'മണിപ്പൂർ കത്തുമ്പോൾ അധികാരികൾ ഊര് ചുറ്റുന്നു', കേന്ദ്ര സര്‍ക്കാരിനെ രൂക്ഷമായി വിമര്‍ശിച്ച് സി കെ വിനീത്

ക്രിക്കറ്റ് താരത്തിന്‍റെ വീട്ടിൽ മൊട്ടു സൂചി മോഷ്ടിക്കപ്പെട്ടാൽ വാർത്തയാക്കുന്നവർ  ഫുട്ബോൾ താരത്തിന്‍റെ വീട് കത്തുമ്പോഴും മിണ്ടുന്നില്ലെന്നും വിനീത്.

കണ്ണൂര്‍: ദില്ലി: മണിപ്പൂരില്‍ കുക്കി സമുദായംഗങ്ങളായ രണ്ട് സ്ത്രീകളെ നഗ്നരാക്കി നടത്തുകയും ലൈംഗികാതിക്രമം നടത്തുകയും ചെയ്ത സംഭവത്തിൽ കേന്ദ്ര സര്‍ക്കാരിനെതിരെ രൂക്ഷ വിമര്‍ശനവുമായി ഫുട്ബോള്‍ താരം സി കെ വിനീത്. മണിപ്പൂർ കത്തുമ്പോൾ അധികാരികൾ ഊര് ചുറ്റുകയാണെന്ന് സി കെ വിനീത് ഏഷ്യാനെറ്റ് ന്യൂസിനോട് പറഞ്ഞു. വിഷയത്തില്‍ കായികലോകം പ്രതികരിക്കാത്തത് നിരാശപ്പെടുത്തുന്നു. ഫാസിസം വീടിന് മുന്നിൽ  എത്തിയിട്ടും കായിക ലോകം നിശബ്ദരാകുന്നുവെന്നും വിനീത് പറഞ്ഞു. ക്രിക്കറ്റ് താരത്തിൻ്റെ വീട്ടിൽ മൊട്ടു സൂചി മോഷ്ടിക്കപ്പെട്ടാൽ വാർത്തയാക്കുന്നവർ  ഫുട്ബോൾ താരത്തിന്‍റെ വീട് കത്തുമ്പോഴും മിണ്ടുന്നില്ലെന്നും വിനീത് പറഞ്ഞു.

സാമുദായിക വിഭജനം വളർത്തുന്നതിന് നടുവിൽ, ഭരിക്കുന്ന സർക്കാരിന്, കേന്ദ്ര തലത്തിലായാലും സംസ്ഥാന തലത്തിലായാലും, ജനങ്ങളെ  നോക്കാൻ സമയമില്ലെന്ന് വിനീത് നേരത്തെ ഫേസ്ബുക് പോസ്റ്റിലും പറഞ്ഞിരുന്നു.

വിനീതിന്‍റെ ഫേസ്ബുക് പോസ്റ്റിന്‍റെ പൂര്‍ണരൂപം

മണിപ്പൂരിൽ നിന്നുള്ള വാർത്തകൾ വളരെ ഭയാനകമാണ്,സോഷ്യൽ നെറ്റ്‌വർക്ക് ഇൽ പ്രചരിച്ച സ്ത്രീകളുടെ ദൃശ്യങ്ങൾ ആളുകളുടെ മനസ്സാക്ഷിയെ മരവിപ്പിക്കുന്നു. സാമുദായിക വിഭജനം വളർത്തുന്നതിന് നടുവിൽ, ഭരിക്കുന്ന സർക്കാരിന്, കേന്ദ്ര തലത്തിലായാലും സംസ്ഥാന തലത്തിലായാലും, ജനങ്ങളെ  നോക്കാൻ സമയമില്ല!

ഇത് നിർത്താൻ കഴിയുമോ? ഇവരും നമ്മളെ പോലെ മനുഷ്യരാണ് . അവർ ഇന്ത്യൻ പൗരന്മാരാണ്. നമുക്ക് അവരോട് മാന്യമായും ബഹുമാനത്തോടെയും പെരുമാറാൻ കഴിയുമോ? സ്വാർത്ഥ കാരണങ്ങലാളുള്ള ഈ പാർശ്വവൽക്കരണം നമുക്ക് അവസാനിപ്പിക്കാൻ കഴിയുമോ?

മണിപ്പൂരിൽ നിലവിൽ ഇന്ത്യൻ ദേശീയ ഫുട്ബോൾ ടീമിലുള്ള താരത്തിന്റെ വീട് പൂർണമായും തകർത്തു ; ഇവരും കുടുംബവും സുഹൃത്തുക്കളുടെ വീടുകളിൽ അഭയം തേടിയിരിക്കുകയാണ്. ഇത് സംഭവിച്ചിട്ട് ആഴ്ചകൾ കഴിഞ്ഞു. ഒരു മാധ്യമവും അതിനെക്കുറിച്ച് സംസാരിക്കുന്നില്ല. എന്താണ് സംഭവിക്കുന്നതെന്ന് അവർക്ക് അറിയാമോ? അവർ അത് അവഗണിക്കാൻ തീരുമാനിക്കുകയാണോ? അതോ അവർ അത് ചർച്ച ചെയ്തിട്ടുണ്ടോ, ഞാൻ അതിനെക്കുറിച്ച് കേട്ടിട്ടില്ലേ?

ഈ ആളുകൾ എന്റെ സുഹൃത്തുക്കളും മുൻ ടീമംഗങ്ങളുമാണ്. തങ്ങളുടെ പ്രിയപ്പെട്ടവർ സുരക്ഷിതരാണെന്ന് അറിഞ്ഞുകൊണ്ട് അവർക്ക് രാജ്യത്തിനായി കളിക്കാൻ കഴിയുമോ? അവർക്ക് അത് ഉണ്ടെന്ന് ഉറപ്പാക്കാൻ കഴിയുമോ? എല്ലാവർക്കും സുരക്ഷിതമായ അന്തരീക്ഷം സൃഷ്‌ടിക്കാനോ അവരെ സുരക്ഷിതരാണെന്ന് തോന്നാനോ നമുക്ക് കഴിയുമോ? മണിപ്പൂർ കണ്ണീരിലാണ്. അവരെയൊന്നു സഹായിക്കു!- വിനീത് കുറിച്ചു.

മണിപ്പൂരില്‍ കുക്കി സമുദായംഗങ്ങളായ രണ്ട് സ്ത്രീകളെ നഗ്നരാക്കി നടത്തുകയും ലൈംഗികാതിക്രമം നടത്തുകയും ചെയ്ത സംഭവത്തിൽ നാലു പേരെ അറസ്റ്റ് ചെയ്തിരുന്നു. സംഭവത്തിന്‍റെ വീഡിയോ പ്രചരിച്ചത് വ്യാപക രോഷം ഉയര്‍ത്തിയതിന് പിന്നാലെയായിരുന്നു നടപടി.