ബലോണ് ഡി ഓര് പുരസ്കാരത്തിനുള്ള ചുരുക്കപ്പട്ടികയില് ലിയോണല് മെസിയും; 26ന് പ്രഖ്യാപനം
Synopsis
ബലോണ് ഡി ഓര് പുരസ്കാരത്തിനുള്ള 30 അംഗ ചുരുക്കപ്പട്ടിക പ്രഖ്യാപിച്ചു. ലിയോണല് മെസ്സി പട്ടികയില് ഇടംപിടിച്ചപ്പോള് ക്രിസ്റ്റ്യാനോ റൊണാള്ഡോ പുറത്തായി. ഹാരി കെയ്ന്, കിലിയന് എംബാപ്പേ തുടങ്ങിയവരും പട്ടികയിലുണ്ട്, ഒക്ടോബര് 26-നാണ് പുരസ്കാര പ്രഖ്യാപനം.
സൂറിച്ച്: അന്താരാഷ്ട്ര ഫുട്ബോളില് നിന്ന് വിരമിച്ച ലിയോണല് മെസിയെ ഉള്പ്പെടുത്തി ബലോണ് ഡി ഓര് പുരസ്കാരത്തിനുള്ള ചുരുക്കപ്പട്ടിക പ്രഖ്യാപിച്ചു. ഒക്ടോബര് ഇരുപത്തിയാറിനാണ് ജേതാക്കളെ പ്രഖ്യാപിക്കുക. മുപ്പത് താരങ്ങളാണ് പുരസ്കാരത്തിനുള്ള ചുരുക്കപ്പട്ടികയില് ഇടംപിടിച്ചത്. ലിയോണല് മെസി, കിലിയന് എംബാപ്പേ, ഹാരി കെയ്ന്, ലമീന് യമീല്, റോഡ്രി, ഒസ്മാന് ഡെംബലേ, പൗ കുര്ബാസി, ജുഡ് ബെല്ലിംഗ്ഹാം, എര്ലിംഗ് ഹാലന്ഡ് തുടങ്ങിയവരെല്ലാം പട്ടികയിലുണ്ട്. സൗദി ക്ലബ് അല് നസറില് കളിക്കുന്ന പോര്ച്ചുഗീസ് താരം ക്രിസ്റ്റ്യാനോ റൊണാള്ഡോ ചുരുക്കപ്പട്ടികയിലില്ല.
അജന്റൈന് ദേശീയ ടീമിലെയും അമേരിക്കന് ക്ലബ് ഇന്റര് മയാമിയിലേയും മികച്ച പ്രകടനമാണ് ഓഗസ്റ്റ് മുപ്പത്തിയൊന്നിന് അന്താരാഷ്ട്ര ഫുട്ബോളില്നിന്ന് വിരമിച്ച മെസ്സിയെ ചുരുക്കപ്പട്ടികയില് എത്തിച്ചത്. എട്ട് തവണ ബലോണ് ഡി ഓര് നേടിയ മെസ്സി പതിനേഴാം തവണയാണ് സാധ്യതാ പട്ടികയില് ഇടംപിടിക്കുന്നത്. ഇക്കുറി ഏറ്റവും കൂടുതല് സാധ്യത കല്പിക്കപ്പെടുന്നത് ഇംഗ്ലണ്ട് ക്യാപ്റ്റന് ഹാരി കെയ്ന്. ബയേണ് മ്യൂണിക്കിനെ ഇരട്ടക്കിരീടത്തിലേക്ക് നയിച്ച കെയ്ന് 51 കളിയില് 61 ഗോളാണ് അടിച്ചുകൂട്ടിയത്. ലോകകപ്പില് ആറ് ഗോളും ഇംഗ്ലണ്ട് സ്ട്രൈക്കര് സ്വന്തമാക്കി.
നിലവിലെ ജേതാവ് ഒസ്മാന് ഡെംബലേ ബാഴ്സലോണയുടെ കൗമാരതാരം ലമീന് യമാല്, സ്പെയ്നെ ലോകകപ്പ് വിജയത്തിലേക്ക് നയിച്ച റോഡ്രി എന്നിവരാണ് സാധ്യതാ പട്ടികയില് മുന്നിലുള്ള മറ്റ് താരങ്ങള്. അവസാന മൂന്ന് വര്ഷവും മികച്ച വനിതാ താരമായി തെരഞ്ഞെടുക്കപ്പെട്ട ഐറ്റാന ബോന്മാറ്റി ഇത്തവണ ചുരുക്കപ്പട്ടികയിലില്ല. പരിക്കേറ്റ് സീസണിലെ ഭൂരിഭാഗം മത്സരവും നഷ്ടമായതാണ് ഐറ്റാനയ്ക്ക് തിരിച്ചടിയായത്. രണ്ടുതവണ ജേതാവായ അലക്സിയ പ്യൂട്ടെയാസ്, ഇവ പയോര്, മെല്ഷീ ഡുമോര്നേ എന്നിവരാണ് സാധ്യതാ പട്ടികയില് മുന്നില്. മികേല് അര്ട്ടേറ്റ, ലൂയൂസ് ഡി ലാ ഫ്യൂവന്റെ, യുനായ് എമെറി, വിന്സന്റ് കോംപനി, ലൂയിസ് എന്റികെ എന്നിവരാണ് മികച്ച പരിശീലകനുള്ള പുരസ്കാരത്തിന് അവസാന പട്ടികയിലുളളത്.
ഏഷ്യാനെറ്റ് ന്യൂസ് മലയാളത്തിലൂടെ Sports News അറിയൂ. Football News തുടങ്ങി എല്ലാ കായിക ഇനങ്ങളുടെയും അപ്ഡേറ്റുകൾ ഒറ്റതൊട്ടിൽ. നിങ്ങളുടെ പ്രിയ ടീമുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ എല്ലാം ഇപ്പോൾ Asianet News Malayalam മലയാളത്തിൽ തന്നെ!