1000 കി.മീ യാത്ര ചെയ്താൽ മെസിക്കൊപ്പം ഒറ്റയ്ക്കൊരു ഫോട്ടോ എടുക്കാം, മുടക്കേണ്ട തുക കൈയിലുണ്ടോ, ജിഎസ്ടി കൂടാതെ 10 ലക്ഷം!
Synopsis
മെസിക്കൊപ്പം ചിത്രങ്ങളെടുക്കാന് വിവിധ പാക്കേജുകളാണ് സംഘാടകര് അവതരിപ്പിച്ചിരിക്കുന്നത്. 13ന് വൈകിട്ട് ഹൈദരാബാദിലെത്തുന്ന മെസിക്കൊപ്പം ഫോട്ടോ എടുക്കാന് ഒരാള് 10 ലക്ഷം രൂപയും ജിഎസ്ടിയുമാണ് മുടക്കേണ്ടത്.
ഹൈദരാബാദ്: ശനിയാഴ്ച ഇന്ത്യയിലെത്തുന്ന അര്ജന്റീനിയന് ഫുട്ബോള് ഇതിഹാസം ലിയോണൽ മെസിക്കൊപ്പം ഫോട്ടോ എടുക്കാന് ആരാധകര്ക്കും അവസരം. 14 വര്ഷത്തെ ഇടവേളക്കുശേഷമാണ് ഗോട്ട് ടൂറിന്റെ ഭാഗമായി മെസി ഇന്ത്യയിലെത്തുന്നത്. 13ന് കൊല്ക്കത്തയിലെത്തുന്ന മെസി അന്ന് വൈകിട്ട് ഹൈദരാബാദ് സന്ദര്ശിക്കും. 14ന് മുംബൈയും 15ന് ഡല്ഹിയും സന്ദര്ശിക്കും. 2011ല് കൊല്ക്കത്തയിൽ വെലസ്വേലക്കെതിരായ സൗഹൃദ മത്സരം കളിക്കാനായിട്ടാണ് മെസി അവസാനം ഇന്ത്യയിലെത്തിയത്. അര്ജന്റീന നായകനായുള്ള മെസിയുടെ അരങ്ങേറ്റ മത്സരം കൂടിയായിരുന്നു അത്. കൊല്ക്കത്ത, മുംബൈ ഡല്ഹി, ഹൈദരാബാദ് നഗരങ്ങളിലാണ് മെസി ഇന്ത്യയില് സന്ദര്ശിക്കുന്നത്. സന്ദര്ശനത്തിനിടെ ഇലവനുമായുള്ള പ്രദര്ശന മത്സരങ്ങളിലും മെസി കളിക്കുന്നുണ്ട്.
ഇന്ത്യയിലെത്തുന്ന മെസിയെ നേരില് കാണാനും കൂടെ നിന്ന് ഫോട്ടോ എടുക്കാനും സംഘാടകര് ആരാധകര്ക്ക് അവസരം ഒരുക്കിയിട്ടുണ്ട്. മെസിക്കൊപ്പം ചിത്രങ്ങളെടുക്കാന് വിവിധ പാക്കേജുകളാണ് സംഘാടകര് അവതരിപ്പിച്ചിരിക്കുന്നത്. 13ന് വൈകിട്ട് ഹൈദരാബാദിലെത്തുന്ന മെസിക്കൊപ്പം ഫോട്ടോ എടുക്കാന് ഒരാള് 10 ലക്ഷം രൂപയും ജിഎസ്ടിയുമാണ് മുടക്കേണ്ടത്. ഇതാണ് ഏറ്റവും കുറഞ്ഞ പാക്കേജ്. ആദ്യം രജിസ്റ്റര് ചെയ്യുന്ന 100 പേര്ക്ക് മാത്രമാണ് ഇതിന് അവസരം. ഫോട്ടോക്കൊപ്പം മെസി കൈയൊപ്പിട്ട അര്ജന്റീന ജേഴ്സിയും ബോളിവുഡ് താരങ്ങള് ഉള്പ്പെടെയുള്ളവര് മെസിയുമായി കൂടിക്കാഴ്ച നടത്തുന്നതും മെസി പെനല്റ്റി കിക്ക് എടുക്കുന്നത് നേരില് കാണാനുമുള്ള അവസരവും അത്താഴവിരുന്നും ലഭിക്കും.
ശനിയാഴ്ച വൈകിട്ട് നാല് മണിക്ക് ഹൈദരാബാദിലെത്തുന്ന മെസി ഉപ്പല് സ്റ്റേഡിയത്തില് വൈകിട്ട് 7ന് നടക്കുന്ന പൊതു പരിപാടിയില് പങ്കെടുക്കും. 20 മിനിറ്റ് പ്രദര്ശനമത്സരവും ഹൈദരാബാദിലുണ്ടാകും. സിംഗരേനി ആര്ആര്-9 ടീമും മെസി ഓള് സ്റ്റാര്സ് ടീമും തമ്മിലുള്ള മത്സരത്തിന്റെ അവസാന അഞ്ച് മിനിറ്റാകും മെസി ഗ്രൗണ്ടിലിറങ്ങുക. മെസിക്കൊപ്പം തെലങ്കാന മുഖ്യമന്ത്രി രേവന്ത് റെഡ്ഡിയും ഗ്രൗണ്ടിലിറങ്ങുമെന്നാണ് കരുതുന്നത്.
മറ്റ് പാക്കേജുകള്
12.50 ലക്ഷം രൂപയും ജിഎസ്ടിയും മുടക്കിയാല് അച്ഛനും മകനും മെസിയെ ഒറ്റക്ക് കാണാനുള്ള അവസരം ലഭിക്കും. ആരെങ്കിലും ഒരാള്ക്ക് മാത്രമെ കൂടെ നിന്ന് ഫോട്ടോ എടുക്കാനാവു. രണ്ട് പേര്ക്കും മെസി കൈയൊപ്പിട്ട അര്ജന്റീന ജേഴ്സി ലഭിക്കും. മെസിയുടെ പെനല്റ്റി കിക്ക് കാണാനുള്ള അവസരവും അത്താഴവിരുന്നില് പങ്കെടുക്കാനുള്ള അവസരവും ഉണ്ടാകും.
ഫാമിലി പാക്കേജിന് 25 ലക്ഷം രൂപയും ജിഎസ്ടിയുമാണ് മുടക്കേണ്ടത്. രണ്ട് പേര്ക്ക് മെസിയുടെ കൂടെ ഫോട്ടോ എടുക്കാം. രണ്ട് പേര്ക്ക് മെസിയുടെ കൈയൊപ്പോടെയുള്ള ജേഴ്സിയും നാലു പേര്ക്ക് മെസി പെനല്റ്റി കിക്ക് എടുക്കുന്നത് കാണാനുള്ള അവസരവും അത്താഴവിരുന്നില് പങ്കെടുക്കാനുള്ള അവസരവും ലഭിക്കും.
കോര്പറേറ്റ് പാക്കേജില് 95 ലക്ഷം രൂപയും ജിഎസ്ടിയും മുടക്കിയാല് കോര്പറേറ്റ് തലത്തിലുള്ള ആദരം, മെസിയില് നിന്ന് മൊമെന്റോ വാങ്ങാനുള്ള അവസരം, കോര്പറേറ്റ് ടീമുകൾക്ക് മെസിക്കൊപ്പം ഫോട്ടോ എടുക്കാനുള്ള അവസരം ടീം അംഗങ്ങള്ക്ക് മെസി കൈയൊപ്പിട്ട ജേഴ്സി എന്നിവയും ലഭിക്കും.
ഏഷ്യാനെറ്റ് ന്യൂസ് ലൈവ് കാണാന് ഇവിടെ ക്ലിക് ചെയ്യുക
ഏഷ്യാനെറ്റ് ന്യൂസ് മലയാളത്തിലൂടെ Sports News അറിയൂ. Football News തുടങ്ങി എല്ലാ കായിക ഇനങ്ങളുടെയും അപ്ഡേറ്റുകൾ ഒറ്റതൊട്ടിൽ. നിങ്ങളുടെ പ്രിയ ടീമുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ എല്ലാം ഇപ്പോൾ Asianet News Malayalam മലയാളത്തിൽ തന്നെ!