യുവേഫ ചാമ്പ്യന്സ് ലീഗ്: ബാഴ്സലോണ ഇന്നിറങ്ങുന്നു, പിഎസ്ജിക്കും ഇന്ന് മത്സരം; റയല് മാഡ്രിഡിന് ജയം
Synopsis
യുവേഫ ചാമ്പ്യൻസ് ലീഗിൽ ബാഴ്സലോണ ഇന്ന് ഫെയനൂര്ദിനെതിരെ ആദ്യ മത്സരത്തിനിറങ്ങുന്നു. പിഎസ്ജി, ലിവർപൂൾ ടീമുകൾക്കും ഇന്ന് മത്സരമുണ്ട്. കഴിഞ്ഞ മത്സരങ്ങളിൽ റയൽ മാഡ്രിഡ് ഇന്റർ മിലാനെയും മാഞ്ചസ്റ്റർ സിറ്റി പോർട്ടോയെയും പരാജയപ്പെടുത്തി.
സൂറിച്ച്: ചാമ്പ്യന്സ് ലീഗ് കിരീടം വീണ്ടെടുക്കാനുള്ള ബാഴ്സലോണയുടെ പോരാട്ടങ്ങള്ക്ക് ഇന്ന് തുടക്കം. രാത്രി പത്തേകാലിന് കാംപ് നൗവില് തുടങ്ങുന്ന മത്സരത്തിലെ എതിരാളികള് ഫെയനൂര്ദ്. സെന്റര് ഫോര്വേര്ഡ് ഇല്ലാതിരുന്നിട്ടും ലാ ലീഗയിലെ ആദ്യ നാല് കളിയില് പതിനേഴ് ഗോള് നേടിയ ആത്മവിശ്വാസത്തിലാണ് ഹാന്സി ഫ്ളിക്ക് പരിശീലിപ്പിക്കുന്ന ബാഴ്സലോണ. ഡച്ച് ലീഗിലെ ആദ്യ അഞ്ച് കളിയില് തോല്വി അറിയാതെയാണ് ഫെയനൂര്ദ് കാംപ് നൗവില് ഇറങ്ങുന്നത്. റോഡ്രിയും പെഡ്രിയും നയിക്കുന്ന മധ്യനിരയും ലമീന് യമാലിന്റെ ബ്രില്യന്സുമാണ് ബാഴ്സയുടെ കരുത്ത്. റഫീഞ്ഞ, ആന്തണി ഗോര്ഡന്, ഫെര്മിന് ലോപസ് എന്നിവരും ഫോമില്.
ബാഴ്സലോണയ്ക്ക് പുറമെ പി എസ് ജി, ലിവര്പൂള് ടീമുകള് സീസണിലെ ആദ്യ മത്സരത്തിനിറങ്ങും. പ്രീമിയര് ലീഗ് ക്ലബ് ലിവര്പൂളിന് സ്പാനിഷ് കരുത്തരായ അത്ലറ്റിക്കോ മാഡ്രിഡാണ് എതിരാളികള്. നിലവിലെ ചാമ്പ്യന്മാരായ പി എസ് ജി ആദ്യമത്സരത്തില് സ്ലോവന് ബ്രാറ്റിസ്ലാവയെ നേരിടുമ്പോള് പ്രീമിയര് ലീഗ് ചാമ്പ്യന്മാരും നിലവിലെ ഫൈനലിസ്റ്റുകളായ ആഴ്സണല് ഇറ്റാലിയന് ക്ലബ് നാപ്പോളിയുമായി ഏറ്റുമുട്ടും. ഹാട്രിക് കിരീടം ലക്ഷ്യമിട്ടാണ് ലൂയിസ് എന്റ്വികെ പരിശീലിപ്പിക്കുന്ന പി എസ് ജി ഹോം ഗ്രൗണ്ടില് ഇറങ്ങുന്നത്.
ഒസ്മാന് ഡെംബലേ, ക്വിച ക്വാരെസ്കേലിയ, അഷ്റഫ് ഹക്കീമി, യാവോ നെവസ്, വിറ്റീഞ്ഞ, ഫാബിയന് റൂയിസ്, ഡിസയര് ദുവേ, മാര്ക്വീഞ്ഞോസ് എന്നിവരുള്പ്പട്ട പി എസ് ജിയെ പിടിച്ചുകെട്ടുക യായ ടൂറെ പരിശീലിപ്പിക്കുന്ന ബ്രാറ്റിസ്ലാവയ്ക്ക് കടുത്ത വെല്ലുവിളിയായിരിക്കും. പ്രീമിയര് ലീഗില് തോല്വി അറിയാതെയാണ് ലിവര്പൂളും ആഴ്സണലും ചാമ്പ്യന്സ് ലീഗ് പോരിനിറങ്ങുന്നത്.
റയല് മാഡ്രിഡിന് ജയം
ചാമ്പ്യന്സ് ലീഗില് ഇന്റര് മിലാനെ തോല്പിച്ച് റയല് മാഡ്രിഡ്. ഒന്നിനെതിരെ രണ്ട് ഗോളുകള്ക്കായിരുന്നു റയലിന്റെ ജയം. കിലിയന് എംബാപ്പെയും ഫെഡറികോ വാല്വെര്ഡെയുമാണ് റയലിനായി ഗോള് നേടിയത്. 77ാം മിനിറ്റില് കാര്ലോസ് അഗസ്റ്റോയാണ് ഇന്ററിന്റെ ആശ്വാസ ഗോള് നേടിയത്. മറ്റൊരു മത്സരത്തില് എതിരില്ലാത്ത രണ്ട് ഗോളുകള്ക്ക് പോര്ട്ടോയെ തകര്ത്ത് മാഞ്ചസ്റ്റര് സിറ്റി. എര്ലിങ് ഹാളണ്ടിന്റെ ഇരട്ട ഗോള് മികവിലാണ് സിറ്റിയുടെ ജയം.
ഏഷ്യാനെറ്റ് ന്യൂസ് മലയാളത്തിലൂടെ Sports News അറിയൂ. Football News തുടങ്ങി എല്ലാ കായിക ഇനങ്ങളുടെയും അപ്ഡേറ്റുകൾ ഒറ്റതൊട്ടിൽ. നിങ്ങളുടെ പ്രിയ ടീമുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ എല്ലാം ഇപ്പോൾ Asianet News Malayalam മലയാളത്തിൽ തന്നെ!