കേപ് വെര്‍ദെ ഗോള്‍കീപ്പര്‍ വോസീഞ്ഞോയുടെ അമ്മയ്ക്ക് യു എസ് വിസ അനുവദിച്ചു; ലോകകപ്പ് വേദിയില്‍ സ്വപ്ന സമാഗമം

സ്പെയിനിനെതിരായ മത്സരശേഷം അമ്മയ്ക്ക് വരാൻ കഴിയാത്തതിലുള്ള ദുഃഖം പങ്കുവെച്ച കേപ് വെർദെ ഗോൾകീപ്പർ വോസീഞ്ഞോയുടെ അമ്മയ്ക്ക് യുഎസ് വിസ ലഭിച്ചു. യുഎസ് ഭരണകൂടത്തിന്റെ പ്രത്യേക ഇടപെടലിനെ തുടർന്ന് വിസ ഫീസുകളും ബോണ്ട് തുകയും ഒഴിവാക്കി നൽകുകയായിരുന്നു. 

മിയാമി: 2026 ഫിഫ ലോകകപ്പിലെ തങ്ങളുടെ ആദ്യ മത്സരത്തില്‍ വമ്പന്മാരായ സ്‌പെയിനിനെ ഗോള്‍രഹിത സമനിലയില്‍ തളച്ച് ലോകത്തെ വിസ്മയിപ്പിച്ച കേപ് വെര്‍ദെ ഗോള്‍കീപ്പര്‍ വോസീഞ്ഞോയുടെ അമ്മയ്ക്ക് ഒടുവില്‍ അമേരിക്കന്‍ ഭരണകൂടം വിസ അനുവദിച്ചു. വിസ ലഭിക്കുന്നതിനുള്ള കടുത്ത സാമ്പത്തിക പ്രതിസന്ധികളും കര്‍ശന നിയമങ്ങളും കാരണം തന്റെ അമ്മയ്ക്ക് കളി കാണാന്‍ വരാന്‍ സാധിച്ചില്ലെന്ന് മത്സരത്തിന് ശേഷം 40-കാരനായ താരം വിതുമ്പലോടെ വെളിപ്പെടുത്തിയിരുന്നു. ഈ വാര്‍ത്ത ശ്രദ്ധയില്‍പ്പെട്ടതോടെ യു എസ് ഭരണകൂടം നേരിട്ട് ഇടപെട്ടാണ് ഇപ്പോള്‍ വിസ അനുവദിച്ചിരിക്കുന്നത്.

ഉന്നതതല ഇടപെടല്‍; നിബന്ധനകള്‍ ഒഴിവാക്കി

യു എസ് ഹൗസ് ഡെമോക്രാറ്റിക് ലീഡര്‍ ഹക്കീം ജെഫ്രീസ് ബുധനാഴ്ചയാണ് വോസീഞ്ഞോയുടെ അമ്മ അനാ കാന്‍ഡിഡ എവോറയ്ക്ക് വിസ അനുവദിച്ച കാര്യം ഔദ്യോഗികമായി അറിയിച്ചത്. യു എസ് സ്റ്റേറ്റ് സെക്രട്ടറി ആന്റണി ബ്ലിങ്കനുമായി സംസാരിച്ചതായും, കേപ് വെര്‍ദെയുടെ അടുത്ത മത്സരം കാണാന്‍ അവരുടെ അമ്മയ്ക്ക് അവസരമൊരുക്കണമെന്ന് സ്റ്റേറ്റ് ഡിപ്പാര്‍ട്ട്‌മെന്റിനോട് ആവശ്യപ്പെട്ടതായും ജെഫ്രീസ് വ്യക്തമാക്കി. സാധാരണക്കാരനായ കേപ് വെര്‍ദെ പൗരന്മാര്‍ക്ക് യു.എസ് വിസ ലഭിക്കണമെങ്കില്‍ ഏകദേശം 12.5 ലക്ഷം രൂപ വരെ ബോണ്ട് തുകയായി കെട്ടിവെക്കണമെന്ന കടുത്ത നിയമം നിലവിലുണ്ടായിരുന്നു.

ഒരു ഹോം ക്ലീനറായി ജോലി ചെയ്യുന്ന അനാ കാന്‍ഡിഡയ്ക്ക് ഈ തുക കണ്ടെത്താന്‍ കഴിയാത്തതായിരുന്നു വിസ നിഷേധിക്കപ്പെടാന്‍ കാരണം. എന്നാല്‍ പ്രത്യേക കേസായി പരിഗണിച്ച് വോസീഞ്ഞോയുടെ കുടുംബത്തിനുള്ള എല്ലാ വിസ ഫീസുകളും ബോണ്ട് തുകകളും പൂര്‍ണ്ണമായും ഒഴിവാക്കി നല്‍കി. ഫിഫയുടെയും കേപ് വെര്‍ദെ സര്‍ക്കാരിന്റെയും സംയുക്ത സഹകരണത്തോടെയാണ് യാത്രയ്ക്കുള്ള ക്രമീകരണങ്ങള്‍ ചെയ്യുന്നത്.

സ്‌പെയിനിനെ തളച്ച ഹീറോ

തങ്ങളുടെ ചരിത്രത്തിലെ ആദ്യ ലോകകപ്പ് മത്സരത്തിനിറങ്ങിയ കേപ് വെര്‍ദെ, രണ്ടാം റാങ്കുകാരായ സ്‌പെയിനിനെയാണ് നേരിട്ടത്. സ്‌പെയിന്‍ നിരന്തരം ആക്രമിച്ചു കളിച്ച മത്സരത്തില്‍ 8 മനോഹരമായ സേവുകളുമായി വോസീഞ്ഞോ കേപ് വേഡിന്റെ രക്ഷകനായി മാറി. മത്സരത്തിലെ മികച്ച കളിക്കാരനായി തിരഞ്ഞെടുക്കപ്പെട്ടതും വോസീഞ്ഞോ ആയിരുന്നു. മത്സരത്തിന് മുന്‍പ് ഇന്‍സ്റ്റാഗ്രാമില്‍ വെറും 50,000 ഫോളോവേഴ്സ് ഉണ്ടായിരുന്ന താരത്തിന് ഒറ്റരാത്രി കൊണ്ട് ഫോളോവേഴ്സിന്റെ എണ്ണം 5 ദശലക്ഷത്തിലധികമായി ഉയര്‍ന്നിരുന്നു.

ഞായറാഴ്ച മിയാമിയില്‍ സമാഗമം

വരുന്ന ഞായറാഴ്ച മിയാമിയില്‍ ശക്തരായ ഉറുഗ്വേയ്ക്കെതിരെയാണ് കേപ് വെര്‍ദെയുടെ അടുത്ത ഗ്രൂപ്പ് ഘട്ട മത്സരം. ഈ ചരിത്ര പോരാട്ടത്തില്‍ ഗാലറിയിലിരുന്ന് മകന്റെ പ്രകടനം കാണാന്‍ അമ്മ അനാ കാന്‍ഡിഡ എവോറയ്ക്ക് സാധിക്കും. കരിയറിന്റെ അവസാന ഘട്ടത്തില്‍ തന്റെ ഏറ്റവും വലിയ സ്വപ്ന വേദിയില്‍ അമ്മയുടെ സാന്നിധ്യം കൂടി ലഭിക്കുന്നത് വോസീഞ്ഞോയ്ക്കും കേപ് വേഡ് ടീമിനും വലിയ ആത്മവിശ്വാസമാണ് നല്‍കുന്നത്.