കൊച്ചി: ഐ ലീഗ് ക്ലബായ റിയല്‍ കശ്മീരിന്റ മധ്യനിരതാരം ഋത്വിക് ദാസ് കേരള ബ്ലാസ്റ്റേഴ്‌സില്‍. പശ്ചിമ ബംഗാളില്‍ നിന്നുള്ള ഋത്വിക്ക് കഴിഞ്ഞ രണ്ട് സീസണുകളായി കശ്മീരിന്റെ ഭാഗമാണ്. ഈ ഐ-ലീഗ് സീസണില്‍ ആറ് ആദ്യ ഇലവന്‍ അവസരം അടക്കം 11 തവണയാണ് 23-കാരനായ ഋത്വിക്ക് ക്ലബ് ജേഴ്‌സിയണിഞ്ഞത്.
ഋത്വിക്കിന്റെ കാര്യത്തില്‍ ഔദ്യോഗിക പ്രഖ്യാപനം മാത്രമാണ് ഇനി ബാക്കിയുള്ളത്. ഇതോടൊപ്പം മറ്റൊരു യുവതാരം കൂടി ടീമിലെത്തിയേക്കും. ഇന്ത്യന്‍ ആരോസിന്റെ വിക്രം പ്രതാപ് സിംഗാണ് ടീമിലെത്തുക. 18-കാരനായ വിക്രം ഇരുവിങ്ങുകളിലും സെന്റര്‍ ഫോര്‍വേഡ് പൊസിഷനിലും കളിക്കുന്ന താരമാണ്.
ഇതിനകം തന്നെ ഇന്ത്യന്‍ ഫുട്‌ബോളിന്റെ ഭാവിതാരമെന്ന വിശേഷണം സ്വന്തമാക്കിക്കഴിഞ്ഞ താരമാണ് വിക്രം. മുമ്പും ഇന്ത്യന്‍ ആരോസില്‍ നിന്ന് താരങ്ങള്‍ ബ്ലാസ്റ്റേഴ്‌സിലേക്ക് എത്തിയിട്ടുണ്ട്. കഴിഞ്ഞ സീസണില്‍ കെ പി രാഹുല്‍ ടീമിലെത്തിയിരുന്നു.