് ലെവൻഡോവ്സ്കിയുടെ പോളണ്ട്, സ്വീഡനുമായി ഏറ്റുമുട്ടും. രാത്രി പന്ത്രേണ്ടേകാലിനാണ് ഈ കളിയും കളിയും തുടങ്ങുക.  

എപ്പോള്‍ വിരമിക്കും, താന്‍ തീരുമാനിക്കും: റോണോ

അന്താരാഷ്ട്ര ഫുട്ബോളില്‍ നിന്ന് എപ്പോൾ വിരമിക്കണമെന്ന് തീരുമാനിക്കേണ്ടത് താന്‍ ആണെന്ന് പോര്‍ച്ചുഗീസ് നായകൻ ക്രിസ്റ്റ്യാനോ റൊണാൾഡോ വ്യക്തമാക്കി. ലോകകപ്പ് യോഗ്യതാ റൗണ്ടിലെ നിര്‍ണായക മത്സരത്തിന് മുന്‍പാണ് റൊണാള്‍ഡോയുടെ പ്രതികരണം. ലോകകപ്പിന് ശേഷവും കളിക്കണമെന്ന് തനിക്ക് തോന്നിയാൽ തുടരും. ഇല്ലെങ്കില്‍ വിരമിക്കും. അന്തിമ തീരുമാനം എടുക്കുക താന്‍ ആകുമെന്നും റൊണാള്‍ഡോ പറഞ്ഞു. വടക്കന്‍ മാസിഡോണിയക്കെതിരെ പോര്‍ച്ചുഗലിനാണ് മുന്‍തൂക്കമെന്നും റൊണാള്‍ഡോ പറഞ്ഞു. കഴി‌ഞ്ഞ അഞ്ച് ലോകകപ്പുകള്‍ക്കും പോര്‍ച്ചുഗൽ യോഗ്യത നേടിയിരുന്നു.