ഫിഫ റാങ്കിംഗ് : അര്‍ജന്റീന ഒന്നാം സ്ഥാനത്ത് നിന്നിറങ്ങി; സ്‌പെയ്ന്‍ പുതിയ അവകാശി, ബ്രസീലിനും തിരിച്ചടി ഇന്ത്യക്കും നഷ്ടം

ഫിഫയുടെ പുതിയ റാങ്കിംഗിൽ അർജന്റീനയ്ക്ക് ഒന്നാം സ്ഥാനം നഷ്ടമായി മൂന്നാം സ്ഥാനത്തേക്ക് വീണു. സ്പെയിൻ ഒന്നാം സ്ഥാനത്തെത്തിയപ്പോൾ ഫ്രാൻസ് രണ്ടാമതായി.

സൂറിച്ച്: 2022 ലോകകപ്പ് നേടിയതിനു പിന്നാലെ സ്വന്തമാക്കിയ ഫിഫ റാങ്കിംഗിലെ ഒന്നാം സ്ഥാനം അര്‍ജന്റീനയ്ക്ക് നഷ്ടമായി. ലോകകപ്പ് യോഗ്യതാ റൗണ്ടില്‍ ഇക്വഡോറിനോട് തോല്‍വി നേരിട്ടതാണ് അര്‍ജന്റീനയ്ക്ക് തിരിച്ചടിയായത്. ഇന്ന് ഫിഫ പുറത്തിറക്കിയ റാങ്കിംഗില്‍ അര്‍ജന്റീന മൂന്നാം സ്ഥാനത്തേക്ക് വീണു. സ്പെയ്ന്‍ ഒന്നാം റാങ്കിലേക്ക് കുതിച്ചപ്പോള്‍ ഫ്രാന്‍സ് രണ്ടാമതായി. രണ്ട് വര്‍ഷത്തിനും നാല് മാസത്തിനും ശേഷമാണ് അര്‍ജന്റീനയ്ക്ക് ഒന്നാം റാങ്ക് നഷ്ടമാവുന്നത്.

ഇംഗ്ലണ്ട്, പോര്‍ട്ടുഗല്‍, ബ്രസീല്‍, നെതര്‍ലന്‍ഡ്സ്, ബെല്‍ജിയം, ക്രോയേഷ്യ, ഇറ്റലി എന്നിവരാണ് നാല് മുതല്‍ പത്തുവരെ സ്ഥാനങ്ങളില്‍. ഫിഫ മത്സരങ്ങള്‍ക്ക് 25 പോയിന്റും സൗഹൃദ മത്സരങ്ങള്‍ക്ക് അഞ്ച് പോയിന്റുമാണ് റാങ്കിംഗില്‍ കിട്ടുക. ഒരു സ്ഥാനം ബ്രസീലിന് നഷ്ടമായി. ലോകകപ്പ് യോഗ്യത മത്സരത്തില്‍ ബൊളീവിയയോടേറ്റ് തോല്‍വിയാണ് ബ്രീസിലിന് തിരിച്ചടിയായത്. മൂന്ന് സ്ഥാനം നഷ്ടമായ ജര്‍മനി 12-ാം സ്ഥാനത്തേക്ക് വീണു. പുതിയ റാങ്കിംഗില്‍ ഇന്ത്യ 134-ാം സ്ഥാനത്താണ്. ഒരു സ്ഥാനം ഇന്ത്യക്ക് നഷ്ടമായി. സമീപ കാലത്തെ ഇന്ത്യയുടെ ഏറ്റവും മോശം റാങ്കിംഗാണിത്.

ഏഷ്യന്‍ റാങ്കിങ്ങില്‍ 24-ാം സ്ഥാനത്താണ് ഇന്ത്യ. 2016 ഡിസംബറില്‍ 135-ാം സ്ഥാനത്തായതാണ് ഇതിന് മുന്‍പത്തെ മോശം പ്രകടനം. 97-ാം സ്ഥാനം വരെ ഉയര്‍ന്ന ഇന്ത്യക്ക് തുടര്‍ച്ചയായ തോല്‍വികളാണ് തിരിച്ചടിയായത്. ഖാലീദ് ജമീല്‍ വരുന്നതിന് മുമ്പ് അവസാന പതിനാറ് മത്സരത്തില്‍ നിന്ന് ഇന്ത്യ ഒറ്റക്കളിയില്‍ മാത്രമാണ് ജയിച്ചത്. ടീമിന്റെ മോശം പ്രകടനത്തെ തുടര്‍ന്ന് കോച്ച് മനോലോ മാര്‍ക്വേസ് അടുത്തിടെ സ്ഥാനം ഒഴിഞ്ഞിരുന്നു. എ എഫ് സി ഏഷ്യ കപ്പ് യോഗ്യതാ മത്സരത്തില്‍ ഫിഫ റാങ്കിംഗില്‍ ഇന്ത്യയെക്കാള്‍ ഏറെ പിന്നിലുള്ള ഹോങ്കോംഗിനോട് തോറ്റതിന് പിന്നാലെയാണ് അദ്ദേഹം സ്ഥാനമൊഴിഞ്ഞത്.